અમદાવાદ મ્યુનિસિપલ સ્કૂલ બોર્ડ દ્વારા આગામી નાણાકીય વર્ષ 2026-27 માટેનું ડ્રાફ્ટ બજેટ રજૂ કરવામાં આવ્યું છે. શાસનાધિકારી એલ.ડી. દેસાઈ દ્વારા રજૂ કરવામાં આવેલા આ બજેટમાં ગત વર્ષની સરખામણીએ નોંધપાત્ર વધારો કરવામાં આવ્યો છે. આ વર્ષે કુલ ₹1200 કરોડનું બજેટ જાહેર કરવામાં આવ્યું છે, જે ગત વર્ષના ₹1094 કરોડના ડ્રાફ્ટ બજેટ કરતા ઘણું વધારે છે. નોંધનીય છે કે ગત વર્ષનું ફાઈનલ બજેટ ₹1155 કરોડ રહ્યું હતું.
બજેટની વિગતો આપતા શાસનાધિકારીએ જણાવ્યું હતું કે, કુલ બજેટના 87 ટકા રકમ પગાર, ભથ્થા અને પેન્શન પાછળ ખર્ચવામાં આવશે, જ્યારે બાકીના 13 ટકા (અંદાજે ₹156 કરોડ) રકમ સીધી રીતે બાળકોના વિકાસલક્ષી કાર્યો અને શૈક્ષણિક સુવિધાઓ પાછળ વાપરવામાં આવશે. દેસાઈએ સંતોષ વ્યક્ત કર્યો હતો કે ગત બજેટમાં નિર્ધારિત કરવામાં આવેલા 95 ટકા કામો સફળતાપૂર્વક પૂર્ણ કરી દેવામાં આવ્યા છે.
અમદાવાદની તમામ 353 જેટલી શાળાઓને બેસ્ટ અનુપમ શાળા બનાવવાનું મહત્વાકાંક્ષી લક્ષ્ય રાખવામાં આવ્યું છે. હાલમાં 1000 જેટલા નવા ઓરડાઓનું નિર્માણ કાર્ય પ્રગતિમાં છે અને 78 શાળાઓના વિકાસના કામો પૂરજોશમાં ચાલી રહ્યા છે. આ ઉપરાંત, વિદ્યાર્થીઓમાં વાંચન પ્રત્યે રુચિ વધે તે માટે 50 સ્માર્ટ લાયબ્રેરીઓના વિકાસ માટે પણ વિશેષ ભંડોળની જોગવાઈ કરવામાં આવી છે.
આ બજેટની સૌથી મોટી વિશેષતા એ છે કે તેમાં કોમનવેલ્થ ગેમ્સને ધ્યાનમાં રાખીને રમતગમત પર ધ્યાન કેન્દ્રિત કરવામાં આવ્યું છે. મ્યુનિસિપલ શાળાઓના પ્રતિભાશાળી બાળકોને વૈશ્વિક સ્તરે તૈયાર કરવા માટે પ્રોત્સાહન અને પ્રોફેશનલ કોચિંગ આપવા માટે બજેટ ફાળવવામાં આવ્યું છે. આ સાથે જ સ્કૂલ બોર્ડ દ્વારા કન્યાઓના વિકાસ અને મહિલા સશક્તિકરણ માટેના પ્રોજેક્ટ્સને પણ વેગ આપવાની કટિબદ્ધતા દર્શાવી છે.
બજેટ રજૂ કરવાના આ કાર્યક્રમમાં ડેપ્યુટી મ્યુનિસિપલ કમિશનર નિલેશ પટેલ, સ્કૂલ બોર્ડ ચેરમેન સુજય મહેતા અને ડેપ્યુટી ચેરમેન વિપુલ સેવક સહિતના મહાનુભાવો ઉપસ્થિત રહ્યા હતા. આ બજેટ અમદાવાદના મધ્યમ અને ગરીબ વર્ગના બાળકો માટે ગુણવત્તાયુક્ત શિક્ષણના દ્વાર ખોલશે તેવી આશા વ્યક્ત કરવામાં આવી છે.
