શહેરના અલગ અલગ પોલીસ મથકના ચોપડે નોંધાયેલા આંકડા મુજબ છેલ્લા ૨૫ દિવસ દરમિયાન ચોરીના ૩૩ બનાવો નોંધાયા છે, આ બનાવોમાં લોકો લાખો રૂપિયાની મત્તા ગુમાવી બેઠા છે.
ઘરફોડ ચોરીના કિસ્સાઓમાં અજાણ્યા તસ્કરો બંધ મકાનોને નિશાન બનાવી દાગીના, રોકડ, કિંમતી સામાન ચોરી ગયા છે. ઉપરાંત મંદિરોમાં પણ તસ્કરો હાથ સાફ કરી જતા સુરક્ષા વ્યવસ્થાની પોલ ખોલી છે. તંત્ર દ્વારા દાવો કરવામાં આવે છે કે, શહેરમાં પેટ્રોલિંગ વધારવામાં આવ્યું છે અને શંકાસ્પદ વ્યક્તિઓ પર નજર રાખવામાં આવી રહી છે. જોકે, હજુ પણ તસ્કરો નવી-નવી રીતો અપનાવીને પોલીસને પડકાર ફેંકી રહ્યા છે.
તો બીજી તરફ, અનેક સ્થળોએ સીસીટીવી કેમેરા હોવા છતાં ગુનેગારોને રોકવામાં સફળતા મળી રહી નથી. કેટલાક કિસ્સામાં કેમેરામાં ચહેરા કે વાહનની ઓળખ સ્પષ્ટ રીતે થઈ શકતી નથી. કેમેરા હોવા છતાં ઉપયોગી પુરાવા મળતા નથી. અનેક સ્થળોએ કેમેરા નોન-ફંક્શનલ હોવાનું પણ સામે આવ્યું છે. કેટલાક કેસોમાં તો ઘટના બાદ જાણવા મળે છે કે, કેમેરા બંધ હતા, જેના કારણે તપાસમાં મુશ્કેલી થાય છે. તસ્કર ચહેરો ઢાંકી કે હેલ્મેટ પહેરીને ગુનાઓ અંજામ આપે છે, જેથી ઓળખ શક્ય નબને.
સીસીટીવીના અમલમાં ઢીલાશ
રહેણાંક સોસાયટીઓ, બિલ્ડીંગો અને કોમર્શિયલ સેન્ટરોમાં સુરક્ષા વધારવા હાઈ ડેફિનેશન – નાઈટ વિઝન ધરાવતા સીસીટીવી કેમેરા ફરજિયાત છે. સમગ્ર વિસ્તાર આવરી લે તેવી વ્યવસ્થા ઉભી કરવાની અને જરૂરી સમયે અધિકૃત અધિકારીઓ સરળતાથી ફૂટેજ ચેક કરી શકે તેવો નિર્દેશ છે. છતા આ જાહેરનામાનું સરેઆમ ઉલ્લંઘન થઈ રહ્યું છે. હજુ પણ ઘણી સોસાયટીઓમાં સીસીટીવી કેમેરાની સુવિધા ઉપલબ્ધ નથી.
અલગ અલગ પોલીસ સ્ટેશને કેસોની સંખ્યા
-ઘરફોડચોરી-6
-મંદિરમાં ચોરી – ૪
-ચોરીનો પ્રયાસ – ૨
– ગોડાઉન/ખુલ્લી જગ્યા/કંપનીમાં ચોરી – ૪
-વાહન ચોરી – ૧૨
-મોબાઈલ ચોરી -૩
– મોબાઇલ સ્નેચિંગ – ૧
-ડિકી તોડી ચોરી – ૧
