ગુજરાત રાજ્યના હવામાન વિભાગ દ્વારા આગામી દિવસો માટે મહત્વની આગાહી કરવામાં આવી છે. રાજ્યમાં હાલ બેવડી ઋતુની અસર જોવા મળી રહી છે, જેમાં વહેલી સવારે ઠંડી અને બપોરના સમયે ગરમીનો અહેસાસ થઈ રહ્યો છે. હવામાન વિભાગના જણાવ્યા અનુસાર, ઉત્તર-પશ્ચિમી પવનો ફૂંકાવાનું શરૂ થતા રાજ્યમાં ઠંડીનું જોર વધશે. આગામી દિવસોમાં પવનની ગતિ 15 થી 20 કિલોમીટર પ્રતિ કલાક રહેવાની શક્યતા છે, જેના કારણે વાતાવરણમાં ઠંડક પ્રસરાશે અને લોકોને વહેલી સવારે તેમજ રાત્રે કડકડતી ઠંડીનો અનુભવ થશે.
તાપમાનના આંકડાઓ પર નજર કરીએ તો, આગામી સમયમાં લઘુતમ તાપમાન 14 થી 15 ડિગ્રીની આસપાસ રહેવાની ધારણા છે, જ્યારે દિવસ દરમિયાન મહત્તમ તાપમાન 30 થી 32 ડિગ્રી સુધી પહોંચી શકે છે. આ તાપમાનના મોટા તફાવતને કારણે બેવડી ઋતુની અસર યથાવત રહેશે. ખાસ કરીને પવનની ગતિમાં વધારો થતા ઠંડીના ચમકારામાં વધારો થશે. નિષ્ણાતોના મતે, આ બદલાતા વાતાવરણમાં સ્વાસ્થ્યનું ધ્યાન રાખવું અત્યંત જરૂરી છે, કારણ કે મિક્સ ઋતુને કારણે વાયરલ ઇન્ફેક્શનના કેસોમાં પણ વધારો થઈ શકે છે.
