વડોદરા જિલ્લાના સાવલી નગરપાલિકાની ચૂંટણીમાં ઉમેદવારી પત્ર ભરાય તે પહેલા જ ભારતીય જનતા પાર્ટીમાં ભંગાણના સંકેતો મળી રહ્યા છે. વોર્ડ નંબર 5 ની ટિકિટ ન મળતા મહિલા મોરચાના મહામંત્રી વૈશાલી પુરોહિતે પક્ષ સામે બગાવત કરી છે. અન્યાયનો આક્ષેપ કરી તેમણે પક્ષના તમામ હોદ્દા પરથી રાજીનામું ધરી દીધું છે.

વૈશાલી પુરોહિતે પક્ષના નિર્ણય સામે ભારે આક્રોશ વ્યક્ત કરતા જણાવ્યું હતું કે, તેઓ વર્ષોથી પાયાના કાર્યકર તરીકે પક્ષની સેવા કરી રહ્યા છે, તેમ છતાં ટિકિટ ફાળવણીમાં તેમની ધરાર અવગણના કરવામાં આવી છે. પોતાની નારાજગી વ્યક્ત કરતા સમયે તેઓ ભાવુક થઈ ગયા હતા અને કેમેરા સામે જ રડી પડ્યા હતા. તેમણે આક્ષેપ કર્યો હતો કે પક્ષે ઉમેદવારોની પસંદગીમાં ભારે ગેરરીતિ કરી છે.

વૈશાલીબેને ગંભીર આક્ષેપ કરતા કહ્યું કે, “એક વોર્ડના સભ્યને બીજા વોર્ડમાં ટિકિટ ફાળવીને સ્થાનિક દાવેદારોનો હક છીનવવામાં આવ્યો છે.” આ પ્રકારની નીતિને કારણે પક્ષના નિષ્ઠાવાન કાર્યકરોમાં ભારે રોષ છે. સાવલી ભાજપમાં મહિલા નેતાનું આ રાજીનામું અને જાહેરમાં આક્રોશ આગામી ચૂંટણીના પરિણામો પર મોટી અસર કરી શકે છે. હાલમાં સ્થાનિક સંગઠન આ મામલે મૌન સેવી રહ્યું છે, પરંતુ કાર્યકરોમાં ચાલતી ચર્ચાએ મોટું સ્વરૂપ ધારણ કર્યું છે.

‘રામ રાખે તેને કોણ ચાખે’ આ કહેવત વડોદરાના છાણી વિસ્તારના એક પાન પાર્લરના સંચાલક માટે સાચી ઠરી છે. લૂંટના ઈરાદે વેપારીનું અપહરણ કરી, મધરાતે સોજીત્રા કેનાલના ઊંડા પાણીમાં ફેંકી દેવા છતાં, વેપારીએ મક્કમ મનોબળ અને કુદરતની મહેરબાનીથી આખી રાત કેનાલનો પીલર પકડી રાખી પોતાનો જીવ બચાવ્યો છે.

મળતી માહિતી અનુસાર, છાણીના નંદનગરમાં રહેતા અને પાન પાર્લર ચલાવતા ગીરીશભાઈ પટેલ સાથે આઠમી એપ્રિલની રાત્રે આ ઘટના બની હતી. ગીરીશભાઈ રાત્રે દુકાન બંધ કરી સ્કૂટર પર ઘર તરફ જઈ રહ્યા હતા, ત્યારે છાણી-સોખડા રોડ પર એક કાર ચાલકે જાણીજોઈને ટક્કર મારી તેમને પાડી દીધા હતા. કારમાંથી ઉતરેલા બે શખસોએ તેમને ખેંચીને કારમાં બેસાડી દીધા હતા. લૂંટારાઓએ તેમનો મોબાઈલ, રોકડ ભરેલું પર્સ અને એટીએમ કાર્ડ લૂંટી લીધું હતું. ડરાવી-ધમકાવીને એટીએમનો પિન નંબર પણ મેળવી લીધો હતો.

પીડિત ગીરીશભાઈના જણાવ્યાનુસાર, લૂંટારાઓ કારમાં સતત કોઈની સાથે ફોન પર વાત કરી રહ્યા હતા અને 20થી 25 હજારની રકમ ટ્રાન્સફર કરવાની હિલચાલ કરી રહ્યા હતા. ગીરીશભાઈએ પોલીસને જણાવ્યું કે, ‘આરોપીઓ અંદરોઅંદર વાતો કરતા હતા કે આજે મને પતાવી જ દેવો છે. લૂંટારાઓએ મને દેણા હાઈવે અને જીએસએફસી રોડ પર ફેરવ્યા બાદ મધરાતે સોજીત્રા કેનાલ પર લઈ ગયા હતા.’

ગીરીશભાઈએ પોલીસને જણાવ્યું કે, ‘લૂંટારાઓએ મને કેનાલના બ્રિજ પરથી ઊંચકીને સીધા પાણીમાં ફેંકી દીધો હતો. પાણીમાં પડતા જ હું ડૂબવા લાગ્યા હતા, પરંતુ અંધારામાં મારા હાથમાં કેનાલનો પીલર આવી ગયો હતો અને મે જીવના જોખમે આ પીલર પકડી રાખ્યો હતો. આ દરમિયાન લૂંટારાઓ થોડીવાર ઉપર ઊભા રહી તપાસ કરતા રહ્યા, પરંતુ હું દેખાયો નહીં એટલે તે ‘વેપારી ડૂબી ગયો છે’ તેમ માનીને ત્યાંથી ફરાર થઈ ગયા હતા.’

પીડિત ગીરીશભાઈએ જણાવ્યું કે, ‘ભીના કપડે, ધ્રૂજતી કાયા સાથે હું આખી રાત કેનાલના પાણીમાં પીલર પકડીને પસાર કરી હતી. સવાર પડતા જ હું હિંમત કરીને બહાર નીકળ્યો અને નજીકના મકાનો સુધી પહોંચ્યા હતા. ત્યાંના સ્થાનિક લોકોની મદદથી મેં પત્નીને ફોન કર્યો અને લોકેશન મોકલ્યું હતું. પરિવાર આવી પહોંચતા મને તાત્કાલિક સારવાર અપાવી પોલીસ સ્ટેશને ફરિયાદ નોંધાવવામાં આવી હતી.’ હાલમાં સમગ્ર મામલે વડોદરા પોલીસે લૂંટ અને હત્યાના પ્રયાસનો ગુનો નોંધી આ નિર્દયી લૂંટારાઓને પકડવા ચક્રો ગતિમાન કર્યા છે.

વડોદરા કોર્પોરેશનની ચૂંટણી માટે ભાજપ દ્વારા હવે ગમે ત્યારે શહેરના ઉમેદવારોની યાદી જાહેર થવાની શક્યતાના પગલે કારેલીબાગ સ્થિત ભાજપના નમો કમલમ કાર્યાલય ખાતે લીગલ સેલની ટીમ તૈનાત કરવામાં આવી છે. જેમાં 10 નોટરી, 10 ટાઇપીસ્ટ સાથે 50 વકીલોની ટીમ અહીં બેસાડી દેવામાં આવી છે. કોર્પોરેશનની ચૂંટણી માટે આજે ભાજપની અંતિમ યાદી તેમજ કોંગ્રેસની પણ બાકી યાદી જાહેર કરવામાં આવશે.

ઉમેદવારોની છેલ્લી ઘડીએ થતી પસંદગીના કારણે કોઈ કાયદાકીય વિવાદ ન સર્જાય તે માટે ભાજપ કાર્યાલય ખાતે 10 નોટરી, 10 ટાઇપીસ્ટ સાથે 50 વકીલોની એક ટીમ તૈનાત કરી દેવામાં આવી છે. જેવી યાદી જાહેર થશે તે સાથે જ ઉમેદવારોને તાત્કાલિક ભાજપ કાર્યાલય ખાતે બોલાવી આ લીગલ ટીમ સમક્ષ રજૂ કરાશે. જેના આધારે તમામ ઉમેદવારોના બાયોડેટા સાથે તેઓની ઉમેદવારી પત્ર રજૂ કરવા સુધીની પ્રક્રિયા અહીં આટોપવામાં આવશે.