રાજકોટ જિલ્લાના જસદણ પંથકમાં કાયદો અને વ્યવસ્થાની સ્થિતિ સામે સવાલો ઊભા કરતી એક અત્યંત શરમજનક ઘટના સામે આવી છે.
જસદણ તાલુકાના એક ગામમાં રહેતી 50 વર્ષીય આધેડ મહિલાએ ગામના જ શખસ લાલા અજા ઉર્ફે અરજણભાઈ સાકરીયા વિરુદ્ધ ગંભીર આક્ષેપો સાથે ફરિયાદ નોંધાવી છે. ફરિયાદ મુજબ રાત્રિના સમયે જ્યારે મહિલા ઘરમાં એકલા હતા, ત્યારે આરોપીએ અચાનક દરવાજો ખખડાવ્યો હતો. મહિલાએ દરવાજો ન ખોલતા, નરાધમ દીવાલ ટપીને ઘરમાં ઘૂસી આવ્યો હતો. ઘરમાં ઘૂસ્યા બાદ આરોપીએ મહિલા પાસે શરીર સંબંધની માંગણી કરી હતી. જ્યારે મહિલાએ આ અનૈતિક માંગણીનો વિરોધ કર્યો અને તાબે ન થઈ, ત્યારે ઉશ્કેરાયેલા આરોપીએ મહિલા સાથે નિર્દયતાથી મારામારી કરી હતી.
આ હુમલાને કારણે મહિલા અર્ધબેભાન થઈ ગઈ હતી. મહિલા ભાનમાં આવ્યા બાદ આરોપી ત્યાંથી ફરાર થઈ ગયો હતો. પીડિતાએ હિંમત દાખવી જસદણ પોલીસ સ્ટેશનમાં ફરિયાદ નોંધાવતા પોલીસે: આરોપી વિરુદ્ધ જાતીય સતામણી, એટ્રોસિટી એક્ટ તેમજ મારામારી સહિતની વિવિધ કલમો હેઠળ ગુનો દાખલ કર્યો છે. આરોપી લાલા અજાને ઝડપી લેવા માટે અલગ-અલગ ટીમો બનાવી શોધખોળ શરૂ કરી છે.
