બોલિવૂડમાં પોતાની કોમેડીથી કરોડો લોકોને હસાવનાર અભિનેતા રાજપાલ યાદવ હાલમાં તિહાર જેલમાં મુશ્કેલ સમય વિતાવી રહ્યા છે. આજે, 12 ફેબ્રુઆરીએ તેમની જામીન અરજી પર સુનાવણી થવાની છે, ત્યારે સોશિયલ મીડિયા પર તેમનો અને વૃંદાવનના સંત પ્રેમાનંદ મહારાજ વચ્ચેની મુલાકાતનો બે મહિના જૂનો વીડિયો વાયરલ થયો છે. આ વીડિયો જોયા બાદ લોકો કહી રહ્યા છે કે મહારાજજીએ કદાચ રાજપાલ યાદવ પર આવનારી મુસીબતને પારખી લીધી હતી.
ડિસેમ્બર 2025માં રાજપાલ યાદવ આશીર્વાદ લેવા વૃંદાવન પહોંચ્યા હતા. વીડિયોમાં રાજપાલ યાદવ ખૂબ જ વિનમ્રતાથી મહારાજ પાસે જાય છે. મહારાજ જ્યારે તેમની તબિયત પૂછે છે, ત્યારે રાજપાલ કહે છે, “હું આજે ઠીક છું.” આ ટૂંકો સંવાદ આજે ઘણા સંકેતો આપી રહ્યો છે. વાતચીત દરમિયાન રાજપાલ યાદવે તેમના સ્વર્ગસ્થ ગુરુ પંડિત દેવ પ્રભાકર જી શાસ્ત્રી અને તેમના દ્વારા કરાયેલા ધાર્મિક કાર્યોનો પણ ઉલ્લેખ કર્યો હતો.
વીડિયોમાં સૌથી મહત્વનો અંશ પ્રેમાનંદ મહારાજ દ્વારા આપવામાં આવેલી જીવનની શિખામણ છે. તેમણે રાજપાલ યાદવને કહ્યું હતું કે, “જીવનમાં ગમે ત્યારે પ્રતિકૂળતા, દુઃખ કે પ્રિયજનોથી અલગ થવાનો સમય આવી શકે છે. આર્થિક સમસ્યાઓ કે કાયદાકીય ગૂંચવણોમાં જ્યારે દુનિયા સાથ છોડી દે, ત્યારે માત્ર ભગવાનનું નામ જ તમને બચાવી શકે છે.” મહારાજે વધુમાં ઉમેર્યું હતું કે, લોકો સારા સમયમાં તમારી સાથે હાથ મિલાવશે, પણ જેવો ખરાબ સમય આવશે તેઓ તમારી સાથે ઉભા રહેતા પણ ડરશે. તેથી, હંમેશા ઈશ્વરનું સ્મરણ કરતા રહો અને ગમે તેવી મોટી મુશ્કેલી આવે તો પણ ક્યારેય હાર ન માનો.
રાજપાલ યાદવના ચાહકો અને ઉદ્યોગ જગતના સાથીઓ અત્યારે તેમના માટે પ્રાર્થના કરી રહ્યા છે. જેલવાસના આ કપરા સમયમાં પ્રેમાનંદ મહારાજની આ સલાહ તેમના માટે માનસિક બળ સાબિત થઈ રહી હોય તેમ લાગે છે. હવે સૌની નજર આજની કોર્ટની સુનાવણી પર ટકેલી છે કે શું અભિનેતાને જેલની દિવાલોમાંથી મુક્તિ મળે છે કે નહીં.
