આજના ટેકનોલોજીના યુગમાં આર્ટિફિશિયલ ઇન્ટેલિજન્સ (AI) માત્ર પ્રશ્નોના જવાબ આપવા પૂરતું મર્યાદિત નથી રહ્યું, પરંતુ તે હવે સંપત્તિ સર્જનનું એક શક્તિશાળી સાધન બની ગયું છે. તાજેતરમાં સોશિયલ મીડિયા પ્લેટફોર્મ ‘X’ પર એક રોમાંચક કિસ્સો વાયરલ થયો છે, જેમાં એક AI એજન્ટે માત્ર થોડા કલાકોમાં એક વેપારીના ₹11 લાખને ₹40 લાખમાં ફેરવી નાખ્યા.
આ બધું ત્યારે શરૂ થયું જ્યારે એક વેપારી શાંતિથી સૂતો હતો. સવારે આશરે 3.47 વાગ્યે તેના ફોનમાં એક એલર્ટ આવ્યું. આ એલર્ટ ‘OpenClaw’ નામના એક અદ્યતન AI ટ્રેડિંગ બોટ દ્વારા મોકલવામાં આવ્યું હતું. બોટે સૂચવ્યું કે અત્યારે માર્કેટમાં અંદાજે $12000 (₹11 લાખ)નું રોકાણ કરવા માટે એક સુવર્ણ તક છે. વેપારીએ અર્ધજાગૃત અવસ્થામાં જ આ ટ્રેડને મંજૂરી આપી અને ફરી સૂઈ ગયો.
આ AI સિસ્ટમ ખાસ કરીને ‘પોલીમાર્કેટ’ જેવા આગાહી બજાર (Prediction ) માટે બનાવવામાં આવી હતી. તેનું મુખ્ય કામ વિશ્વભરના ડેટા સ્ત્રોતોને સેકન્ડોમાં સ્કેન કરવાનું હતું. તે જાપાની સરકારી ફીડ્સ, યુરોપિયન સંસદના લાઈવ સ્ટ્રીમ્સ, ફ્લાઈટ ટ્રેકિંગ ડેટા અને સેન્ટ્રલ બેંકોની જાહેરાતો પર સતત નજર રાખી રહ્યું હતું.
આ વ્યૂહરચના ‘ટાઈમ-ઝોન આર્બિટ્રેજ’ પર આધારિત હતી. એટલે કે, દુનિયાના એક ખૂણે બનેલી ઘટનાની અસર બીજા દેશના બજારમાં પહોંચે તે પહેલાં જ AI તે માહિતી મેળવી લેતું હતું. જ્યારે બજારને સમાચારની ખબર પડે અને કિંમતો બદલાય, તે પહેલાં જ AI એ સસ્તું ખરીદીને મોંઘા ભાવે વેચવાની પ્રક્રિયા પૂર્ણ કરી લીધી હતી.
સવારે જ્યારે વેપારી જાગ્યો ત્યારે તેના ખાતામાં $43,800 (અંદાજે ₹૪૦ લાખ)નો નફો જમા થઈ ચૂક્યો હતો. આ ઘટનાએ ઇન્ટરનેટ પર ભારે ચર્ચા જગાવી છે. નિષ્ણાતો માને છે કે ક્રિપ્ટો અને AIનું આ મિશ્રણ ભવિષ્યમાં ટ્રેડિંગની દુનિયાને સંપૂર્ણપણે બદલી નાખશે. જોકે, ઘણા લોકો આમાં રહેલા જોખમો વિશે પણ સાવધ કરી રહ્યા છે, કારણ કે હાઈ-સ્પીડ ટ્રેડિંગમાં જેટલો ઝડપી નફો છે, એટલું જ મોટું નુકસાન થવાની સંભાવના પણ રહેલી છે.
