આઈઆઈટી બોમ્બેના સેકન્ડ યરના વિદ્યાર્થીએ શુક્રવાર સાંજે આત્મહત્યા કરી લીધી. તે એનર્જી સાયન્સ એન્ડ એન્જિનિયરિંગ વિભાગમાં અભ્યાસ કરતો હતો.
આ પહેલાં, તે દિવસે પરીક્ષા દરમિયાન મોબાઈલ ફોનનો ઉપયોગ કરતાં ઝડપાયો હતો. આઈઆઈટી બોમ્બે અનુસાર, તેણે પ્રશ્નપત્ર ChatGPT પર અપલોડ કર્યું હતું. આ મામલે વિદ્યાર્થી સામે કોઈ કાર્યવાહી કરવામાં આવી નહોતી.
પોલીસના જણાવ્યા અનુસાર, પરીક્ષા સાંજે 4 વાગ્યે પૂરી થઈ, ત્યારબાદ વિદ્યાર્થી પોતાના રૂમમાં ગયો. સાંજે તે પોતાના હોસ્ટેલના રૂમમાં ફાંસો લગાવેલી હાલતમાં મળી આવ્યો. મૃતદેહને પોસ્ટમોર્ટમ માટે રાજાવાડી હોસ્પિટલ મોકલવામાં આવ્યો છે. 7 મહિનામાં આઈઆઈટી બોમ્બેના કેમ્પસમાં આત્મહત્યાનો આ ત્રીજો કેસ છે. આત્મહત્યાના સમાચાર મળતાં જ વિદ્યાર્થીઓએ કોલેજ કેમ્પસમાં વિરોધ પ્રદર્શન શરૂ કરી દીધું.
IIT બોમ્બેમાં સ્ટુડન્ટ વેલનેસ સેન્ટર ઉપલબ્ધ
IIT બોમ્બેમાં વિદ્યાર્થીઓના માનસિક તણાવને દૂર કરવા માટે સ્ટુડન્ટ વેલનેસ સેન્ટર (SWC) ઉપલબ્ધ છે. અહીં વિદ્યાર્થીઓ પર્સનલ કાઉન્સેલિંગ અને તણાવનો સામનો કરવામાં મદદ મેળવી શકે છે. તેના માટે wellness@iitb.ac.in પર ઇમેઇલ અથવા 022-2576-9070 પર ફોન કરીને સમય લઈ શકાય છે.
જો કોઈ વિદ્યાર્થી વાતવાતમાં ચીડિયા સ્વભાવવાળો થઈ રહ્યો હોય, અભ્યાસ છોડી રહ્યો હોય, પોતાને રૂમમાં બંધ રાખતો હોય, ઓછું ખાતો-સૂતો હોય અથવા હંમેશાં નિરાશાભરી વાતો કરતો હોય, તો આ ભારે માનસિક તણાવની નિશાની છે.
