દક્ષિણ આફ્રિકાના ઓલરાઉન્ડર માર્કો યાન્સેન એ ભારતીય સ્ટાર બેટ્સમેન વિરાટ કોહલીને વિશ્વના સૌથી મુશ્કેલ પ્રતિસ્પર્ધીઓમાંથી એક ગણાવ્યો છે. યાન્સેને કહ્યું કે વિરાટ કોહલી જેવા વિશ્વસ્તરીય બેટ્સમેનને એકવાર ક્રિઝ પર જામી ગયા પછી રન બનાવતા રોકવો લગભગ અશક્ય બની જાય છે. તેણે સ્વીકાર્યું કે કોહલીની લાંબી ઇનિંગ્સ રમવાની અને ઇનિંગ્સના સૂત્રધાર બનવાની ક્ષમતા જ અમારા માટે બોલિંગ સૌથી મુશ્કેલ બનાવે છે.
વિશ્વસ્તરીય બેટ્સમેનો સામેની રણનીતિ
ભારત અને દક્ષિણ આફ્રિકા વચ્ચે અહીં રમાયેલી પ્રથમ ODI મેચમાં કોહલીએ શાનદાર સદી ફટકારી હતી, જેના કારણે ભારતીય ટીમ 17 રનથી વિજય મેળવીને ત્રણ મેચની શ્રેણીમાં 1-0ની સરસાઈ મેળવવામાં સફળ રહી. યાન્સેને કહ્યું કે વિશ્વસ્તરીય બેટ્સમેનો સામે બોલર પાસે શરૂઆતમાં જ તેમને આઉટ કરવાની તક હોય છે. યાન્સને પોતાની રણનીતિ સમજાવતા કહ્યું કે “જ્યારે તમે વિશ્વસ્તરીય બેટ્સમેનોને બોલિંગ કરો છો, ત્યારે તેમને આઉટ કરવા ખૂબ મુશ્કેલ હોય છે. હું હંમેશા બેટ્સમેનને તેની પહેલી 10 કે 15 બોલમાં આઉટ કરવાનો પ્રયત્ન કરું છું, કારણ કે તે સમયે તે વિકેટ સાથે તાલમેલ બેસાડવાનો પ્રયાસ કરી રહ્યો હોય છે. પરંતુ એકવાર તે લય હાંસલ કરી લે, પછી તેને રોકવો મુશ્કેલ થઈ જાય છે. આવી પરિસ્થિતિઓમાં તમારે પ્લાન B અથવા C પર જવું પડે છે.”
કોહલીને બોલિંગ કરવી: પડકાર અને આનંદ
યાન્સેને યાદ કર્યું કે ભારતના 2017-18ના દક્ષિણ આફ્રિકાના પ્રવાસ દરમિયાન તેણે 17 વર્ષના નેટ બોલર તરીકે પહેલીવાર કોહલીને બોલિંગ કરી હતી. તેમણે કહ્યું કે આધુનિક ક્રિકેટના મહાન ખેલાડીઓમાંથી એક એવા કોહલી માટે બોલિંગ કરવાનો પડકાર નિરાશાજનક અને સુખદ બંને છે. “તેને રમતો જોવો ગમે છે, અમે બાળપણથી જ તેને ટીવી પર રમતા જોયા હતા. હવે તેને બોલિંગ કરવી ચોક્કસપણે પડકારજનક છે, પરંતુ તે મજા પણ આપે છે. તે ડ્રાઇવ સારી મારે છે, પુલ સારો મારે છે, કટ સારો મારે છે અને પેડનો પણ સારો ઉપયોગ કરે છે. મને નથી લાગતું કે કંઈ ખાસ બદલાયું છે. બસ તે વધુને વધુ સમય સુધી બેટિંગ કરવા માંગે છે.”
