EDએ વર્ષ 2025-26માં ઇતિહાસમાં સૌથી વધુ દરોડા પાડ્યા. એજન્સીએ કુલ 2,892 દરોડા પાડ્યા, જે ગયા વર્ષના 1,491ની સરખામણીમાં લગભગ બમણા છે.
EDના વાર્ષિક અહેવાલ 2025-26 મુજબ મની લોન્ડરિંગ હેઠળની ધરપકડોમાં ઘટાડો થયો. જ્યારે સંપત્તિ જપ્તી અને પીડિતોને પૈસા પરત કરવાના કેસોમાં રેકોર્ડ વધારો નોંધાયો.EDએ 712 કામચલાઉ જપ્તી આદેશો જારી કરીને 81,422 કરોડ રૂપિયાની સંપત્તિ જપ્ત કરી. આ ગયા વર્ષના 30,036 કરોડ રૂપિયાની સરખામણીમાં 171% વધુ છે. આ જપ્તી PMLAની એડજુડિકેટિંગ ઓથોરિટી દ્વારા પુષ્ટિ થયા પછી કાયમી બને છે.
EDની ધરપકડોમાં લગભગ 27%નો ઘટાડો થયો છે. EDએ 156 લોકોની ધરપકડ કરી, જ્યારે ગયા વર્ષે આ સંખ્યા 214 અને તે પહેલાં 272 હતી. એજન્સીના મતે, હવે તે લક્ષિત અને પુરાવા આધારિત તપાસ પર વધુ ધ્યાન કેન્દ્રિત કરી રહી છે.
રિપોર્ટની સૌથી મોટી સિદ્ધિ ફ્રોડ પીડિતોને સંપત્તિ પરત કરવી રહી. FY26માં EDએ 32,678 કરોડ રૂપિયાની સંપત્તિ રોકાણકારો, હોમબાયર્સ અને બેંકોને પરત અપાવી, જે ગયા વર્ષે 15,263 કરોડ રૂપિયા હતી. આમાં PACL પોન્ઝી સ્કેમ કેસનો મોટો ફાળો રહ્યો, જ્યાં એકલા 15,582 કરોડ રૂપિયા પરત કરવામાં આવ્યા.
કેસ રજીસ્ટ્રેશન 39% વધીને 1,080 થયા છે. જ્યારે આ વર્ષે 812 ચાર્જશીટ દાખલ કરવામાં આવી જે ગયા વર્ષે 457 હતી. એજન્સીનો દાવો છે કે હવે કેસની તપાસ અવધિ 3-4 વર્ષથી ઘટીને 1-1.5 વર્ષ થઈ ગઈ છે.
મની લોન્ડરિંગ તપાસમાં આંતરરાષ્ટ્રીય સહયોગ પણ વધ્યો છે. જ્યારે ભારતને વિદેશોમાંથી 246 વિનંતીઓ મળી છે, જેમાં સૌથી વધુ UK (79) તરફથી છે. 31 માર્ચ 2026 સુધીમાં 353 MLAT/LR વિનંતીઓ પેન્ડિંગ છે, જેમાં સૌથી વધુ:
UAE: 69
સિંગાપોર: 55
UK: 39
હોંગકોંગ: 36
અમેરિકા: 26
પ્રિવેન્શન ઓફ મની લોન્ડરિંગ એક્ટ (PMLA) હેઠળ EDને ધરપકડ, તપાસ, જપ્તી અને સંપત્તિ જપ્ત કરવાના વ્યાપક અધિકારો છે. આ કાયદા હેઠળ જામીન મળવા પણ મુશ્કેલ હોય છે.
