અમેરિકી રાષ્ટ્રપતિ ડોનાલ્ડ ટ્રમ્પે ઈરાનને કડક શબ્દોમાં ચેતવણી આપી છે કે જો તેણે કોઈ પણ ખોટું પગલું ભર્યું તો અમેરિકા ફરીથી હુમલા શરૂ કરી શકે છે. ટ્રમ્પે જણાવ્યું કે તેમને ઈરાન સાથેના સંભવિત કરારની રૂપરેખા આપવામાં આવી છે, પરંતુ તેઓ અત્યારે સંપૂર્ણ અને લેખિત પ્રસ્તાવની રાહ જોઈ રહ્યા છે. ફ્લોરિડામાં પત્રકારો સાથે વાત કરતા ટ્રમ્પે સ્પષ્ટ કર્યું કે હજુ સુધી ઈરાનનો પ્રસ્તાવ સ્વીકારવા લાયક લાગતો નથી.
ઈરાનનો શું છે પ્રસ્તાવ?
બીજી તરફ, ઈરાને એક નવો પ્રસ્તાવ રજૂ કર્યો છે. ઈરાન ‘સ્ટ્રેટ ઓફ હોર્મુઝ’ (હોર્મુઝની સામુદ્રધુની) ને ફરીથી ખોલવા માટે તૈયાર છે, જેથી ત્યાંથી જહાજોની અવરજવર શરૂ થઈ શકે. બદલામાં ઈરાન ઈચ્છે છે કે અમેરિકા તેના પરથી દરિયાઈ નાકેબંધી હટાવી લે. ઈરાને એમ પણ કહ્યું છે કે પરમાણુ મુદ્દાઓ પર વાતચીત પછીથી થઈ શકે છે, પહેલા તણાવ ઓછો કરવા પર ધ્યાન આપવું જોઈએ.
ઈરાનની 14 માંગણીઓ
અહેવાલો અનુસાર, ઈરાને મધ્યસ્થીઓ દ્વારા અમેરિકાને 14 માંગણીઓ મોકલી છે. જેમાં અમેરિકી સૈન્યની પીછેહઠ, આર્થિક પ્રતિબંધોની નાબૂદી, જપ્ત કરેલી મિલકતોની વાપસી અને યુદ્ધના નુકસાનના વળતરનો સમાવેશ થાય છે.
ઉલ્લેખનીય છે કે, 8 એપ્રિલથી અમેરિકા અને ઈઝરાયલે ઈરાન પરના હુમલા રોકી દીધા હતા, પરંતુ હજુ સુધી કોઈ પાકો ઉકેલ આવ્યો નથી. વિશ્વના 20% તેલ અને ગેસનો સપ્લાય હોર્મુઝના માર્ગે થાય છે, તેથી આ વિવાદની અસર વૈશ્વિક અર્થતંત્ર પર પડી રહી છે.
