છોટા ઉદેપુર જિલ્લાના નસવાડી તાલુકાના કાંધા ગામે કાળજું કંપાવી દે તેવી ઘટના સામે આવી છે. મકાનના ધાબા પર કામ કરતી વખતે શ્રમિકને માથા પરથી પસાર થતી હાઈ ટેન્શન લાઇનમાંથી જોરદાર કરંટ લાગતા તેનું ધાબા પર જ મોત નીપજ્યું હતું. આ ઘટનાને પગલે ગ્રામજનોમાં વીજ કંપની પ્રત્યે ભારે રોષ જોવા મળી રહ્યો છે.

મળતી માહિતી અનુસાર, મૃતકની ઓળખ નસવાડી તાલુકાના કાળીદોરી ગામના ખુશાલ રાઠવા તરીકે થઈ છે. ઘટના સમયે ખુશાલ સાથે એક મિસ્ત્રી પણ હાજર હતો. મિસ્ત્રીના જણાવ્યા અનુસાર, ધાબા પર કામ કરતી વખતે નડતરરૂપ ઝાડની ડાળખી તોડવાનો પ્રયાસ કરતા તે ડાળખી હાઈ ટેન્શન લાઇનને અડી ગઈ હતી, જેના કારણે ખુશાલને જોરદાર કરંટ લાગ્યો હતો. અન્ય એક શ્રમિકે પાવડાના હાથા વડે તેને બચાવવા માટે મરણિયો પ્રયાસ કર્યો હતો, પરંતુ કરંટ એટલો ભયાનક હતો કે ડરના માર્યા તે પણ લાચાર બની ગયો હતો.

આ અકસ્માતે મધ્ય ગુજરાત વીજ કંપની (MGVCL)ની કામગીરી સામે મોટા સવાલો ઊભા કર્યા છે. સ્થાનિક દુકાનદારે અગાઉ અનેકવાર આ જોખમી વીજ લાઇન હટાવવા માટે રજૂઆત કરી હતી. જોકે, અધિકારીઓએ લાઇન હટાવવા માટે રૂપિયા દોઢ લાખ ભરવાનું મૌખિકમાં જણાવ્યું હતું. એક નાનો વેપારી આટલી મોટી રકમ ભરી શકે તેમ ન હોવાથી લાઇન હટાવી શકાઈ નહોતી, અને આજે એ જ જીવતા વાયરોએ એક મજૂરનો જીવ લીધો છે.

ઘટનાની જાણ થતા જ મૃતક ખુશાલ રાઠવાના પરિવારજનો કાંધા ગામે દોડી આવ્યા હતા. વ્હાલસોયાના મોતના સમાચારથી પરિવારમાં આક્રંદ છવાઈ ગયો હતો. રોષે ભરાયેલા પરિવારજનોએ જ્યાં સુધી ન્યાય અને યોગ્ય વળતર ન મળે ત્યાં સુધી ધાબા પરથી મૃતદેહ ઉઠાવવાનો ઇનકાર કરી દીધો હતો.

બનાવની જાણ થતા જ નસવાડી પોલીસ ઘટનાસ્થળે પહોંચી હતી અને પરિસ્થિતિને થાળે પાડવાના પ્રયાસો હાથ ધર્યા હતા. પોલીસે આ મામલે અકસ્માતે મોતનો ગુનો નોંધી વધુ તપાસ શરૂ કરી છે. હાલ તો આ ઘટનાને પગલે સમગ્ર વિસ્તારમાં અરેરાટી વ્યાપી ગઈ છે અને લોકો વીજ કંપનીના જવાબદાર અધિકારીઓ સામે કડક કાર્યવાહીની માંગ કરી રહ્યા છે.

ભાજપમાં જોડાયા બાદ રાજુ કરપડા મુળી બેઠક પરથી ચૂંટણી લડી રહ્યાં છે. તેમણે રજૂ કરેલા સોગંદનામામાં ઈતિહાસનો ખુલાસો થતાં રાજકીય ખળભળાટ મચી જવા પામ્યો છે.

આમ આદમી પાર્ટીના પૂર્વ નેતા અને ખેડૂત આગેવાન રાજુ કરપડાએ તાજેતરમાં જ કેસરિયા કર્યા હતાં. ભાજપમાં જોડાયા બાદ રાજુ કરપડાએ કહ્યું હતું કે, ખેડૂતોની સ્થિતિ સારી નથી અને સત્તા પક્ષ ખેડૂતોને સહાય કરશે. ત્યારે ભાજપમાં જોડાયા બાદ રાજુ કરપડા મુળી બેઠક પરથી ચૂંટણી લડી રહ્યાં છે. તેમણે રજૂ કરેલા સોગંદનામામાં ઈતિહાસનો ખુલાસો થતાં રાજકીય ખળભળાટ મચી જવા પામ્યો છે.

રાજુ કરપડાના સોગંદનામામાં અનેક પોલીસ કેસ થયા હોવાનો ઉલ્લેખ કરાયો છે. મારપીટ અને હથિયારથી ઈજા પહોંચાડવાના ગુના તેમની સામે નોંધાયા છે. તેમની સામે મુળી અને થાનગઢ સહિત ભાવનગર અને પાળીયાદમાં પણ પોલીસ ફરિયાદ નોંધાઈ છે. તેમણે મુળી બેઠક પરથી ઉમેદવારી કરી છે. હવે તેમના સોગંદનામા પ્રમાણે મૂળી, થાનગઢ, ભાવનગર અને પાળીયાદમાં તેમની સામે પોલીસ ફરિયાદ નોંધાયાનો ઉલ્લેખ કરાયો છે.

જ્યારે તેમણે આમ આદમી પાર્ટી છોડી ત્યારે ગોપાલ ઈટાલિયાએ તેમની પર ગંભીર આક્ષેપ કર્યા હતાં. ગોપાલ ઈટાલિયાએ કહ્યું હતું કે, રાજુ કરપડા પર કુલ ત્રણ કેસો નોંધાયેલા છે. 2022ની ચૂંટણીનાં એફિડેવિટમાં તેમણે ત્રણ કેસોનો ઉલ્લેખ કર્યો એ મુજબ, તેમના પર એક કેસ 326 એટલે કે પગ ભાંગી નાખવાનો કેસ, જેમાં તેમને 5 વર્ષની સજા થઈ છે. જ્યારે અન્ય બે કેસ જાનથી મારી નાખવાની કોશિશના છે. જેલ જવાથી બચવા તેમણે આ પગલું ભર્યું છે.

નંદેશરી જીઆઈડીસીમાં વરસાદી નાળામાં જોખમી કેમિકલનો નિકાલ, બે ટેન્કર ઝડપાયા, GPCBએ સેમ્પલ લઈ તપાસ હાથ ધરી 1 – image
નંદેશરી જીઆઈડીસી વિસ્તારમાં વરસાદી પાણીના કાચા નાળામાં ગેરકાયદે રીતે જોખમી કેમિકલ ઠાલવવાની પ્રવૃત્તિ ઝડપાઈ છે. નંદેશરી પોલીસે દરોડો પાડી બે ટેન્કરને ઝડપી પાડી છે. ઘટનાની જાણ થતાં ગુજરાત પ્રદૂષણ નિયંત્રણ બોર્ડ (GPCB)ની ટીમ પણ સ્થળ પર પહોંચી ગઈ હતી.

નંદેશરી જીઆઈડીસીમાં વરસાદી પાણી વહી જવા માટે બનાવેલા કાચા નાળામાં ટેન્કર દ્વારા કેમિકલ ઠાલવવામાં આવી રહ્યું હતું, તે દરમિયાન નંદેશરી પોલીસને બાતમી મળતાં ઝડપી કાર્યવાહી કરી બંને ટેન્કરને ઘટનાસ્થળ પર જ ઝડપી લેવામાં આવ્યા છે. આ ગેરકાયદે પ્રવૃત્તિ ક્યારથી ચાલી રહી હતી અને તેમાં કયા એકમો તથા વ્યક્તિઓ સંડોવાયેલ છે તે દિશામાં પોલીસ વિસ્તૃત તપાસ હાથ ધરી રહી છે.

ઘટનાની જાણ થતાં GPCBના પ્રાદેશિક અધિકારી માર્ગી પટેલ પોતાની ટીમ સાથે તાત્કાલિક સ્થળ પર પહોંચ્યા હતા. કેમિકલની પ્રકૃતિ અને ડિસ્ચાર્જ થઈ રહેલા પ્રવાહી અંગે ચોક્કસ માહિતી મેળવવા માટે બંને ટેન્કરમાંથી સેમ્પલ લઈ લેબોરેટરીમાં એનાલિસિસ માટે મોકલી આપવામાં આવ્યા છે. રિપોર્ટ આવ્યા બાદ વધુ વિગતો સ્પષ્ટ થશે.

GPCBના પ્રાદેશિક અધિકારી માર્ગી પટેલે જણાવ્યું છે કે, આ ગેરકાયદે પ્રવૃત્તિમાં સંડોવાયેલ એકમ સામે કડક કાર્યવાહી કરવામાં આવશે. આ ઘટના પર્યાવરણ માટે ગંભીર ખતરો છે, કારણ કે વરસાદી નાળા દ્વારા ઝેરી કેમિકલ જમીન અને ભૂગર્ભ જળ સ્ત્રોતોને પ્રદૂષિત કરી શકે છે. પોલીસ અને GPCB સંયુક્ત રીતે આ પ્રવૃતિની તપાસ કરી રહ્યા છે.

વલસાડ જિલ્લાના ઉંમરગામમાં આવેલી સોમનાથ ઓર્થોકેર કંપનીમાં અચાનક આગ ફાટી નીકળી હતી. ફાયર વિભાગની 3 ટીમોએ ભારે જહેમત બાદ આગ પર કાબૂ મેળવવાનો પ્રયાસ કર્યો છે.

વલસાડ જિલ્લાના ઉદ્યોગ નગર ગણાતા ઉંમરગામમાં આજે એક મોટી આગની દુર્ઘટના સામે આવી છે. ઉંમરગામ જીઆઈડીસી વિસ્તારમાં આવેલી ‘સોમનાથ ઓર્થોકેર’ નામની કંપનીમાં અચાનક ભીષણ આગ ફાટી નીકળતા સમગ્ર વિસ્તારમાં અફરાતફરીનો માહોલ સર્જાયો હતો.આગ લાગી ત્યારે કંપનીમાં અનેક કામદારો ફરજ પર હતા. આગની જ્વાળાઓ જોઈને કામદારોમાં નાસભાગ મચી ગઈ હતી. જોકે, સમયસૂચકતા વાપરીને તમામ કામદારોને તાત્કાલિક સુરક્ષિત રીતે કંપનીની બહાર કાઢી લેવામાં આવ્યા હતા, જેના કારણે મોટી જાનહાનિ ટળી છે.

ઘટનાની જાણ થતા જ ઉંમરગામ ફાયર વિભાગની ત્રણથી વધુ ટીમો ઘટના સ્થળે દોડી ગઈ હતી. આગ એટલી વિકરાળ હતી કે, તેના ધુમાડાના ગોટેગોટા દૂર-દૂર સુધી જોવા મળ્યા હતા. ફાયર ફાઈટરો દ્વારા સતત પાણીનો મારો ચલાવી આગને કાબૂમાં લેવાના પ્રયાસો હાથ ધરવામાં આવ્યા છે.

પ્રાથમિક માહિતી મુજબ, આગ કયા કારણોસર લાગી છે, તે હજુ જાણી શકાયું નથી. શોર્ટ સર્કિટના કારણે આગ લાગી હોવાની આશંકા સેવાઈ રહી છે, પરંતુ સત્તાવાર કારણ આગ બુઝાયા બાદ તપાસમાં જ બહાર આવશે. આ દુર્ઘટનામાં કંપનીની મશીનરી અને કાચા માલને મોટું નુકસાન થયું હોવાનો અંદાજ છે.