કેન્દ્ર સરકારે પેટ્રોલ, ડીઝલ અને એવિએશન ટર્બાઇન ફ્યુઅલ (ATF) પર ટેક્સમાં ઘટાડો કરવાની જાહેરાત કરી છે. ડીઝલ નિકાસ ડ્યુટી 5 રૂપિયા ઘટાડી દેવામાં આવી છે. ડીઝલ પરનો વિન્ડફોલ ટેક્સ 25 રૂપિયાથી ઘટાડીને 20 રૂપિયા પ્રતિ લિટર કરવામાં આવ્યો છે. જેટ ફ્યુઅલ (ATF) નિકાસ પરનો ટેક્સ 19 રૂપિયાથી ઘટાડીને 15 રૂપિયા પ્રતિ લિટર કરવામાં આવ્યો છે. પેટ્રોલ નિકાસ પરનો ટેક્સ 1.5 રૂપિયાથી ઘટાડીને 0.5 રૂપિયા પ્રતિ લિટર કરવામાં આવ્યો છે. આ સ્પેશિયલ એડિશનલ એક્સાઇઝ ડ્યુટી (SAED) તરીકે વસૂલવામાં આવશે.
સામાન્ય લોકોને ફાયદો કેમ નહીં થાય?
પેટ્રોલ અને ડીઝલ પર ટેક્સ ઘટાડાના અહેવાલો સામે આવતા જ પહેલો પ્રશ્ન એ થાય છે કે શું તેનાથી સામાન્ય માણસને ફાયદો થશે? જોકે, પેટ્રોલ અને ડીઝલ પરના અણધાર્યા ટેક્સમાં ઘટાડો કરવાથી તમારા કે આપણા ખિસ્સામાં હાલ કોઈ રાહત નહીં મળે. તેનો ફાયદો દેશની ઓઇલ રિફાઇનરીઓ અને નિકાસ કંપનીઓને થશે.આ ઘટાડો ભારતમાં પેટ્રોલ પંપ પર વેચાતા પેટ્રોલ અને ડીઝલ પર નથી, પરંતુ વિન્ડફોલ ટેક્સ પર છે. વિન્ડફોલ ટેક્સ એ એક ફી છે જે કંપનીઓ આંતરરાષ્ટ્રીય બજારમાં ઊંચા ભાવે ઇંધણ વેચીને અણધાર્યા નફા માટે સરકારને ચૂકવે છે. સરકારે આ નિકાસ ડ્યુટી ઘટાડી છે, જેનો અર્થ એ છે કે દેશભરના રિટેલ પેટ્રોલ પંપ પર પેટ્રોલ અને ડીઝલના ભાવ યથાવત્ રહેશે.
કંપનીઓને ફાયદો થશે
મિડલ ઈસ્ટમાં વધતા તણાવ અને સાઉદી અરબના પાઇપલાઇન ઈન્ફ્રસ્ટ્રક્ચરમાં આવેલા અવરોધને કારણે આંતરરાષ્ટ્રીય ઓઈલ માર્કેટમાં નોંધપાત્ર ઉથલપાથલ થઈ છે. આવા વૈશ્વિક દબાણ વચ્ચે, નિકાસ ડ્યુટીમાં ઘટાડો રિફાઇનરી કંપનીઓ માટે મોટી રાહત તરીકે આવ્યો છે. આનાથી વૈશ્વિક બજારમાં ભારતીય રિફાઇનરોના નફાના માર્જિનમાં સુધારો થશે. સરકાર સ્થાનિક બજારમાં પર્યાપ્ત પુરવઠો જાળવવા અને વૈશ્વિક સ્તરે રિફાઇનરોની કમાણીને સંતુલિત કરવા માટે સરેરાશ આંતરરાષ્ટ્રીય ભાવોના આધારે દર 15 દિવસે આ ટેરિફની સમીક્ષા કરે છે.
