ઈડીએ ક્રિકેટર યુવરાજ સિંહ, રોબિન ઉથપ્પા, મોડલ ઉર્વશી રૌતેલા, નેહા શર્મા, અભિનેતા સોનુ સૂદ, અંકુર હાજરા, અભિનેત્રી મિમિ ચક્રવર્તીની કુલ મળીને આઠ કરોડ રૂપિયાની સંપત્તિ જપ્ત કરી છે. મની લોન્ડરિંગ એક્ટ હેઠળ આ કાર્યવાહી કરી છે. એજન્સીએ વનએક્સબેટ નામની બેટિંગ એપ કંપનીના કેસમાં આ કાર્યવાહી કરી છે. બેટિંગ એપ પર આરોપ છે કે તેણે મોટા પાયે ટેક્સની ચોરી કરી છે અને રોકાણકારો સાથે કરોડોની છેતરપિંડી કરી છે. આ કંપનીની વેબસાઈટ ૭૦ જેટલી ભાષાઓમાં સર્વિસ આપે છે. અત્યાર સુધીમાં આ કેસમાં ૧૯ કરોડથી વધુની સંપત્તિ ટાંચમાં લેવાઈ છે.
ઓનલાઈન સટ્ટો રમાડતી એપ વનએક્સબેટના કેસમાં ઈડીએ ક્રિકેટર્સ, એક્ટર્સ અને મોડલ્સ પર કાર્યવાહી કરી છે. ક્રિકેટર યુવરાજ સિંહની ૨.૫ કરોડ રૂપિયાની સંપત્તિ ટાંચમાં લેવાઈ છે. ઉર્વશી રોતેલાના માતા મીરા રોતેલાના નામે રજિસ્ટર થયેલી ૨.૨ કરોડ રૂપિયાની સંપત્તિ જપ્ત થઈ છે. ક્રિકેટર રોબિન ઉથપ્પાની ૮.૨૬ લાખ રૂપિયાની સંપત્તિ ટાંચમાં લેવાઈ છે. એક્ટર સોનુ સૂદની એક કરોડની, મિમિ ચક્રવર્તીની ૫૯ લાખની, બંગાળી અભિનેતા અંકુશ હાજરાની ૪૭ લાખની અને મોડલ નેહા શર્માની ૧.૨૬ કરોડની સંપત્તિ જપ્ત કરવામાં આવી છે.
ઈડીએ ગેરકાયદે બેટિંગ એપના મુદ્દે તપાસ કરી હતી. વનએક્સબેટ નામનું પ્લેટફોર્મ ૧૮ વર્ષથી દુનિયાભરમાં સટ્ટો રમાડે છે. વૈશ્વિક સ્તરે એ કામ કરે છે. એમાં ગેરકાયદે પૈસાની હેરાફેરી થઈ હોવાનો આરોપ લાગ્યો હતો. અગાઉ ઈડીએ ૧૯ કરોડ રૂપિયાની સંપત્તિ ટાંચમાં લીધી હતી. હવે વધુ આઠ કરોડ રૂપિયાની સંપત્તિ જપ્ત થઈ છે. તપાસ એજન્સીએ સેલિબ્રિટિઝ અને સોશિયલ મીડિયા ઈન્ફ્લુએન્સર્સને તાકીદ કરી છે કે ગેરકાયદે સટ્ટાબાજી અને જુગાર પ્લેટફોર્મને પ્રોત્સાહન આપવું તે સજાપાત્ર ગુનો છે. કોઈ પણ વ્યક્તિ ગેરકાયદે સટ્ટાને પ્રોત્સાહન આપશે તો તેની સામે કાર્યવાહી થશે.એજન્સીના સૂત્રોએ કહ્યું હતું કે આ તમામ સેલિબ્રિટિઝના નિવેદનો લેવામાં આવ્યા હતા. કલાકો સુધી તેમની પૂછપરછ કરાઈ હતી. એજન્સીને તેમનો સંતોષકારક જવાબ મળ્યો ન હતો અને ખુલાસો યોગ્ય લાગ્યો ન હોવાથી તેમની સામે કાર્યવાહી કરવામાં આવી છે. તેમની સંપત્તિમાં આ મની લોન્ડરિંગ હેઠળ ગેરકાયદે સંપત્તિ ગણવામાં આવી છે. એજન્સીએ એવું પણ કહ્યું હતું કે આ સેલિબ્રિટીઝ સાથે કરારો થયા હતા ત્યારે તેમને જાણ હતી કે આ પ્લેટફોર્મ ગેરકાયદે બેટિંગ કરે છે. એન્ડોર્સમેન્ટ વિદેશી સંસ્થાઓના માધ્યમથી મળેલા પેમેન્ટથી કરવામાં આવ્યું હતું. ફંડનો સ્ત્રોત અને ગેરકાયદે સટ્ટાની એક્ટિવિટી છુપાવવા માટે સેલિબ્રિટિઝને પ્રમોશન માટે રોકવામાં આવ્યા હતા.
