દક્ષિણ આફ્રિકા, જિમ્બાબ્વે અને નામિબિયામાં યોજાનાર ક્રિકેટ વર્લ્ડ કપ 2027 પહેલા ભારતીય ટીમ પોતાની બેટિંગ અને બોલિંગમાં સતત સુધારો કરવા પર ધ્યાન આપી રહી છે. આ વચ્ચે ભારતીય ક્રિકેટના પૂર્વ વિસ્ફોટક ઓપનર વીરેન્દ્ર સેહવાગે 15 વર્ષીય યુવા બેટ્સમેન વૈભવ સૂર્યવંશીની આક્રમક બેટિંગ શૈલીની ભરપૂર પ્રશંસા કરી છે. સેહવાગનું માનવું છે કે વૈભવની બેટિંગ કરવાની રીત બિલકુલ તેમના જેવી જ છે, જે પહેલા જ 1-2 બોલથી બોલરો પર દબાણ બનાવવામાં માને છે.
પહેલા જ બોલથી મોટા શોટ્સ રમવાની વિચારસરણી
શનિવારે પીએચડી ચેમ્બર ઓફ કોમર્સ એન્ડ ઇન્ડસ્ટ્રીના વાર્ષિક સત્રમાં ચર્ચા દરમિયાન સેહવાગે વૈભવ વિશે વાત કરતા કહ્યું હતું કે, “સૂર્યવંશી હાલમાં પોતાના શાનદાર ફોર્મમાં છે અને તેની સોચ મારી જેવી જ છે. તે ક્રીઝ પર ઉતરતાની સાથે જ પહેલી જ બોલથી મોટા શોટ્સ રમવા વિશે વિચારે છે. હવે એ જોવાનું રહેશે કે તેને આગામી સમયમાં કેવા અને કેટલા અવસરો મળે છે.” વૈભવે અત્યાર સુધી ભારત માટે 8 ટી20 ઇન્ટરનેશનલ મેચોમાં 30.75 ની એવરેજથી 246 રન બનાવ્યા છે, જેમાં તેનો સ્ટ્રાઈક રેટ 186.36 નો શાનદાર રહ્યો છે.
‘ઉંમર પર ધ્યાન આપવાનો કોઈ મતલબ નથી’
વૈભવની નાની ઉંમરને લઈને થતી ચર્ચાઓ પર પ્રતિક્રિયા આપતા સેહવાગે સ્પષ્ટ શબ્દોમાં કહ્યું કે એજ-ગ્રુપના ટૂર્નામેન્ટમાં ઉંમરના નિયમો યોગ્ય છે, પરંતુ જ્યારે કોઈ ખેલાડી આઈપીએલ કે ઇન્ટરનેશનલ સ્તરે પહોંચી જાય છે ત્યારે તેની ઉંમર નહીં પરંતુ તેનું પ્રદર્શન જ સર્વોપરી બને છે. તેમણે વિરાટ કોહલી અને વૈભવનું ઉદાહરણ આપતા કહ્યું કે, 38 વર્ષીય કોહલી પણ રમી રહ્યો છે અને 15 વર્ષીય વૈભવ પણ રમી રહ્યો છે, તેથી માત્ર પ્રદર્શન જ મહત્ત્વનું છે.
વર્લ્ડ કપ 2027 અને જસપ્રીત બુમરાહ અંગે પણ કરી વાત
આગામી વર્લ્ડ કપ 2027 ની તૈયારીઓ પર બોલતા સેહવાગે જણાવ્યું હતું કે ભારતીય ટીમનું બોલિંગ આક્રમણ ખાસ કરીને જસપ્રિત બુમરાહની હાજરીથી ખૂબ મજબૂત બને છે. જો ટીમનું બોલિંગ આક્રમણ આવું જ જળવાઈ રહેશે તો ભારત સરળતાથી ખિતાબ જીતી શકે છે. બીજી તરફ, પૂર્વ ઓલરાઉન્ડર રોબિન સિંહે પણ વૈભવની પ્રતિભાને આવકારી હતી પરંતુ સાથે જ સલાહ આપી હતી કે ટીમમાં જગ્યા બનાવવા માટે તેણે થોડો સમય ધીરજ રાખીને પોતાની વારાની રાહ જોવી પડશે.
