અમેરિકાના વોશિંગ્ટન રાજ્યમાં સતત વરસી રહેલા ભયંકર વરસાદને કારણે પરિસ્થિતિ વિકટ બની ગઈ છે. સ્કાગિટ નદી ખતરનાક સ્તરે પહોંચતા 78,000 થી વધુ લોકોને તાત્કાલિક સ્થળાંતર કરવાનો આદેશ આપવામાં આવ્યો છે. ગવર્નરે આગામી દિવસોને “ઘાતક અને ઐતિહાસિક” ગણાવ્યા છે.
વોશિંગ્ટનમાં દિવસો સુધી ચાલેલા માવઠાએ અનેક શહેરોને પાણીમાં ગરકાવ કરી દીધા છે. ભારે વરસાદથી નદીઓનું સ્તર હદથી વધુ વધી ગયું છે, ભૂસ્ખલન શરૂ થયું છે અને અનેક હાઇવે પૂરેપૂરા બંધ થઈ ગયા છે. હજારો લોકો પોતાના ઘરોમાં અડકાયેલા હોવાથી રાહત કાર્ય સતત ચાલુ છે. રાજ્યના ગવર્નર બોબ ફર્ગ્યુસને તાકીદની સ્થિતિ જાહેર કરતાં કહ્યું કે હાલનું પૂર “ઐતિહાસિક સ્તર” સુધી પહોંચે તેવી સંપૂર્ણ શક્યતા છે.
સ્કાગિટ કાઉન્ટી, જે વોશિંગ્ટનનું મુખ્ય કૃષિ ક્ષેત્ર છે, ત્યાં વહીવટી તંત્રએ સ્કાગિટ નદીના પૂરના આખા વિસ્તારને ખાલી કરવાનો આદેશ આપ્યો છે. અહીં આશરે 78,000 લોકો રહે છે. અધિકારીઓનું કહેવું છે કે જો નદી રેકોર્ડ સ્તર પાર કરે છે તો વિનાશક પૂર અટકાવવું શક્ય નહીં રહે. કેનેડિયન સરહદ પાસે આવેલા સુમાસ શહેરમાં અનેક પરિવારોને અગ્નિશામક દળે પૂરમાં ફસાયેલા ઘરોમાંથી બચાવ્યા છે.
ઓછામાં ઓછા એક જ દિવસમાં 6 ઇંચથી વધુ વરસાદ પડ્યો છે, જેને કારણે અનેક જગ્યાએ પરિસ્થિતિ કાબૂ બહાર થઈ ગઈ છે. ઇન્ટરસ્ટેટ–90 પર ભૂસ્ખલનથી માર્ગ પર કાદવ, ઝાડો અને ખડકો સરકી પડ્યા છે, જેના કારણે હાઇવે સંપૂર્ણ બંધ કરવો પડ્યો. US–2 હાઇવે પણ ભારે કાટમાળને કારણે બંધ છે.
સિએટલ–વાનકુવર વચ્ચેની એમટ્રેક ટ્રેન સેવા રદ કરી દેવામાં આવી છે, જ્યારે 11,000 થી વધુ ઘરોમાં વીજ પુરવઠો અટકી ગયો છે. સિએટલની સ્કાયકોમિશ નદી 24 ફૂટના સ્તરે પહોંચી ગઈ છે, જે 2006 પછીનો સૌથી ઊંચો સ્તર છે. સ્કાગિટ નદી શુક્રવારે 39 ફૂટ સુધી પહોંચવાની શક્યતા છે, જેને “રેકોર્ડ પૂરની ચેતવણી” કહેવામાં આવે છે. માઉન્ટ વર્નોન શહેરમાં પૂરપ્રવાહ વધતો જ રહ્યો છે અને અધિકારીઓને ડર છે કે નદીનું પાણી 2018ની પૂરની દિવાલને પણ પાર કરી શકે છે.
હવામાન વિભાગના જણાવ્યા મુજબ, હાલનો ભારે વરસાદ “Atmospheric River” એટલે કે સમુદ્રમાંથી સીધો ભેજનો વિશાળ પટ્ટો વોશિંગ્ટન તરફ વહેતો હોવાથી પડી રહ્યો છે. સૌથી ચિંતાજનક બાબત એ છે કે રવિવારથી એક નવું તીવ્ર વાવાઝોડું સિસ્ટમ રાજ્યને ટકરાવવાની શક્યતા છે, જેથી પરિસ્થિતિ વધુ ખરાબ થઈ શકે છે.
