Kuwaiti Tanker Hit by Missile : મિડલ ઈસ્ટના અત્યંત મહત્વપૂર્ણ અને વ્યૂહાત્મક ગણાતા હોર્મુઝની સામુદ્રધુની (Strait of Hormuz) માં વધુ એક તેલ ટેન્કર હુમલાનો ભોગ બન્યું છે. કુવૈતી ધ્વજ ધરાવતા ‘M/T અલ દાસ્મા’ (M/T Al Dasma) નામના તેલ ટેન્કર પર અજાણ્યા સ્થળેથી એક ભીષણ મિસાઇલ પ્રહાર કરવામાં આવ્યો હતો. આ ઘટના સમયે જહાજ પર ૨૧ ભારતીય ક્રૂ મેમ્બર્સ સવાર હતા. હુમલા બાદ જહાજમાં આગ લાગી ગઈ હતી અને તેને ભારે નુકસાન પહોંચ્યું હતું, પરંતુ રાહતના સમાચાર એ છે કે તમામ ૨૧ ભારતીય નાગરિકોને સુરક્ષિત રીતે બચાવી લેવામાં આવ્યા છે.
જહાજ પર સવાર હતા 21 ભારતીય
કેન્દ્રીય બંદરો, શિપિંગ અને જળમાર્ગ મંત્રી સર્વાનંદ સોનોવાલે સોશિયલ મીડિયા પર આ હુમલાની પુષ્ટિ કરતા તમામ ભારતીયોની સલામતી અંગે દેશવાસીઓને આશ્વાસન આપ્યું હતું. ‘યુકે મેરીટાઇમ ટ્રેડ ઓપરેશન્સ’ (UKMTO) ના અહેવાલ મુજબ, આ ઘટના ૨૧ ઓક્ટોબરે પર્સિયન ગલ્ફને ઓમાનના અખાત સાથે જોડતા સાંકડા માર્ગમાં ઘટી હતી. હુમલાગ્રસ્ત જહાજ ઓમાનના બુખા વિસ્તારથી આશરે ૧૧ નોટિકલ માઇલ પશ્ચિમે દક્ષિણ કિનારા પર લંગરાયેલી સ્થિતિમાં મળી આવ્યું હતું. આ હુમલો કઈ તરફથી અને કોણે કર્યો તે અંગે હજુ સુધી કોઈ સત્તાવાર પુષ્ટિ થઈ નથી. ભારત સરકાર શિપિંગ મેનેજમેન્ટ કંપનીના સંપર્કમાં રહીને સ્થિતિ પર સતત નજર રાખી રહી છે.
દરિયાઈ સુરક્ષા અંગે ભારતની વધતી ચિંતા
વિદેશ મંત્રાલયના જણાવ્યા અનુસાર, છેલ્લા 10 દિવસમાં હોર્મુઝની સામુદ્રધુનીમાં ભારતીય નાગરિકો ધરાવતા જહાજ પર થયેલો આ બીજો મોટો હુમલો છે. આ પહેલાં સોહર એન્કોરેજ નજીક ‘એમટી પેટ્રો ડોલ્ફિન’ નામના જહાજ પર ડ્રોન હુમલો થયો હતો, જેમાં સવાર 11 ભારતીય ખલાસીઓને પણ સલામત ઉગારી લેવાયા હતા. આ સિવાય અન્ય એક જહાજ હુમલામાં ડૂબી જતાં તેના કન્ટેનરો સમુદ્રી માર્ગમાં વહી ગયા હતા.
વારંવાર બની રહેલી આવી ભયાનક ઘટનાઓને કારણે ભારતે આંતરરાષ્ટ્રીય જળમાર્ગો પર વાણિજ્યિક જહાજો અને ખલાસીઓની સુરક્ષા અંગે ગંભીર ચિંતા વ્યક્ત કરી છે. ભારત સરકારે વિશ્વભરના આંતરરાષ્ટ્રીય વેપાર માટે અત્યંત મહત્વના એવા હોર્મુઝ સામુદ્રધુની ક્ષેત્રમાં સુરક્ષિત દરિયાઈ વહન સુનિશ્ચિત કરવા અને ખાડી દેશોને પરસ્પર સહયોગ વધારવા ભારપૂર્વક અપીલ કરી છે.
