રંગમ સોસાયટીના રહીશોનો હલ્લાબોલ: ગંદકી અને ટ્રાફિકની સમસ્યા વધવાની ભીતિ સાથે ‘રામધૂન’ બોલાવી વિરોધ નોંધાવ્યો
અંકલેશ્વર,
અંકલેશ્વર GIDC વિસ્તારમાં બગીચા માટે નિર્ધારિત કરવામાં આવેલી જગ્યા પર શાકભાજી માર્કેટ સ્થાપવાના નિર્ણય સામે સ્થાનિક રહીશોએ રણશિંગું ફૂંક્યું છે. રંગમ કો-ઓપરેટિવ હાઉસિંગ સોસાયટીના રહીશોએ નોટિફાઇડ એરિયાની કચેરી ખાતે થાળી-વેલણ વગાડી અને રામધૂન બોલાવીને તંત્ર સામે ઉગ્ર વિરોધ પ્રદર્શન કર્યું હતું. રહીશોએ આવેદનપત્ર પાઠવી રજૂઆત કરી હતી કે, અગાઉ આ ખુલ્લી જમીન પર બાળકો અને વરિષ્ઠ નાગરિકો માટે બગીચો બનાવવાનો પ્રસ્તાવ હતો, પરંતુ હવે ત્યાં શાકમાર્કેટ બનાવવાથી વિસ્તારમાં ગંદકી, ટ્રાફિક જામ, અવાજનું પ્રદૂષણ અને સુરક્ષાના ગંભીર પ્રશ્નો ઊભા થશે. સ્થાનિકોએ આ નિર્ણય તાત્કાલિક મોકૂફ રાખવાની માંગ કરી છે. આ મામલે ઉદ્યોગ મંડળના પ્રમુખ વિમલ જેઠવાએ રહીશોની લેખિત રજૂઆત સ્વીકારી ચીફ ઓફિસર સાથે પરામર્શ કરી યોગ્ય કાર્યવાહી કરવાની ખાતરી આપી છે.
