ગુજરાતમાં દારૂબંધીના કડક અમલ વચ્ચે ભરૂચ ક્રાઈમ બ્રાન્ચે એક મોટી સફળતા હાંસલ કરી છે. અંકલેશ્વરના જીતાલી ગામ પાસે આવેલા માધવ ઇન્ડસ્ટ્રીયલ એસ્ટેટના એક ગોડાઉન પર ત્રાટકેલી પોલીસે રાજસ્થાનની કુખ્યાત ‘બિશ્નોઈ ગેંગ’ દ્વારા સંચાલિત દારૂના કાળા કારોબારનો પર્દાફાશ કર્યો છે. આ દરોડા દરમિયાન પોલીસે ₹94 લાખની કિંમતનો વિદેશી દારૂનો જથ્થો, પીકઅપ વાહન અને અન્ય સામગ્રી મળી કુલ ₹1 કરોડનો મુદ્દામાલ જપ્ત કરીને બુટલેગરોમાં ફફડાટ ફેલાવી દીધો છે.
ઘટનાની વિગતો મુજબ, બિશ્નોઈ ગેંગ દ્વારા ઔદ્યોગિક વિસ્તારમાં ગોડાઉન ભાડે રાખીને ગુપ્ત રીતે દારૂનો સંગ્રહ કરવામાં આવતો હતો, જ્યાંથી ગુજરાતના અન્ય ભાગોમાં તેનું નેટવર્ક ચાલતું હતું. પોલીસે સ્થળ પરથી રમેશ બિશ્નોઈ નામના શખ્સની ધરપકડ કરી છે. જોકે, આ આંતરરાજ્ય ગેંગના મુખ્ય સાગરીતો સુરેન્દ્ર બિશ્નોઈ, સુરેશ બિશ્નોઈ અને ડેની સહિત 8 આરોપીઓ હજુ પોલીસ પકડથી દૂર છે, જેમને વોન્ટેડ જાહેર કરવામાં આવ્યા છે.
ભરૂચ ક્રાઈમ બ્રાન્ચે આ સમગ્ર નેટવર્કના મૂળ સુધી પહોંચવા માટે તપાસના ચક્રો ગતિમાન કર્યા છે. આગામી દિવસોમાં આ રેકેટમાં અન્ય મોટા માથાઓના નામ ખુલવાની અને વધુ ધરપકડ થવાની પૂરેપૂરી શક્યતા છે. આ ઓપરેશને રાજ્યમાં ઘુસાડવામાં આવતા ગેરકાયદેસર નશાના કારોબાર પર મોટો પ્રહાર કર્યો છે.
