લાલો કૃષ્ણ સદા સહાયતે એ બીજી નોંધપાત્ર સિદ્ધિ હાંસલ કરી છે. આ ફિલ્મે તેના આઠમા સપ્તાહના કલેક્શનના સંદર્ભમાં સ્ત્રી 2, પુષ્પા 2 અને છાવાને પાછળ છોડી દીધા છે.
અંકિત સખિયા દિગ્દર્શિત લાલો કૃષ્ણ સદા સહાયતે બોક્સ ઑફિસ પર અદ્દભુત દોડ કરી રહી છે. રિલીઝને આઠ અઠવાડિયા વીતી ગયા હોવા છતાં ફિલ્મના કલેક્શનમાં કોઈ ઘટાડો જોવા મળતો નથી. દરેક અઠવાડિયે નવી ઊંચાઈ હાંસલ કરતી આ ફિલ્મે હવે ભારતીય સિનેમામાં 8મા અઠવાડિયાનું સૌથી વધુ કમાણી કરનાર ફિલ્મનો ખિતાબ પોતાના નામે કર્યો છે. આ સપ્તાહે જ ફિલ્મે આશ્ચર્યજનક ₹8.50 કરોડ કમાવીને બધાને ચોંકાવી દીધા છે. આ સાથે જ તેણે શ્રદ્ધા કપૂર અને રાજકુમાર રાવ અભિનીત સ્ત્રી 2 નો રેકોર્ડ પણ તોડી નાખ્યો છે.
રિલીઝના પ્રારંભિક દિવસોમાં કેટલાક લોકોએ ફિલ્મને ફ્લોપ ગણાવી હતી, પરંતુ ચોથી જ વીકથી ફિલ્મે જોરદાર પકડ બનાવી અને ત્યારથી સતત રેકોર્ડ પર રેકોર્ડ તોડી રહી છે. 8મા અઠવાડિયામાં ફિલ્મે સ્ત્રી 2 ના ₹4.5 કરોડના કલેક્શનને પાછળ મૂકી દીધું. આ સાથે જ વિકી કૌશલની છાવા (₹4.10 કરોડ) અને અલ્લુ અર્જુનની બ્લોકબસ્ટર પુષ્પા 2 – ધ રૂલ ને પણ 8મા અઠવાડિયાના કમાણીમાં પાછળ છોડવામાં આવી છે. પુષ્પા 2 એ આ જ અઠવાડિયામાં માત્ર ₹2.85 કરોડ કમાયા હતા.
આઠમા અઠવાડિયાનો રવિવાર ફિલ્મ માટે સૌથી મજબૂત સાબિત થયો, જ્યારે પોઝિટિવ વર્ડ ઑફ માઉથના કારણે કલેક્શન ₹2.50 કરોડ સુધી પહોંચ્યું. ત્યારબાદ સોમવારે ₹85 લાખ, મંગળવારે ₹1.15 કરોડ અને બુધવારે ₹75 લાખની કમાણી નોંધાઈ. 8મી ગુરુવારનો અંદાજીત બિઝનેસ ₹60 લાખ રહ્યો, જેને કારણે વીક-8નું કુલ કલેક્શન ₹8.50 કરોડ સુધી પહોંચી ગયું.
લાલો કૃષ્ણ સદા સહાયતે હવે માત્ર ગુજરાતી બ્લોકબસ્ટર નહીં, પરંતુ રાષ્ટ્રીય સ્તરે ચર્ચાતી ફિલ્મ બની ગઈ છે. અત્યાર સુધીની કુલ કમાણી ₹87.60 કરોડને પાર કરી ચૂકી છે, જેના કારણે તે 2025ની 31મી સૌથી મોટી હિટ ફિલ્મ તરીકે ઉભરી છે. ટૂંક સમયમાં જ તે સની દેઓલની જટ્ટ ને પાછળ મૂકી ટોપ-30 માં પ્રવેશ કરશે. સૌથી નોંધપાત્ર વાત એ છે કે ફિલ્મે 8મા અઠવાડિયામાં સ્ત્રી 2, છાવા અને પુષ્પા 2 જેવા મોટા નામોને પાછળ મુકી દીધા છે જે દર્શાવે છે કે ‘લાલો’ પ્રેક્ષકો સાથે કેટલું મજબૂત બંધન બાંધી ચૂકી છે.
