પારડી ઓવરબ્રિજ પાસે આઈશર કન્ટેનર રોકી પોલીસે 4272 નંગ દારૂની બાટલીઓ કબજે કરી; ટ્રક અને અન્ય સામાન મળી કુલ ₹38.39 લાખનો મુદ્દામાલ જપ્ત, એકની ધરપકડ
વલસાડ લોકલ ક્રાઈમ બ્રાંચે (LCB) પારડી નેશનલ હાઈવે પરથી પસાર થતા એક આઈશર કન્ટેનરમાં પ્લાસ્ટિકના દાણાની ગુણીઓની પાછળ છુપાવેલો લાખોની કિંમતનો વિદેશી દારૂનો જથ્થો ઝડપી પાડ્યો છે.
વલસાડ LCB ની ટીમને ચોક્કસ બાતમી મળી હતી કે, મુંબઈથી સુરત તરફ જતા નેશનલ હાઈવે નં. 48 પર એક કન્ટેનર ટ્રકમાં દારૂનો જથ્થો લઈ જવામાં આવી રહ્યો છે. આ બાતમીના આધારે પોલીસે પારડી દમણીઝાપા ઓવરબ્રિજ પાસે વોચ ગોઠવી હતી. દરમિયાન શંકાસ્પદ આઈશર કન્ટેનર ટ્રક (નં. MH-12-LT-0486) ને અટકાવી તલાશી લેતા, તેમાં ઉપરના ભાગે પ્લાસ્ટિકના દાણાની 120 ગુણીઓ ભરેલી હતી, જેની આડમાં વિદેશી દારૂના 158 બોક્સ છુપાવેલા મળી આવ્યા હતા.
પોલીસે સ્થળ પરથી વિદેશી દારૂ (વ્હીસ્કી/રમ/બિયર) 4,272 બાટલી/ટીન (કિંમત ₹21,48,000/-), આઈશર કન્ટેનર ટ્રક (કિંમત ₹15,00,000/-), પ્લાસ્ટિક દાણાની ગુણીઓ (120): (કિંમત ₹1,86,000/-), મોબાઈલ અને બિલ કાગળો મળી કુલ ₹38,39,000/- ની મતા કબજે કરી છે.
પોલીસે ટ્રક ચાલક મોહિત લક્ષ્મીકાંત તિવારી (રહે. ખંભાત, મૂળ ઉત્તર પ્રદેશ) ની ધરપકડ કરી છે. પ્રાથમિક પૂછપરછમાં આ દારૂનો જથ્થો ખંભાત તરફ લઈ જવામાં આવી રહ્યો હોવાનું ખુલ્યું છે. આ જથ્થો ભરી આપનાર અજાણ્યા શખ્સને વોન્ટેડ જાહેર કરી પારડી પોલીસ મથકે ગુનો દાખલ કરવામાં આવ્યો છે.
