ભારતીય મહિલા ટીમની સ્ટાર ખેલાડી સ્મૃતિ મંધાનાનું બેટ શ્રીલંકા સામે ચાલી રહેલી 5 મેચની T20 સિરીઝની પહેલી ત્રણ મેચમાં શાંત રહ્યું છે, તેથી દરેક વ્યક્તિ ચોથી મેચમાં તેની પાસેથી મોટી ઈનિંગની અપેક્ષા રાખી રહ્યા છે.
ભારતીય મહિલા ક્રિકેટ ટીમ હાલમાં શ્રીલંકા સામે ઘરેલુ મેદાન પર પાંચ મેચની T20 સિરીઝ રમી રહી છે. ટીમે પ્રથમ 3 મેચ જીતીને સિરીઝમાં અજેય લીડ મેળવી છે. આ સિરીઝની ચોથી મેચ 28 ડિસેમ્બરે તિરુવનંતપુરમના ગ્રીનફિલ્ડ સ્ટેડિયમમાં રમાશે, જ્યાં ટીમ ઈન્ડિયાની સ્ટાર ઓપનિંગ બેટ્સમેન સ્મૃતિ મંધાના પાસે મોટી સિદ્ધિ હાંસલ કરવાની તક હશે.
સ્મૃતિ મંધાનાએ અત્યાર સુધીમાં ઈન્ટરનેશનલ ક્રિકેટના ત્રણેય ફોર્મેટમાં શાનદાર પ્રદર્શન કર્યું છે, તેને ODIમાં 5,322 અને T20 માં 4,022 રન બનાવ્યા છે. સ્મૃતિ મંધાનાના ટેસ્ટમાં પણ 629 રન છે, જેનાથી ઈન્ટરનેશનલ ક્રિકેટમાં તેના કુલ રન 9,973 થઈ ગયા છે. જો સ્મૃતિ મંધાના શ્રીલંકાની મહિલા ટીમ સામે ચોથી T20Iમાં 27 રન બનાવવાનું સફળ થાય છે, તો તે મહિલા ક્રિકેટમાં 10,000 ઈન્ટરનેશનલ રન પૂર્ણ કરશે.
આ સાથે સ્મૃતિ મંધાના આ સિદ્ધિ મેળવનારી ચોથી મહિલા અને બીજી ભારતીય ખેલાડી બનશે. સ્મૃતિ મંધાના પહેલા આ સિદ્ધિ ભૂતપૂર્વ ભારતીય કેપ્ટન અને પ્રખ્યાત બેટ્સમેન મિતાલી રાજ, સુઝી બેટ્સ અને ચાર્લોટ એડવર્ડ્સે મેળવી છે.
મહિલા T20 ઈન્ટરનેશનલ ક્રિકેટમાં સૌથી વધુ રન બનાવવાના મામલે સ્મૃતિ મંધાના બીજા સ્થાને છે, જેમાં ફક્ત ન્યુઝીલેન્ડની ખેલાડી સુઝી બેટ્સ તેનાથી આગળ છે. સ્મૃતિ મંધાના મહિલા T20માં અત્યાર સુધીની બીજી ખેલાડી છે જે 4000 રનનો આંકડો પાર કરવામાં સફળ રહી છે. પહેલા સ્થાને રહેલી સુઝી બેટ્સે મહિલા T20 ઈન્ટરનેશનલ ક્રિકેટમાં 4716 રન બનાવ્યા છે. ટીમ ઈન્ડિયાની કેપ્ટન હરમનપ્રીત કૌર આ લિસ્ટમાં ત્રીજા નંબરે છે, જેને મહિલા T20 ઈન્ટરનેશનલ ક્રિકેટમાં 3700 રન બનાવ્યા છે.
