પતંગ મહોત્સવમાં ભાગ લેવા આવેલા ન્યુઝીલેન્ડના પતંગબાજ રિવરફ્રન્ટના ગ્રાઉન્ડ પર પતંગ ઉડાવી રહ્યા હતા ત્યારે અચાનક ગરમી અને અસહ્ય ઉકળાટના કારણે તેમને ચક્કર આવ્યા હતા.અમદાવાદના સાબરમતી રિવરફ્રન્ટ પર રંગેચંગે શરૂ થયેલા આંતરરાષ્ટ્રીય પતંગ મહોત્સવમાં એક ચિંતાજનક ઘટના સામે આવી છે. વિશ્વભરમાંથી પતંગબાજો પોતાની કલાનું પ્રદર્શન કરવા માટે જ્યારે અમદાવાદના આંગણે આવ્યા છે, ત્યારે વાતાવરણમાં વધેલા તાપમાન અને ગરમીના કારણે એક પતંગબાજની તબિયત અચાનક લથડી હતી.
મળતી માહિતી મુજબ, પતંગ મહોત્સવમાં ભાગ લેવા આવેલા ન્યુઝીલેન્ડના પતંગબાજ રિવરફ્રન્ટના ગ્રાઉન્ડ પર પતંગ ઉડાવી રહ્યા હતા ત્યારે અચાનક ગરમી અને અસહ્ય ઉકળાટના કારણે તેમને ચક્કર આવ્યા હતા. ન્યુઝીલેન્ડ જેવા ઠંડા પ્રદેશમાંથી આવેલા આ પતંગબાજ માટે અમદાવાદની બપોરની ગરમી પ્રતિકૂળ સાબિત થઈ હોય તેમ જણાતું હતું. અચાનક તબિયત બગડતા સ્થળ પર હાજર અન્ય પતંગબાજો અને આયોજકોમાં દોડધામ મચી ગઈ હતી.
ઘટનાની ગંભીરતા જોઈને સ્થળ પર હાજર મેડિકલ ટીમ તુરંત એક્શનમાં આવી હતી. પતંગબાજને પ્રાથમિક સારવાર આપ્યા બાદ વધુ તપાસ અને સારવાર માટે તાત્કાલિક હોસ્પિટલમાં ખસેડવામાં આવ્યા હતા. તબીબોના જણાવ્યા અનુસાર, હીટ એક્ઝોશ્ન ગરમીની અસર ના કારણે તેમની સ્થિતિ બગડી હોવાની શક્યતા છે.
આયોજનમાં તકેદારીના પગલાં આ ઘટના બાદ પતંગ મહોત્સવમાં આવેલા અન્ય વિદેશી મહેમાનો માટે પીવાના પાણી, છાંયડા અને ઓઆરએસ (ORS) જેવી સુવિધાઓ વધારી દેવામાં આવી છે. દર વર્ષે જાન્યુઆરીમાં યોજાતા આ મહોત્સવમાં હજારો લોકો ઉમટી પડતા હોય છે, ત્યારે આ વર્ષે વાતાવરણમાં પલટાને કારણે ગરમીનું પ્રમાણ વધતા તંત્ર દ્વારા પતંગબાજોના સ્વાસ્થ્યને લઈને વિશેષ તકેદારી રાખવાની સૂચના આપવામાં આવી છે. હાલમાં ન્યુઝીલેન્ડના પતંગબાજની હાલત સ્થિર હોવાનું જાણવા મળ્યું છે, પરંતુ આ ઘટનાએ આયોજકોને સ્વાસ્થ્ય સેવાઓ પ્રત્યે વધુ સતર્ક કર્યા છે.
