International : ઈરાન અને ઈઝરાયલ વચ્ચે સંઘર્ષ વધુ તીવ્ર બન્યો

ઈરાન અને ઈઝરાયલ વચ્ચે સંઘર્ષ વધુ તીવ્ર બન્યો છે. ઈઝરાયલે ‘ઓપરેશન રાઇઝિંગ લાયન’ હેઠળ ઈરાન પર હુમલો કર્યો, જેમાં છ વૈજ્ઞાનિકો અને અનેક ટોચના લશ્કરી કમાન્ડર માર્યા ગયા. હુમલામાં અત્યાર સુધીમાં 78 લોકો માર્યા ગયા છે અને 350થી વધુ ઘાયલ થયા છે. ઈઝરાયલે આ હુમલામાં ઈરાનના મુખ્ય પરમાણુ પ્લાન્ટનો ઉપરનો ભાગ નાશ કર્યો હતો. મળતી માહિતી મુજબ ઇઝરાયલી હુમલામાં ઇરાનના રિવોલ્યુશનરી ગાર્ડ્સના વડા હુસૈન સલામી, ઇરાની આર્મી ચીફ ઓફ સ્ટાફ મોહમ્મદ બાઘેરી, ઇરાનના સુપ્રીમ લીડર આયતુલ્લાહ અલી ખામેનીના નજીકના સહાયક અલી શામખાની અને આઇઆરજીસી એરફોર્સ કમાન્ડર અમીર અલી હાજીઝાદેહ જેવા ટોચના અધિકારીઓ માર્યા ગયા હતા. ઇઝરાયલી વડા પ્રધાન બેન્જામિન નેતન્યાહૂએ કહ્યું કે જ્યાં સુધી ઇઝરાયલની સુરક્ષા સુનિશ્ચિત ન થાય ત્યાં સુધી આ કાર્યવાહી ચાલુ રહેશે.ઇરાને આ હુમલાનો જોરદાર જવાબ આપ્યો અને આ કાર્યવાહીને ‘ટ્રુ પ્રોમિસ થ્રી’ નામ આપ્યું. ઇરાને દાવો કર્યો છે કે તેણે ઇઝરાયલ પર 100થી વધુ મિસાઇલો છોડી છે. આ હુમલામાં ઘણા નાગરિકો ઘાયલ થયા છે.આ ગંભીર પરિસ્થિતિ વચ્ચે ઇઝરાયલી વડા પ્રધાન બેન્જામિન નેતન્યાહૂએ ભારતના વડા પ્રધાન નરેન્દ્ર મોદી સાથે ફોન પર વાત કરી અને તેમને વર્તમાન પરિસ્થિતિ વિશે માહિતી આપી. તે જ સમયે, યુએસ પ્રમુખ ડોનાલ્ડ ટ્રમ્પે ઇરાનને ધમકી આપી છે કે જો તે પરમાણુ કરાર પર હસ્તાક્ષર નહીં કરે, તો મોટો હુમલો કરવામાં આવશે.