ઈરાન પર ઇઝરાઇલ અને અમેરિકાના સંયુક્ત સૈન્ય હુમલાને 20 દિવસ વીતી ગયા છે. ઈરાનમાં ચાલી રહેલા યુદ્ધ વચ્ચે વિશ્વમાં ઊર્જા સંકટ જેવી સ્થિતિ ઊભી થઈ છે.ઈરાને હોર્મુઝ જળમાર્ગ બંધ કરી દીધો છે, જ્યાંથી વિશ્વના લગભગ 20 ટકા ઊર્જા આયાત-નિકાસ થાય છે. આ પરિસ્થિતિને કારણે ભારતના ઘણા શહેરોમાં LPG સિલિન્ડરને લઈને ભય અને ગભરાટનો માહોલ જોવા મળી રહ્યો છે.
આ પરિસ્થિતિ વચ્ચે ભારત સરકારે કૂટનીતિક સ્તરે પોતાની સક્રિયતા વધારી છે. નરેન્દ્ર મોદીની મિડલ ઈસ્ટ ડિપ્લોમેસીનો અંદાજ એ વાતથી લગાવી શકાય છે કે તેમણે એક જ દિવસે પાંચ દેશોના ટોચના નેતાઓ સાથે ફોન પર વાતચીત કરી.ઈરાન યુદ્ધ વચ્ચે પ્રધાનમંત્રી મોદીએ કતાર, ફ્રાન્સ, જોર્ડન, ઓમાન અને મલેશિયાના નેતાઓ સાથે ચર્ચા કરી. તેમણે પશ્ચિમ એશિયામાં ઊભી થયેલી પરિસ્થિતિ પર ચિંતા વ્યક્ત કરી અને એનર્જી ઈન્ફ્રાસ્ટ્રક્ચર પર થયેલા હુમલાની કડક નિંદા કરી.
પ્રધાનમંત્રી મોદીએ અલગ-અલગ ટેલિફોનિક વાતચીતમાં પ્રદેશમાં જલ્દી શાંતિ, સુરક્ષા અને સ્થિરતા સ્થાપિત કરવા માટે સંવાદ અને કૂટનીતિની જરૂરિયાત પર ભાર મૂક્યો. તેમણે હોર્મુઝ જળમાર્ગમાં સુરક્ષિત અને મુક્ત અવરજવર જાળવી રાખવાની પણ જરૂરિયાત જણાવી.તેમણે સોશિયલ મીડિયા પ્લેટફોર્મ X પર માહિતી શેર કરતાં જણાવ્યું કે તેમણે કતારના અમીર શેખ તમીમ બિન હમદ અલ થાની સાથે વાત કરી અને તેમને તથા કતારની જનતાને ઈદની શુભેચ્છા પાઠવી. ભારતે એનર્જી ઈન્ફ્રાસ્ટ્રક્ચર પર થયેલા હુમલાની કડક નિંદા કરી અને કતાર સાથે એકતા દર્શાવી.
સાથે જ, પ્રધાનમંત્રી મોદીએ કતારમાં રહેલા ભારતીયોની સંભાળ માટે આભાર વ્યક્ત કર્યો અને પ્રદેશમાં જલ્દી શાંતિ સ્થાપિત થવાની આશા વ્યક્ત કરી. તેમણે જોર્ડનના પ્રયત્નોની પણ પ્રશંસા કરી, જેણે આ વિસ્તારમાં ફસાયેલા ભારતીયોને સુરક્ષિત પાછા લાવવા મદદ કરી.
