નવસારી શહેરના છાપરા રોડ પર રવિવારે એક ચોંકાવનારી ઘટના સામે આવી છે, જેમાં એક વેગનઆર કારચાલકે મોપેડ સવાર યુવકને જોરદાર ટક્કર મારી હતી. અકસ્માત એટલો ભયાનક હતો કે યુવક રોડ પર પટકાયો હતો, પરંતુ નવાઈની વાત એ છે કે મદદ કરવાને બદલે કારચાલકે યુવક સાથે મારામારી કરી લૂંટ ચલાવી હોવાનો આક્ષેપ થયો છે.

ઘટનાની મળતી માહિતી અનુસાર, છાપરા રોડ પરથી પસાર થઈ રહેલી વેગનઆર કારના ચાલક સાથે વળાંકમાં અચાનક મોપેડે ટક્કર મારી હતી. ટક્કર વાગતા જ યુવક હવામાં ફંગોળાઈને રોડ પર પટકાયો હતો. સદનસીબે, કારનું પાછળનું ટાયર યુવકના માથા પરથી પસાર થતા રહી ગયું હતું, જેના કારણે તેનો આબાદ બચાવ થયો હતો. જોકે, પડવાને કારણે તેને માથા અને શરીરના અન્ય ભાગોમાં ગંભીર ઇજાઓ પહોંચી હતી.

સામાન્ય રીતે અકસ્માત બાદ લોકો મદદ માટે દોડતા હોય છે, પરંતુ અહીં કારચાલકે ઉદ્ધતાઈની હદ વટાવી દીધી હતી. ઇજાગ્રસ્ત યુવકને હોસ્પિટલ પહોંચાડવાને બદલે કારચાલકે તેની સાથે મારપીટ શરૂ કરી દીધી હતી. આટલું જ નહીં, યુવકનું પર્સ અને મોબાઈલ ફોન પણ ઝૂંટવી લીધા હોવાના ગંભીર આક્ષેપો કરવામાં આવ્યા છે.

સમગ્ર અકસ્માત અને ત્યારબાદ થયેલી ઝપાઝપીની ઘટના નજીકના સીસીટીવી કેમેરામાં કેદ થઈ ગઈ છે. આ વીડિયો હાલ સોશિયલ મીડિયા પર વાયુવેગે વાયરલ થઈ રહ્યો છે, જેને જોઈને સ્થાનિકોમાં ભારે રોષ જોવા મળી રહ્યો છે. પોલીસે આ મામલે વાયરલ વીડિયોના આધારે તપાસના ચક્રો ગતિમાન કર્યા છે.

ભરૂચમાં વ્યાજખોરોનો મારામારીનો વીડિયો વાયરલ વાયરલ થયો છે, જેમાં વેપારીની દુકાનમાં આવીને વ્યાજખોરોએ માર માર્યો હોવાની વાત સામે આવી છે. પોલીસમાં આ મામલે અરજી થઈ હોવાની વાત છે.

ભરૂચમાં વ્યાજખોરોએ વેપારીને માર માર્યો હોવાની વાત સામે આવી છે, હુમલાનો વીડિયો સોશિયલ મીડિયામાં વાયરલ થયો છે, અને પૈસાની ઉઘરાણીમાં વેપારી સાથે મારામારી થઈ છે, વેપારીનું કહેવું છે કે, વ્યાજખોરોએ 3 લાખ સામે 18 લાખ પડાવ્યા છે અને અજય શાહ વિરુદ્ધ પોલીસમાં અરજી કરાઈ છે.
ભરૂચમાં વ્યાજખોરોએ દુકાનમાં ઘુસી મારપીટ કરી હોવાનો વિડીયો વાયરલ થયો છે, રૂપિયાની ઉઘરાણી માટે વેપારી દિલીપ સુથારને ધમકી આપી હોવાનો આરોપ કરવામાં આવ્યો છે, 3 લાખ સામે 18 લાખ વસુલ્યા હોવાનો આરોપ વ્યાજખોરો સામે કરવામાં આવ્યો છે, વેપારીએ વ્યાજખોર અજય શાહ સામે સી ડિવિઝન પોલીસમાં અરજી આપી છે અને પોલીસે અરજીના આધારે તપાસ શરૂ કરી છે, વેપારીને વ્યાજખોરો અપશબ્દ પણ બોલ્યા હોવાની વાત સામે આવી છે.

રાજ્યમાં સતત વધી રહેલા માર્ગ અકસ્માતોની વચ્ચે એક અમરેલી જિલ્લાની સરકારી શાળાના વિદ્યાર્થીએ અનોખું અને પ્રેરણાદાયી સોલ્યુશન રજૂ કર્યું છે. જિલ્લાના પીઠવડી ગામની શાળામાં ધોરણ 7માં અભ્યાસ કરતો જેનીલ નામનો વિદ્યાર્થીએ ‘સ્માર્ટ હેલ્મેટ’ તૈયાર કર્યું છે, જે માર્ગ સલામતી માટે ઉપયોગી બની શકે તેવો દાવો કરવામાં આવી રહ્યો છે.

વિદ્યાર્થીના જણાવ્યાનુસાર, ગ્રામ્ય વિસ્તારોમાં મોટાભાગના લોકો બાઈક ચલાવતા સમયે હેલ્મેટ પહેરતા નથી, જેના કારણે અકસ્માતોમાં ગંભીર ઈજાઓ અને મોતની ઘટનાઓ વધી રહી છે. આ સ્થિતિને ધ્યાનમાં રાખીને વિદ્યાર્થી જેનીલે એવું સ્માર્ટ હેલ્મેટ તૈયાર કર્યું છે કે જો બાઈક ચાલક હેલ્મેટ ન પહેરે તો બાઈક સ્ટાર્ટ જ નહીં થાય.

આ સ્માર્ટ હેલ્મેટમાં સેન્સર આધારિત સિસ્ટમ લગાવવામાં આવી છે, જે હેલ્મેટ પહેરવામાં આવે ત્યારે જ બાઈકના ઈગ્નિશન સાથે જોડાય છે. ઉપરાંત, વિદ્યાર્થીએ પોતાના પ્રોજેક્ટમાં દારૂ પીને બાઈક ચલાવવાનું અટકાવવા માટે એલ્કોહોલ સેન્સર ઉમેરવાની કલ્પના પણ રજૂ કરી છે. જો ચાલક દારૂના નશામાં હોય તો બાઈક સ્ટાર્ટ નહીં થાય એવી વ્યવસ્થા કરવાની તેની યોજના છે. જો અકસ્માત થાય તો તરત જ 108 ઇમર્જન્સી સેવાને સીધો સંપર્ક થઈ શકે તેવી ટેક્નોલોજી ઉમેરવાનો વિચાર પણ વિદ્યાર્થીએ રજૂ કર્યો છે.

નાની ઉંમરે આટલું મોટું વિઝન ધરાવતા જેનીલનો આ પ્રોજેક્ટ હાલ સોશિયલ મીડિયા પર ખૂબ જ વાઈરલ થઈ રહ્યો છે. લોકો આ બાળ વૈજ્ઞાનિકની કોઠાસૂઝ અને ટેકનોલોજીના ઉપયોગના વખાણ કરી રહ્યા છે. જેનીલના મતે, જો આ ટેકનોલોજીનો વ્યાપક ઉપયોગ કરવામાં આવે, તો અકસ્માતમાં થતા મૃત્યુના દરમાં મોટો ઘટાડો લાવી શકાય તેમ છે.

અમરેલી જિલ્લામાં આરોગ્ય સાથે ચેડાં કરતા તત્ત્વો સામે તંત્રએ લાલ આંખ કરી છે. ખાંભા તાલુકાના ઈંગોરાળા ગામે નકલી દૂધનો શંકાસ્પદ જથ્થો ઝડપાતા સમગ્ર પંથકમાં ચકચાર મચી ગઈ છે. ફૂડ વિભાગ અને પોલીસે સંયુક્ત ઓપરેશન હાથ ધરી બે રહેણાક મકાનોમાં દરોડા પાડ્યા હતા.

મળતી માહિતી અનુસાર, ગત મોડી રાત્રે ખાંભા પોલીસ અને ફૂડ એન્ડ ડ્રગ્સ વિભાગની ટીમે બાતમીના આધારે ઈંગોરાળા ગામના બે મકાનોમાં સર્ચ ઓપરેશન હાથ ધર્યું હતું. આ દરોડા દરમિયાન મકાનમાંથી નકલી દૂધ બનાવવાનું નેટવર્ક મળી આવ્યું હતું. ઘટનાસ્થળેથી 220 લિટર શંકાસ્પદ દૂધનો જથ્થો, 200 કિલોથી વધુ દૂધ બનાવવાનો પાવડર અને મોટા પ્રમાણમાં વનસ્પતિ તેલ મળી આવ્યું હતું.

તંત્ર દ્વારા સ્થળ પરથી મળી આવેલા શંકાસ્પદ દૂધના જથ્થાનો તાત્કાલિક નાશ કરવામાં આવ્યો હતો. ફૂડ વિભાગે દૂધ, પાવડર અને તેલના નમૂના લઈ વધુ તપાસ માટે એફએસએલમાં મોકલી આપ્યા છે. આ પાવડર અને તેલના મિશ્રણથી દૂધ બનાવીને ક્યાં સપ્લાય કરવામાં આવતું હતું તે દિશામાં તપાસ તેજ કરવામાં આવી છે.

આ સમગ્ર મામલે ખાંભા પોલીસ મથક ખાતે હાલ જાણવાજોગ ફરિયાદ દાખલ કરવામાં આવી છે. એફએસએલનો રિપોર્ટ આવ્યા બાદ આ રેકેટમાં સંડોવાયેલા શખસો સામે કડક કાયદેસરની કાર્યવાહી કરવામાં આવશે. રહેણાક મકાનોમાં ચાલતા આ ગોરખધંધાના પર્દાફાશથી પંથકમાં દૂધના અન્ય વિક્રેતાઓમાં પણ ફફડાટ વ્યાપી ગયો છે.