: સરકારી તંત્રમાં મોટાભાગના કામ સમયસર થતા નથી તેથી લોકોને હાલાકી ભોગવવી પડતી હોય છે, આવુ જ હાલ ભાવનગર મહાપાલિકામાં જોવા મળી રહ્યુ છે. મહાપાલિકાના વાંકે શહેરમાં લાંબા સમયથી સિટી બસ સેવા બંધ છે અને ઇ-બસની આવવાની વાતો પણ લાંબા સમયથી કરાય છે પરંતુ હજુ ઇ-બસ સેવા શરૂ થઈ નથી.
ભાજપના રાજમાં ભાવનગર શહેરમાં છેલ્લા ૭ માસથી સિટી બસ સેવા બંધ છે તેથી મુસાફરોની મૂશ્કેલી વધી છે. સિટી બસ સેવા લાંબા સમયથી બંધ હોવાથી લોકોને ના છૂટકે રિક્ષામાં મુસાફરી કરવી પડી રહી છે અને રિક્ષા ચાલકો વધુ ભાવ લેતા હોવાથી મુસાફરોમાં કચવાટ જોવા મળી રહ્યો છે. પી.એમ. ઇ-બસ સેવા યોજના હેઠળ ૧૦૦ ઇ-બસ કેન્દ્ર સરકાર દ્વારા ભાવનગર મહાપાલિકાને આપવામાં આવશે તેવી વાતો લાંબા સમયથી થઈ રહી છે પરંતુ હજુ એક પણ ઇ-બસ આવી નથી. ડિસેમ્બર માસમાં ઇ-બસ સેવા શરૂ થઈ જશે તેવો દાવો મહાપાલિકાના અધિકારીઓ કરી રહ્યા હતા પરંતુ હજુ સુધી ઇ-બસ આવી નથી તેથી અધિકારીઓના દાવા ખોટા પડયા છે. ઇ-બસ સેવા અંગે મહાપાલિકાના નાયબ કમિશનર જયકુમાર રાવળને પુછતા તેઓએ માહિતી આપતા જણાવ્યુ હતુ કે, આગામી ર૬ થી ર૮ ડિસેમ્બર સુધીમાં એક ઇ-બસ ટ્રાઈલ માટે ભાવનગરમાં લવાશે અને ત્યારબાદ જાન્યુઆરી માસમાં ૪૦ ઇ-બસ આવશે. આગામી તા. ર૦ જાન્યુઆરી-ર૦ર૬થી ભાવનગર શહેરમાં ઇ-બસ સેવા શરૂ થશે અને ત્યારબાદ વધુ ૬૦ ઇ-બસ આવશે. કુલ ૧૦૦ ઇ-બસ ભાવનગરને મળશે તેમ જણાવેલ છે. ઉલ્લેખનીય છે કે, ભાવનગર શહેરમાં સિટી બસ સેવા શરૂ હતી ત્યારે મુસાફરોને રાહત હતી પરંતુ લાંબા સમયથી સિટી બસ સેવા બંધ હોવાથી મુસાફરોમાં રોષ જોવા મળી રહ્યો છે અને ઝડપથી સિટી બસ સેવા માંગણી કરી રહ્યા છે.
શહેરમાં હાલ 16 રૂટ પર ઇ-બસ દોડશે
ભાવનગર શહેરમાં એક પણ ઇ-બસ હજુ આવી નથી પરંતુ મહાપાલિકા દ્વારા આ સેવા માટે આશરે ૧૬ રૂટ હાલ નક્કી કરવામાં આવ્યા છે પરંતુ તેમાં ફેરફાર આવી શકે છે તેમ સુત્રોએ જણાવેલ છે. ઇ-બસ સેવા હેઠળ તમામ વિસ્તારને આવરી લેવામાં આવે તેવી માંગણી થઈ રહી છે.
