ઈરાનના વિદેશ મંત્રી અબ્બાસ અરાઘચીએ સોમવારે રશિયન રાષ્ટ્રપતિ વ્લાદિમીર પુતિન સાથે મુલાકાત કરી હતી. આ બેઠકમાં રશિયાએ ઈરાન પ્રત્યે પોતાનું સમર્થન વ્યક્ત કર્યું હતું.રશિયન મીડિયા અનુસાર, પુતિને કહ્યું કે ઈરાની જનતા સાહસ અને વીરતા સાથે પોતાની આઝાદી અને સાર્વભૌમત્વ માટે લડી રહી છે. તેમણે એમ પણ જણાવ્યું કે તેમને ઈરાનના સુપ્રીમ લીડર મુજતબા ખામેનીનો સંદેશ મળ્યો છે.
અરાઘચીની આ મુલાકાત એવા સમયે થઈ છે, જ્યારે અમેરિકા અને ઈરાન વચ્ચેની તાજેતરની વાતચીત કોઈ પરિણામ પર પહોંચી શકી નથી. આવી સ્થિતિમાં ઈરાન રશિયાનું સમર્થન મજબૂત કરવામાં લાગેલું છે.બીજી તરફ, અમેરિકી રાષ્ટ્રપતિ ડોનાલ્ડ ટ્રમ્પ આજે પોતાની રાષ્ટ્રીય સુરક્ષા ટીમ સાથે મહત્વની બેઠક કરશે. જેમાં ઈરાન સાથે ચાલી રહેલા તણાવ, અટકેલી વાતચીત અને આગળની રણનીતિ પર ચર્ચા કરવામાં આવશે.
અમેરિકી મીડિયા રિપોર્ટ્સ અનુસાર, આ બેઠકમાં ઈરાન પર ફરીથી બોમ્બમારો શરૂ કરવાના વિકલ્પ પર પણ ચર્ચા થઈ શકે છે.
ટ્રમ્પે કહ્યું- ઈરાન પાસે બહુ ઓછો સમય બચ્યો છે
અમેરિકાના રાષ્ટ્રપતિ ડોનાલ્ડ ટ્રમ્પે રવિવારે ઈરાનને ચેતવણી આપી. તેમણે કહ્યું કે તેની પાસે યુદ્ધ સમાપ્ત કરવા માટે યુદ્ધવિરામ પર સહમત થવા માટે માત્ર ત્રણ દિવસ છે, નહીં તો તેની તેલ પાઇપલાઇનમાં બ્લાસ્ટ થઈ જશે.
ફોક્સ ન્યૂઝને આપેલા ઇન્ટરવ્યુમાં ટ્રમ્પે કહ્યું કે જો ઈરાન તેલની નિકાસ નહીં કરી શકે, તો પાઇપલાઇનમાં દબાણ વધશે. આવું એટલા માટે થશે કારણ કે તેલને જહાજો કે સ્ટોરેજ ટેન્કોમાં મોકલવાનો રસ્તો બંધ છે અને તેના પર નાકાબંધી લાગી છે.તેમણે દાવો કર્યો કે જ્યારે તેલનો પ્રવાહ અચાનક રોકવો પડે છે, ત્યારે પાઇપલાઇનની અંદર દબાણ બને છે અને તકનીકી તેમજ કુદરતી કારણોસર તે ફાટી શકે છે. ટ્રમ્પના મતે, જો આવું થયું તો પાઇપલાઇનને પહેલા જેવી સ્થિતિમાં ફરીથી બનાવવું લગભગ અશક્ય હશે અને તેની ક્ષમતા પણ ઘણી ઘટી જશે.
