છેલ્લા કેટલાક દિવસોથી વડોદરા શહેર સહિત રાજ્યભરમાં પેટ્રોલ અને ડીઝલની અછત હોવાની અફવાઓએ જોર પકડ્યું છે. આ અફવાઓને કારણે પેટ્રોલ પંપો પર વાહનચાલકોની લાંબી કતારો જોવા મળી રહી છે અને લોકોમાં બિનજરૂરી ગભરાટ ફેલાયો છે. આ સ્થિતિને કાબૂમાં લેવા અને નાગરિકોને સાચી માહિતી આપવા માટે માંજલપુરના ધારાસભ્ય દ્વારા એક વિશેષ પહેલ કરવામાં આવી છે.
શહેરના વ્યસ્ત ગણાતા રાવપુરા વિસ્તારમાં જનજાગૃતિ માટેના હોર્ડિંગ્સ લગાવવામાં આવ્યા છે. આ હોર્ડિંગ્સ દ્વારા સંદેશ આપવામાં આવ્યો છે કે શહેરમાં ઈંધણનો પૂરતો જથ્થો ઉપલબ્ધ છે અને અછતની વાતો માત્ર અફવા છે. ધારાસભ્યએ આ હોર્ડિંગ્સ દ્વારા સ્પષ્ટ કર્યું છે કે, “અફવા ફેલાવનારા તત્વો સમાજમાં અરાજકતા ઊભી કરવાનો પ્રયાસ કરી રહ્યા છે, તેથી નાગરિકોએ આવા તત્વોથી સાવધ રહેવું જોઈએ.”
સ્થાનિક તંત્ર અને ધારાસભ્યની આ પહેલનો હેતુ પંપો પર થતી ભીડને ઓછી કરવાનો અને લોકોને શાંત પાડવાનો છે. વહીવટી તંત્રે પણ ખાતરી આપી છે કે સપ્લાય ચેઈન નિયમિત છે અને કોઈએ પણ સંગ્રહખોરી કે પેનિક બાઈંગ (ગભરાટમાં ખરીદી) કરવાની જરૂર નથી. રાવપુરામાં લાગેલા આ હોર્ડિંગ્સ અત્યારે આખા શહેરમાં ચર્ચાનો વિષય બન્યા છે અને લોકોમાં વિશ્વાસ જગાવવાનું કામ કરી રહ્યા છે.
