વડોદરાના વાડી વિસ્તારમાં ટ્રાફિક બ્રિગેડની યુવતીએ કાળઝાળ ગરમીમાં દિવ્યાંગ યુવકની વ્હીલચેરને ધક્કો મારી બ્રિજ ચડાવવામાં મદદ કરી છે. રોડ પર ચાલતા વાહનચાલકો અભિભૂત થયા હતા.
સંસ્કારી નગરી વડોદરામાં ખાખી વર્દી પાછળ છુપાયેલી સંવેદના અને માનવતાનો એક અનોખો કિસ્સો સામે આવ્યો છે. વાડી વિસ્તારમાં ફરજ બજાવતી એક ટ્રાફિક બ્રિગેડની યુવતીએ કાળઝાળ ગરમીમાં એક દિવ્યાંગ યુવકની વ્હીલચેરને ધક્કો મારી બ્રિજ ચડાવવામાં મદદ કરી હતી. આ હૃદયસ્પર્શી દ્રશ્ય જોઈ રસ્તા પરથી પસાર થતા અન્ય વાહન ચાલકો પણ અભિભૂત થઈ ગયા હતા.
વડોદરાના વાડી વિસ્તારમાં ભારે ટ્રાફિક અને કાળઝાળ ગરમી વચ્ચે એક દિવ્યાંગ યુવક પોતાની વ્હીલચેર પર બ્રિજ ચડવાનો પ્રયાસ કરી રહ્યો હતો. ઢાળ વધારે હોવાને કારણે યુવકને વ્હીલચેર ચડાવવામાં ભારે મુશ્કેલી પડી રહી હતી. આ સમયે ત્યાં ફરજ પર તૈનાત ટ્રાફિક બ્રિગેડની એક મહિલા કર્મીની નજર તેના પર પડી હતી.
પોતાની ફરજની સાથે સાથે માનવધર્મને પ્રાધાન્ય આપી આ મહિલા કર્મી તુરંત જ દિવ્યાંગ યુવકની મદદે દોડી ગઈ હતી. ધોમધખતા તાપમાં પરસેવે રેબઝેબ થવા છતાં તેણે વ્હીલચેરને પાછળથી ધક્કો મારીને આખો બ્રિજ ચડાવ્યો હતો. આ દ્રશ્ય એટલું પ્રભાવશાળી હતું કે, હાઇવે પરથી પસાર થતા અન્ય વાહન ચાલકો પણ થોડીવાર માટે થંભી ગયા હતા અને આ કામગીરીને બિરદાવી હતી.
સોશિયલ મીડિયામાં પણ આ ઘટનાના ફોટા અને વીડિયો વાયરલ થતા લોકો ટ્રાફિક બ્રિગેડની આ મહિલાના કાર્યની મુક્ત કંઠે પ્રશંસા કરી રહ્યા છે. લોકોનું કહેવું છે કે, પોલીસ કે ટ્રાફિક બ્રિગેડ માત્ર દંડ વસૂલવા માટે જ નહીં, પરંતુ આવી રીતે જનતાની સેવામાં પણ સદાય તત્પર હોય છે. આ ઘટનાએ સાબિત કર્યું છે કે માનવતા હજુ પણ જીવંત છે.
