Home Blog Page 173

Business : 15 હજાર કરોડના વેપારમાં જો છૂટ અપાય તો ભારત ચીન અને પાકિસ્તાનને પણ હરાવી શકે, જાણો કેવી રીતે?

pakkogujarat
-
0
Business : 15 હજાર કરોડના વેપારમાં જો છૂટ અપાય તો ભારત ચીન અને પાકિસ્તાનને પણ હરાવી શકે, જાણો કેવી રીતે?

ઈરાન-ઈઝરાયલ યુદ્ધવિરામ બાદ વૈશ્વિક સ્તરે વેપાર અંગે ચર્ચાઓ ફરી શરૂ થઈ છે. બંને વચ્ચે ટૂંક સમયમાં કાયમી કરાર થશે. જે પરિસ્થિતિને સ્થિર કરશે અને ગેસ અને તેલ વેપારને પુનઃસ્થાપિત કરશે. દરમિયાન, ઈરાની દૂતાવાસે ચાબહાર બંદર વિશે લખ્યું કે, આ બંદર ભારત અને ઈરાન વચ્ચે વેપાર માટે સુવર્ણ પુલ છે. આ એક ઈરાની બંદર છે જેના દ્વારા ભારત સીધો ઈરાન સાથે વેપાર કરે છે. હાલમાં, ભારતને યુએસ પ્રતિબંધોમાંથી મુક્તિ આપવામાં આવી છે.

ભારત અને ઈરાન વચ્ચેનો દ્વિપક્ષીય વેપાર આશરે ₹15 હજાર કરોડનો છે, જે ઈરાન અને ઈઝરાયલ વચ્ચેના યુદ્ધને કારણે અનિશ્ચિત છે. ચાબહાર આ વેપારમાં મહત્વપૂર્ણ ભૂમિકા ભજવે છે. જોકે, નજીક આવતી સમયમર્યાદા ભારતની ચિંતા વધારી શકે છે. આ સમયમર્યાદા સમાપ્ત થવાની તૈયારીમાં છે, અને મીડિયા અહેવાલો અનુસાર, ભારત તેને લંબાવવા માટે અમેરિકા અને ઈરાન સાથે સતત વાટાઘાટો કરી રહ્યું છે. જો આ સમયમર્યાદા લંબાવવામાં આવે છે, તો ભારત હવે ચીન અને પાકિસ્તાન જેવા દેશો પર નિર્ભર રહેશે નહીં.

ચાબહાર બંદર દક્ષિણપૂર્વ ઈરાનમાં ઓમાનના અખાત પર સ્થિત છે. જે ગ્વાદર બંદરથી આશરે 170 કિલોમીટર દૂર છે. જે પાકિસ્તાની સરહદ પર સ્થિત છે. ભારત માટે ઈરાન સાથે સીધો વેપાર કરવા માટે તે એક મહત્વપૂર્ણ માર્ગ છે. આ વેપાર ખર્ચ ઘટાડે છે અને યુરોપ સુધી સીધી પહોંચ પૂરી પાડે છે. 2018માં અમેરિકા દ્વારા ઈરાન પર પ્રતિબંધો લાદવામાં આવ્યા હોવા છતાં, ભારતને ચાબહાર માટે ખાસ સત્રમાં છૂટ આપવામાં આવી હતી. આનો અર્થ એ થયો કે તેને આ માર્ગ દ્વારા વેપાર કરવાની પરવાનગી આપવામાં આવી હતી.

ભારત માટે ચાબહાર બંદર કેટલું મહત્વપૂર્ણ છે તે સમજવા માટે, તમારે કેટલાક સમય પર વિચાર કરવાની જરૂર છે. તાજેતરમાં, જ્યારે મધ્ય પૂર્વમાં તણાવ ચરમસીમાએ હતો, ત્યારે સંસદીય વિદેશ બાબતોની સમિતિએ જણાવ્યું હતું કે વર્તમાન પરિસ્થિતિએ બંદરના ભવિષ્ય અંગે અનિશ્ચિતતા ઉભી કરી હતી. જો કે, સરકાર ઉદ્ભવતા પડકારોનો સામનો કરવા માટે તમામ હિસ્સેદારો સાથે સતત સંપર્કમાં છે. ત્યારથી ચર્ચાઓ શરૂ થઈ છે.

ચાબહાર બંદરનો સૌથી મહત્વપૂર્ણ ફાયદો તેનું સ્થાન છે. તે હોર્મુઝ સ્ટ્રેટની નજીક અને હિંદ મહાસાગરના કિનારે સ્થિત છે. તે ભારતના કંડલા બંદરથી આશરે 550 નોટિકલ માઇલ દૂર છે, જ્યારે તે મુંબઈથી આશરે 786 નોટિકલ માઇલ દૂર છે. આ બંદર ભારત માટે મહત્વપૂર્ણ છે કારણ કે તે ભારતને પાકિસ્તાનને બાયપાસ કરીને સીધા અફઘાનિસ્તાન અને મધ્ય એશિયામાં માલ પરિવહન કરવાની મંજૂરી આપે છે. આ માર્ગ આંતરરાષ્ટ્રીય ઉત્તર-દક્ષિણ પરિવહન કોરિડોર સાથે આગળ જોડાય છે, જે યુરોપ સાથે વેપારને સરળ બનાવે છે.

Gujarat : ચૂંટણી આયોગની ‘લોલંલોલ’ કામગીરી: નિરીક્ષકોની નિમણૂકના આદેશ 24 કલાકમાં જ બદલાયા, વહીવટી તંત્રમાં ભારે દોડધામ

pakkogujarat
-
0
Gujarat : ચૂંટણી આયોગની ‘લોલંલોલ’ કામગીરી: નિરીક્ષકોની નિમણૂકના આદેશ 24 કલાકમાં જ બદલાયા, વહીવટી તંત્રમાં ભારે દોડધામ

ગુજરાતમાં આગામી સમયમાં યોજાનારી મહાનગરપાલિકા, નગરપાલિકા અને પંચાયતોની ચૂંટણીઓના આયોજનમાં રાજ્ય ચૂંટણી આયોગની કામગીરી સામે ગંભીર સવાલો ઊભા થયા છે. પારદર્શક અને ન્યાયી ચૂંટણીના દાવાઓ વચ્ચે, નિરીક્ષકોની નિમણૂકમાં વિલંબ અને વારંવાર બદલાતા આદેશોને કારણે વહીવટી વર્તુળોમાં ‘અંધેરી નગરી’ જેવી સ્થિતિ સર્જાઈ હોવાની ચર્ચાઓએ જોર પકડ્યું છે.

ચૂંટણી જેવી સંવેદનશીલ પ્રક્રિયામાં આગોતરા આયોજનનો અભાવ સ્પષ્ટપણે જોવા મળી રહ્યો છે. સામાન્ય રીતે ચૂંટણીની જાહેરાત સાથે જ નિરીક્ષકો (Observers)ની નિમણૂક થઈ જવી જોઈએ, પરંતુ આ વખતે આયોગે છે ક 09-04-2026ના રોજ હુકમ કર્યો હતો. આશ્ચર્યજનક રીતે, નિમણૂકના માત્ર 24 કલાકમાં જ આયોગે જૂનો હુકમ ‘મૂળ અસરથી રદ’ કરી નવો ‘સુધારા હુકમ’ બહાર પાડવો પડ્યો છે. આ ઘટનાક્રમ આયોગની વહીવટી સજ્જતા પર પ્રશ્નાર્થ ચિહ્ન મૂકે છે.

નિરીક્ષકોની ભૂમિકા ચૂંટણીમાં અત્યંત મહત્વની હોય છે, જેમાં આદર્શ આચારસંહિતાનું પાલન, ઉમેદવારી પત્રોની ચકાસણી અને ઈવીએમ (EVM) ની સુરક્ષા મુખ્ય છે. નિરીક્ષકોની મહત્વની બ્રીફિંગ બેઠક છેક 10-04-2026ના રોજ રાખવામાં આવી છે.

રાજકીય વિશ્લેષકો માની રહ્યા છે કે જો નિરીક્ષકો જ ફિલ્ડ પર મોડા પહોંચશે, તો શરૂઆતના તબક્કાની અનિયમિતતાઓ પર લગામ કોણ કસશે? આ વિલંબને કારણે સ્થાનિક સ્તરે આચારસંહિતાના ભંગની ઘટનાઓ વધવાની આશંકા સેવાઈ રહી છે.

આઈએએસ (IAS) અને વરિષ્ઠ અધિકારીઓને વિવિધ જિલ્લાઓની જવાબદારી સોંપવામાં આવી છે, પરંતુ છેલ્લી ઘડીના ફેરફારો અને આદેશોમાં અસ્પષ્ટતાને કારણે અધિકારીઓમાં પણ અવઢવ અને મુંઝવણનો માહોલ છે. જ્યારે ચૂંટણી જેવો લોકશાહીનો ઉત્સવ માથે હોય ત્યારે વહીવટી તંત્રની આવી ‘હળવાશ’ લોકશાહીના પાયા માટે ચિંતાજનક સંકેત ગણાવી શકાય.

National : ‘ખાડી ક્ષેત્રના દેશો સાથે સતત સંપર્કમાં છીએ, કતાર ભારત માટે ઊર્જાનો મહત્ત્વનો સપ્લાયર’, કેન્દ્રનું મોટું નિવેદન

pakkogujarat
-
0
National : ‘ખાડી ક્ષેત્રના દેશો સાથે સતત સંપર્કમાં છીએ, કતાર ભારત માટે ઊર્જાનો મહત્ત્વનો સપ્લાયર’, કેન્દ્રનું મોટું નિવેદન

વૈશ્વિક સ્તરે બદલાતા ભૌગોલિક-રાજકીય સમીકરણો વચ્ચે ભારત પોતાની ઊર્જા સુરક્ષા અને પ્રાદેશિક શાંતિ માટે સક્રિય બન્યું છે. મિડલ ઈસ્ટમાં વધી રહેલા તણાવને ધ્યાનમાં રાખીને ભારત સરકાર એક તરફ ખાડી દેશો સાથે વ્યૂહાત્મક સંબંધો મજબૂત કરી રહી છે, તો બીજી તરફ પડોશી દેશોની જરૂરિયાતોને પણ પ્રાધાન્ય આપી રહી છે. તાજેતરમાં વિદેશ મંત્રાલય દ્વારા લેબેનોનની સ્થિતિ અને ઊર્જા ક્ષેત્રે લેવાયેલા મહત્ત્વના પગલાં અંગે સત્તાવાર નિવેદન જાહેર કરવામાં આવ્યું છે.

દિલ્હી ખાતે વિદેશ મંત્રાલયના સત્તાવાર પ્રવક્તા રણધીર જાયસ્વાલે જણાવ્યું હતું કે, ‘અમે મિડલ ઈસ્ટમાં થઈ રહેલા ઘટનાક્રમ પર નજીકથી નજર રાખી રહ્યા છીએ. અમે ખાડી ક્ષેત્રના દેશો સાથે સતત સંપર્કમાં છીએ. વડાપ્રધાનના નિર્દેશ પર આપણા મંત્રીઓ ઊર્જા સુરક્ષાને મજબૂત કરવા માટે ખાડી દેશોની મુલાકાત લઈ રહ્યા છે. વિદેશ મંત્રી હાલમાં મોરેશિયસની મુલાકાતે છે, જ્યાંથી તેઓ 11 અને 12 એપ્રિલ, 2026ના રોજ યુએઈ જશે. તેઓ ભારત-યુએઈ સંબંધોને વધુ મજબૂત કરવા માટે ત્યાંના નેતાઓ સાથે ચર્ચા કરશે.’

તેમણે વધુમાં ઉમેર્યું કે, ‘આપણે આપણી ઊર્જા સુરક્ષા મજબૂત કરવાની સાથે પડોશી દેશોની વિનંતી મુજબ તેમની ઊર્જા જરૂરિયાતો પૂરી કરવા માટે પણ સહાય પૂરી પાડી રહ્યા છીએ. અમે બે અઠવાડિયા પહેલા શ્રીલંકાને 38 મેટ્રિક ટન પેટ્રોલિયમ પેદાશોનો પુરવઠો પૂરો પાડ્યો હતો. અમે તેલ અને ગેસના પુરવઠા માટે સરકાર-ટુ-સરકાર(G2G) કરારને અંતિમ ઓપ આપી રહ્યા છીએ, જે મોરેશિયસની ઊર્જા સુરક્ષાને મજબૂત કરવામાં મહત્ત્વની ભૂમિકા ભજવશે. આપણા પેટ્રોલિયમ મંત્રી 9 અને 10 એપ્રિલના રોજ કતારની મુલાકાતે છે. હાલમાં તેઓ કતારમાં છે. કતાર ભારત માટે ઊર્જાનો મહત્ત્વનો સપ્લાયર છે. કતારના ઊર્જા મંત્રીએ ભારતને વિશ્વાસપાત્ર ઊર્જા સપ્લાયર તરીકે રહેવાની તેમની પ્રતિબદ્ધતા દોહરાવી છે અને ભારત સાથે ઊર્જા સંબંધો અને સહયોગને ચાલુ રાખવા તેમજ મજબૂત કરવા ઈચ્છા વ્યક્ત કરી છે.’

દિલ્હીમાં રણધીર જયસ્વાલે વધુમાં જણાવ્યું કે, ‘લેબેનોનમાં મોટી સંખ્યામાં નાગરિકોના મોતના અહેવાલોથી અમે ઊંડી ચિંતા વ્યક્ત કરીએ છીએ. લેબેનોનની શાંતિ અને સુરક્ષા માટે કામ કરતા યુનિફિલમાં સૈનિકો ફાળવતા દેશ તરીકે ઘટનાઓની આ દિશા ખૂબ જ ચિંતાજનક છે. ભારતે હંમેશા નાગરિકોની સુરક્ષાને સર્વોચ્ચ પ્રાથમિકતા આપવા પર ભાર મૂક્યો છે. આંતરરાષ્ટ્રીય કાયદાઓનું પાલન કરવું અને રાજ્યોની સાર્વભૌમત્વ અને પ્રાદેશિક અખંડિતતાનું સન્માન કરવું આવશ્યક છે. લેબેનોનમાં અમારું દૂતાવાસ ભારતીય સમુદાયની સુરક્ષા માટે તેમના સતત સંપર્કમાં છે.’

બંદરો, શિપિંગ અને જળમાર્ગ મંત્રાલયના એડિશનલ સેક્રેટરી મુકેશ મંગલે જણાવ્યું હતું કે, ‘હું એ પણ જણાવવા માંગુ છું કે બંદરો, શિપિંગ અને જળમાર્ગ મંત્રીએ આજે અમારા મંત્રાલય હેઠળના તમામ બંદરો અને તમામ સંસ્થાઓ સાથે વર્તમાન પરિસ્થિતિની સમીક્ષા કરી છે. તેમણે બંદરો અને ડીજી શિપિંગ(DG Shipping) સહિતની તમામ સંસ્થાઓને આદેશ આપ્યો છે કે નિકાસકારો અથવા અન્ય કોઈ દ્વારા ધ્યાનમાં લાવવામાં આવેલી સમસ્યાઓનો ઉકેલ લાવવા તાત્કાલિક પગલાં લેવામાં આવે. આ પ્રદેશમાં તમામ ભારતીય નાવિકો સુરક્ષિત છે અને છેલ્લા 24 કલાકમાં ભારતીય ધ્વજ ધરાવતા કોઈપણ જહાજ સાથે કોઈ અપ્રિય ઘટના બની નથી… મંત્રાલયે અત્યાર સુધીમાં 1,927થી વધુ ભારતીય નાવિકોને સુરક્ષિત રીતે પરત લાવવાની સુવિધા પૂરી પાડી છે, જેમાં છેલ્લા 24 કલાકમાં 124 નાવિકોનો સમાવેશ થાય છે. નાવિકોનું કલ્યાણ અને અવિરત દરિયાઈ કામગીરી સુનિશ્ચિત કરવા માટે મંત્રાલય વિદેશ મંત્રાલય, ભારતીય મિશન અને દરિયાઈ હિતધારકો સાથે સંકલન કરવાનું ચાલુ રાખશે.’

સુજાતા શર્મા, જોઈન્ટ સેક્રેટરી (માર્કેટિંગ અને ઓઈલ રિફાઈનરી), પેટ્રોલિયમ અને કુદરતી ગેસ મંત્રાલયે જણાવ્યું હતું કે, ‘…અમારા એલપીજી(LPG) વિતરકો અને પેટ્રોલ પંપો પાસે પૂરતો સ્ટોક છે, ક્યાંય સ્ટોક ખાલી(dryout) થયો હોવાના અહેવાલ નથી… અમારા ઘરેલું એલપીજી સિલિન્ડરનો પુરવઠો સામાન્ય છે અને ઓનલાઇન બુકિંગ લગભગ 98 ટકા સુધી પહોંચી ગયું છે. વધુમાં, હવે અમારી 92 ટકા ડિલિવરી OTP વેરિફિકેશન દ્વારા કરવામાં આવી રહી છે. જેમ તમે જાણો છો, કોમર્શિયલ એલપીજી પુરવઠો તેની ક્ષમતાના 70 ટકા સુધી પુનઃસ્થાપિત કરવામાં આવ્યો છે; આ શ્રેણીમાં હોસ્પિટલો, શૈક્ષણિક સંસ્થાઓ, હોટલો, ઢાબા, મજૂર કેમ્પ, શ્રમ-સઘન ઉદ્યોગો, પેકેજિંગ યુનિટ્સ, ફાર્માસ્યુટિકલ સેક્ટર અને સ્થળાંતરિત મજૂરોને પ્રાથમિકતા આપવામાં આવી છે… અમારી પાસે હાલમાં ક્રૂડ ઓઈલનો પૂરતો જથ્થો ઉપલબ્ધ છે.’

SPORTS : મેચ વિનર મુકુલ, 7માં ક્રમે આવીને મેચનું પાસું પલટી નાખ્યું, કોલકાતાના હાથમાંથી જીત ખેંચી લાવ્યો

pakkogujarat
-
0
SPORTS : મેચ વિનર મુકુલ, 7માં ક્રમે આવીને મેચનું પાસું પલટી નાખ્યું, કોલકાતાના હાથમાંથી જીત ખેંચી લાવ્યો

IPL-2026, KKR vs LSG : આઈપીએલ-2026માં આજે કોલકાતા નાઈટ રાઈડર્સ અને લખનઉ સુપર જાયન્ટ વચ્ચે મેચ રમાઈ હતી. મેચમાં બેટર મુકુલ રોયે દમદાર બેટિંગ કરીને કોલકાતા પાસેથી જીત છિનવી લખનઉને વિજય અપાવ્યો છે. મુકુલે સાતમાં ક્રમે બેટિંગ આવી માત્ર 27 બોલમાં 54 રન (2 ફોર અને 7 સિક્સ) ફટકારી લખનઉને જીત અપાવી છે.

કોલકાતાએ પ્રથમ બેટિંગ લઈને નિર્ધારીત 20 ઓવરમાં ચાર વિકેટે 181 રન નોંધાવ્યા હતા, જેની સામે લખનઉની ટીમે 20 ઓવરમાં 7 વિકેટે 182 રન ફટકારી જીત મેળવી છે. કોલકાતા તરફથી સૌથી વધુ અંગક્રિશ રઘુવંશીએ 45 રન, અજિંક્ય રહાણે 41 રન, રાવમન પોવેલે અણનમ 39 રન અને કેમરોન ગ્રીને અણનમ 32 રન નોંધાવ્યા હતા. તો બોલિંગમાં વૈભવ અરોરા અને અનુકુલ રોયે 2-2 વિકેટ, જ્યારે સુનીલ નરીન, કાર્તિક ત્યાગી અને કેમરોન ગ્રીને 1-1 વિકેટ ઝડપી છે.

જ્યારે લખનઉને 8 ઓવરમાં 86 રન કરવાની જરૂર હતી, ત્યારે મુકુલ મેદાનમાં આવ્યો હતો અને તેણે ચારોકેર ફોર અને સિક્સની રમઝટ બોલાવી દીધી હતી. આજની મેચમાં લખનઉ તરફથી માત્ર મુકુલ ચૌધરીએ જ નહીં અયુષ ભદોઈએ પણ દમદાર બેટિંગ કરી છે. બદોઈએ ચોથા ક્રમે આવીને માત્ર 34 બોલમાં 54 રન (7 ફોર, 2 સિક્સ) નોંધાવીને મહત્ત્વનું યોગદાન આપ્યું છે. જ્યારે બોલિંગમાં પ્રિન્સ યાદવ, મનીમરન સિદ્ધાર્થ, દિગ્વેશ રાઠી અને અવેશ ખાને 1-1 વિકેટ ઝડપી હતી.

Vadodara : ફિટનેસ ફ્રીક સોશિયલ મીડિયા સ્ટાર અંકિતા પરમારે કાર્યકરોની નારાજગી મુદ્દે આપ્યું મોટું નિવેદન

pakkogujarat
-
0
Vadodara : ફિટનેસ ફ્રીક સોશિયલ મીડિયા સ્ટાર અંકિતા પરમારે કાર્યકરોની નારાજગી મુદ્દે આપ્યું મોટું નિવેદન

વડોદરા જિલ્લા પંચાયતની ચૂંટણીમાં ભાજપે આ વખતે ગ્લેમર અને યુવા શક્તિનો સમન્વય કર્યો છે. જાણીતા સોશિયલ મીડિયા સ્ટાર અને પૂર્વ તાલુકા પંચાયત પ્રમુખ અંકિતા પરમારને ભાજપે જિલ્લા પંચાયતના ઉમેદવાર તરીકે મેદાનમાં ઉતાર્યા છે. જિમના શોખીન અને ફિટનેસ આઈકોન ગણાતા અંકિતા પરમારે પોતાની ઉમેદવારી સાથે જ મતદારોમાં ઉત્સાહ જગાડ્યો છે.

પોતાની દાવેદારી અંગે ઉત્સાહ વ્યક્ત કરતા અંકિતા પરમારે જણાવ્યું હતું કે, “હું વડાપ્રધાન નરેન્દ્ર મોદીના ‘ફિટ ઇન્ડિયા’ના સૂત્રને આગળ ધપાવવા માંગુ છું. પીએમ મોદીએ હંમેશા યુવાઓ અને મહિલાઓને મોટી તક આપી છે. આજે દેશની મહિલાઓ દરેક ક્ષેત્રમાં આગળ વધી છે, ત્યારે લોકોના વિશ્વાસને સાર્થક કરવો એ જ મારો મુખ્ય લક્ષ્યાંક છે.” તેમણે વધુમાં ઉમેર્યું કે આ સફરમાં તેમને તેમના પરિવારનો સંપૂર્ણ સહકાર મળી રહ્યો છે.

ભાજપમાં ટિકિટ ફાળવણી બાદ નયના પરમારની નારાજગી અંગે પૂછવામાં આવતા અંકિતા પરમારે પરિપક્વતા દર્શાવતા કહ્યું હતું કે, “નયના પરમાર મારા બહેન જેવા છે. લોકશાહીમાં દરેકને ચૂંટણી લડવાનો અને દાવેદારી કરવાનો અધિકાર છે. કોને ટિકિટ આપવી તે પક્ષનો આખરી નિર્ણય હોય છે. નયનાબેન અમારા જ છે અને અમે સૌ સાથે મળીને તેમને મનાવી લઈશું.” વડોદરામાં અંકિતા પરમારની આક્રમક છતાં નમ્ર શૈલી હવે મતદારોને કેટલી આકર્ષે છે તે જોવું રસપ્રદ રહેશે.

Gujarat : રાજ્યમાં મહત્તમ તાપમાનમાં 2થી 3 ડિગ્રીનો વધારો થશે

pakkogujarat
-
0
Gujarat : રાજ્યમાં મહત્તમ તાપમાનમાં 2થી 3 ડિગ્રીનો વધારો થશે

ગુજરાતમાં માવઠાનો રાઉન્ડ પૂર્ણ થતાં જ ફરી વાર ગરમીનો અહેસાસ શરૂ થયો છે. રાજ્યમાં હવે ગરમીનું જોર વધી રહ્યું છે. હવામાન વિભાગની આગાહી પ્રમાણે રાજ્યના તાપમાનમાં બેથી ત્રણ ડિગ્રીનો વધારો થશે.

ગુજરાતમાં માવઠાનો રાઉન્ડ પૂર્ણ થતાં જ ફરી વાર ગરમીનો અહેસાસ શરૂ થયો છે. રાજ્યમાં હવે ગરમીનું જોર વધી રહ્યું છે. હવામાન વિભાગની આગાહી પ્રમાણે રાજ્યના તાપમાનમાં બેથી ત્રણ ડિગ્રીનો વધારો થશે. કેટલાક જિલ્લામાં ઉકળાટ રહેશે. રાજ્યના કેટલાક શહેરોમાં મહત્તમ તાપમાન 38થી 39 ડિગ્રી રહેશે. વેસ્ટર્ન ડિસ્ટર્બન્સથી ગરમી વધશે.

હવામાન વિભાગના ડાયરેક્ટર એ.કે. દાસના જણાવ્યા પ્રમાણે રાજ્યમાં મહત્તમ તાપમાનમાં વધારો થશે. સૌરાષ્ટ્ર અને કચ્છમાં ગરમ પવનો ફૂંકાશે.તાપમાનમાં બેથી ત્રણ ડિગ્રીનો વધારો થશે. અમદાવાદમાં 35.7, ડીસામાં 37.1, અમરેલીમાં 36.1, રાજકોટમાં 37.1, કંડલામાં 36.2, ગાંધીનગર માં 35.4, વડોદરામાં 35.2, ભુજમાં 37.2 ડિગ્રી તાપમાન નોંધાયું છે.

હવામાન નિષ્ણાંત અંબાલાલ પટેલે 15 એપ્રિલ સુધી ગરમીનો પ્રકોપ વધવાની આગાહી કરી છે. 20 એપ્રિલ સુધી ઉત્તર ગુજરાતમાં તાપમાન 42 ડિગ્રી પહોંચશે. ઉત્તર અને મધ્ય ગુજરાતમાં તાપમાન 39 ડિગ્રીએ પહોંચશે. કેટલાક વિસ્તારોમાં 42થી 43 ડિગ્રી તાપમાન જઈ શકે છે. પાટણ, બનાસકાંઠા, સાબરકાંઠા, અરવલ્લી અને પંચમહાલમાં ગરમીમાં વધારો થશે. ઉત્તર ગુજરાત, સૌરાષ્ટ્ર અને કચ્છમાં તાપમાન 40થી 41 ડિગ્રી રહેશે. દરિયાકાંઠાના વિસ્તારોમાં તાપમાન 36 ડિગ્રી રહેશે. વલસાડ વિસ્તારમાં તાપમાન 34 ડિગ્રી આસપાસ રહેશે. કેટલાક વિસ્તારોમાં લૂનો પ્રભાવ જોવા મળી શકે છે.

Entertainment : Salman Khanની વોન્ટેડ ગર્લ આયશા ટાકિયા અત્યારે ક્યાં? અચાનક બોલીવુડમાંથી કેમ થઈ ગાયબ?

pakkogujarat
-
0
Entertainment : Salman Khanની વોન્ટેડ ગર્લ આયશા ટાકિયા અત્યારે ક્યાં? અચાનક બોલીવુડમાંથી કેમ થઈ ગાયબ?

આયશા ટાકિયા ભલે આજે ફિલ્મી દુનિયાથી દૂર થઈ ગઈ છે, પરંતુ તે પોતાના ફેન્સ વચ્ચે અવારનવાર ચર્ચામાં રહે છે. આ હસીનાએ એક સમયે પોતાની સુંદર અદાઓથી ફેન્સના દિલ પર રાજ કર્યું હતું, પરંતુ બાદમાં સર્જરીને કારણે તેનો ચહેરો બદલાઈ ગયો. આયશા 10 એપ્રિલના રોજ આજે પોતાનો 40મો જન્મદિવસ ઉજવી રહી છે.

આયશાએ પોતાની કરિયરની શરૂઆત વર્ષ 2004માં આવેલી ફિલ્મ ટાર્ઝન: ધ વન્ડર કારથી કરી હતી. પોતાની પહેલી જ ફિલ્મથી તેણે દર્શકોના દિલ જીતી લીધા હતા. ત્યારબાદ તે ઘણી સફળ ફિલ્મોનો ભાગ રહી, જેમાં સોચા ન થા, દિલ માંગે મોર, સલામ-એ-ઈશ્ક અને પાઠશાલા સામેલ છે. જોકે, આયશાને ખરી ઓળખ સલમાન ખાનની ફિલ્મ વોન્ટેડ થી મળી હતી, જેમાં બંનેની જોડીને લોકોએ ખૂબ પસંદ કરી હતી.

આયશાની છેલ્લી ફિલ્મ વર્ષ 2011માં આવેલી મોડ (Mod) હતી, જેને દર્શકો તરફથી ખાસ પ્રતિસાદ મળ્યો નહોતો. બોક્સ ઓફિસ પર નિષ્ફળતા મળ્યા બાદ આયશાએ હંમેશા માટે એક્ટિંગ છોડી દીધી અને પોતાના લગ્નજીવન પર ધ્યાન આપવાનું નક્કી કર્યું.

આયશાએ વર્ષ 2009માં પોતાના બોયફ્રેન્ડ ફરહાન આઝમી સાથે લગ્ન કર્યા હતા. તે સમયે એક્ટ્રેસ માત્ર 23 વર્ષની હતી. ફરહાન એક રેસ્ટોરન્ટ માલિક છે અને સમાજવાદી પાર્ટીના નેતા અબુ આઝમીના પુત્ર છે. લગ્ન બાદ આયશાએ ઇસ્લામ ધર્મ અંગીકાર કર્યો હતો. આ કપલને એક દીકરો પણ છે.

આયશા અત્યારે લાઈમલાઈટથી દૂર મુંબઈમાં પોતાના પરિવાર સાથે રહે છે. તે પ્રાણીઓની સુરક્ષા (એનિમલ વેલ્ફેર) ના કામો સાથે જોડાયેલી છે. આ સિવાય તે વીગન લાઈફસ્ટાઈલને પ્રોત્સાહન આપવામાં વ્યસ્ત છે. આયશા સોશિયલ મીડિયા પર ખૂબ જ એક્ટિવ રહે છે અને અવારનવાર પોતાની તસવીરો અને વીડિયો શેર કરતી રહે છે.

Entertainment : વાયરલ ગર્લ મોનાલિસાનો પતિ ફરમાન જશે જેલમાં? NCSTની તપાસમાં ચોંકાવનારો ખુલાસો

pakkogujarat
-
0
Entertainment : વાયરલ ગર્લ મોનાલિસાનો પતિ ફરમાન જશે જેલમાં? NCSTની તપાસમાં ચોંકાવનારો ખુલાસો

મહાકુંભની વાયરલ ગર્લ મોનાલિસાએ મુસ્લિમ સાથે લગ્નએ ખૂબ જ ચર્ચા જગાવી છે. તેના પતિએ દાવો કર્યો હતો કે તે પુખ્ત વયની છે. તેને કોઇની વાતોમાં ફસાઇ નથી. જો કે હવે મોનાલિસાની ઉંમરને લઇને ચકચારી બાબત સામે આવી છે.

સોશિયલ મીડિયા પર ‘વાયરલ ગર્લ’ તરીકે જાણીતી બનેલી મોનાલિસા ભોંસલેના લગ્ન મામલે એક ચોંકાવનારો વળાંક આવ્યો છે. રાષ્ટ્રીય અનુસૂચિત જનજાતિ આયોગ (NCST) ની ઊંડી તપાસમાં બહાર આવ્યું છે કે મોનાલિસા પુખ્ત વયની નથી, પરંતુ કાયદેસર રીતે સગીર છે. આ ખુલાસા બાદ મધ્યપ્રદેશના ખરગોન જિલ્લાની મહેશ્વર પોલીસે મોનાલિસાના પતિ ફરમાન ખાન વિરુદ્ધ POCSO એક્ટ અને અન્ય ગંભીર કલમો હેઠળ FIR નોંધી કાયદેસરની કાર્યવાહી હાથ ધરી છે.

NCST ના અધ્યક્ષ અંતર સિંહ આર્યના માર્ગદર્શન હેઠળ હાથ ધરાયેલી તપાસમાં એડવોકેટ પ્રથમ દુબેએ મહત્વની કાનૂની દલીલો રજૂ કરી હતી. તપાસ ટીમે કેરળથી લઈને મધ્યપ્રદેશ સુધીના દસ્તાવેજો ચકાસ્યા હતા. મહેશ્વર સરકારી હોસ્પિટલના રેકોર્ડ મુજબ મોનાલિસાનો જન્મ 30 ડિસેમ્બર, 2009 ના રોજ થયો હતો.

આ હિસાબે માર્ચ 2026 માં જ્યારે તેના લગ્ન થયા, ત્યારે તેની ઉંમર માત્ર 16 વર્ષ, 2 મહિના અને 12 દિવસ હતી. અગાઉ લગ્ન માટે રજૂ કરવામાં આવેલું જન્મ પ્રમાણપત્ર (જેમાં જન્મતારીખ 1 જાન્યુઆરી, 2008 દર્શાવવામાં આવી હતી) બનાવટી હોવાનું સાબિત થયું છે, જેને હવે રદ કરવાનો આદેશ આપવામાં આવ્યો છે.

એડવોકેટ પ્રથમ દુબેએ કમિશન સમક્ષ ગંભીર આક્ષેપ કર્યો છે કે આ માત્ર લગ્નનો મામલો નથી, પરંતુ એક સુનિયોજિત વ્યૂહરચના છે. તેમણે આ કેસમાં કેરળના કેટલાક રાજકીય નેતાઓ અને PFI જેવા સંગઠનોની ભૂમિકા હોવાની આશંકા વ્યક્ત કરી છે. ફરિયાદ મુજબ, એક ચોક્કસ ‘નેરેટિવ’ સેટ કરવા માટે સગીર છોકરીને પુખ્ત ગણાવીને લગ્ન કરાવવામાં આવ્યા હતા.

મોનાલિસા પારધી આદિવાસી સમુદાયની હોવાથી, આરોપી ફરમાન ખાન વિરુદ્ધ નીચે મુજબની કલમો લાગુ કરવામાં આવી છે:
POCSO એક્ટ: સગીર સાથેના જાતીય અપરાધો અને લગ્ન બદલ.
SC/ST અત્યાચાર નિવારણ અધિનિયમ: અનુસૂચિત જનજાતિની યુવતી સાથે અન્યાય કરવા બદલ.
BNS (ભારતીય ન્યાય સંહિતા): ગુનાહિત કાવતરું અને છેતરપિંડીના આધારે લગ્ન

NCST એ આ ઘટનાને અત્યંત ગંભીરતાથી લીધી છે. કમિશને 22 એપ્રિલ, 2026 ના રોજ મધ્યપ્રદેશ અને કેરળના પોલીસ વડાઓ (DGPs) ને દિલ્હી મુખ્યાલયમાં હાજર થવા સમન્સ પાઠવ્યા છે. આ સાથે જ બંને રાજ્યોની પોલીસ પાસેથી આગામી ત્રણ દિવસમાં તપાસનો પ્રગતિ અહેવાલ માંગવામાં આવ્યો છે. કમિશને સ્પષ્ટ કર્યું છે કે સગીર આદિવાસી દીકરીને ન્યાય ન મળે ત્યાં સુધી તપાસ પર સીધી દેખરેખ રાખવામાં આવશે.

Entertainment : યશ ચોપરા ફાઉન્ડેશને હિન્દી ફિલ્મ ઇન્ડસ્ટ્રીના વર્કર્સના બાળકો માટે YCF સ્કોલરશિપ પ્રોગ્રામ 2026ની કરી જાહેરાત!

pakkogujarat
-
0
Entertainment : યશ ચોપરા ફાઉન્ડેશને હિન્દી ફિલ્મ ઇન્ડસ્ટ્રીના વર્કર્સના બાળકો માટે YCF સ્કોલરશિપ પ્રોગ્રામ 2026ની કરી જાહેરાત!

યશ ચોપરા ફાઉન્ડેશન દ્વારા હિન્દી ફિલ્મ ઈન્ડસ્ટ્રીના વર્કર્સના બાળકો માટે સ્કોલરશિપની જાહેરાત કરવામાં આવી છે, જેમાં ઉચ્ચ શિક્ષણ માટે ₹5 લાખ સુધીની આર્થિક સહાય અપાશે.

યશ ચોપરા ફાઉન્ડેશન (YCF), જે યશ રાજ ફિલ્મ્સની સેવાકીય સંસ્થા છે, તેણે આજે YCF સ્કોલરશિપ પ્રોગ્રામ 2026ની જાહેરાત કરી છે. આ પહેલનું આ બીજું વર્ષ છે, જે હિન્દી ફિલ્મ ઈન્ડસ્ટ્રી સાથે જોડાયેલા પરિવારોના બાળકોને ઉચ્ચ શિક્ષણમાં મદદ કરવાના હેતુથી શરૂ કરવામાં આવી છે.

આ સ્કોલરશિપ પ્રોગ્રામ હિન્દી ફિલ્મ ઇન્ડસ્ટ્રીના નોંધાયેલા કામદારો અને YCF સાથી સભ્યોના બાળકો માટે છે. ફાઉન્ડેશન દરેક વિદ્યાર્થીને 5 લાખ રૂપિયા સુધીની આર્થિક મદદ કરશે, જેથી તેઓ પોતાના સપના પૂરા કરી શકે. આ મદદ વર્ષ 2026-27 ના શૈક્ષણિક વર્ષ માટે ભારતમાં માન્યતા પ્રાપ્ત સંસ્થાઓમાં ભણતા વિદ્યાર્થીઓને મળશે. વિદ્યાર્થીઓની પસંદગી તેમના ભણતરના ગુણો અને આર્થિક જરૂરિયાતને આધારે કરવામાં આવશે.

આ પ્રોગ્રામ હેઠળ ફિલ્મ સ્ટડીઝ, મીડિયા, એનિમેશન, સિનેમેટોગ્રાફી અને ડાયરેક્શન જેવા સર્જનાત્મક વિષયોમાં ભણતા વિદ્યાર્થીઓને સહાય આપવામાં આવે છે. આ વર્ષે તેમાં એન્જિનિયરિંગ, મેડિકલ, બિઝનેસ મેનેજમેન્ટ, લો (કાયદો) અને IT જેવા વ્યવસાયિક કોર્સને પણ સામેલ કરવામાં આવ્યા છે. આ સ્કોલરશિપ દ્વારા કોર્સની ટ્યુશન ફી ભરવામાં આવશે, જેથી પૈસાના અભાવે કોઈનું શિક્ષણ અટકે નહીં.

YRFના CEO અક્ષય વિધાનીએ જણાવ્યું હતું કે, અમને આ સ્કોલરશિપ પ્રોગ્રામનું બીજું વર્ષ શરૂ કરતા ખૂબ આનંદ થાય છે. અમારો ઉદ્દેશ્ય ફિલ્મ ઇન્ડસ્ટ્રીના પરિવારોના બાળકોને શિક્ષણ દ્વારા મજબૂત બનાવવાનો છે. એક સર્વે મુજબ, ઈન્ડસ્ટ્રીના 60% પરિવારો શિક્ષણના ખર્ચને લઈને મુશ્કેલી અનુભવે છે. આ સ્કોલરશિપ તે બાળકોનું ભવિષ્ય સુરક્ષિત કરવામાં મદદ કરશે.

પસંદગી માટે વિદ્યાર્થીઓએ કેટલીક તપાસ અને ઇન્ટરવ્યુની પ્રક્રિયામાંથી પસાર થવું પડશે. જે વિદ્યાર્થીઓ પસંદ થશે તેમની ફી સીધી કોલેજ કે સંસ્થામાં જમા કરવામાં આવશે. રસ ધરાવતા પરિવારો યશ ચોપરા ફાઉન્ડેશનની વેબસાઇટ પર જઈને અરજી કરી શકે છે અથવા ઈમેલ દ્વારા વધુ માહિતી મેળવી શકે છે.

Vadodara : વડોદરા સેન્ટ્રલ બસ સ્ટેશને મોટી દુર્ઘટના, સ્ટ્રક્ચર ધરાશાયી થતાં એકનું કરુણ મોત

pakkogujarat
-
0
Vadodara : વડોદરા સેન્ટ્રલ બસ સ્ટેશને મોટી દુર્ઘટના, સ્ટ્રક્ચર ધરાશાયી થતાં એકનું કરુણ મોત

સિંગાપુર અને શાંઘાઈ જેવા વિદેશી શહેરોની તર્જ પર બનેલા વડોદરાના આંતરરાષ્ટ્રીય સ્તરના સેન્ટ્રલ બસ ટર્મિનલમાં આજે (10મી એપ્રિલ) એક મોટી દુર્ઘટના ઘટી છે. ટર્મિનલના એન્ટ્રી-એક્ઝિટ પોઈન્ટ પાસે સ્લેબનો એક ભાગ ધરાશાહી થતાં એક વ્યક્તિનું મોત નિપજ્યું છે. આ ઘટનાએ કરોડોના ખર્ચે બનેલા આ પ્રોજેક્ટની ગુણવત્તા અને તેની જાળવણી કરી રહેલી એજન્સીની ગંભીર બેદરકારી ખુલ્લી પાડી છે.

મળતી માહિતી અનુસાર, બસ સ્ટેશનના ઉપરના હિસ્સાનું બાંધકામ અચાનક તૂટી પડ્યું હતું. ભારેખમ સ્ટ્રક્ચર નીચે આવતા ત્યાં હાજર મુસાફરોમાં ચીસાચીસ મચી ગઈ હતી. ઘટનાની ગંભીરતા જોતા તાત્કાલિક ફાયર બ્રિગેડની ટીમ અને પોલીસનો મોટો કાફલો ઘટનાસ્થળે દોડી આવ્યો હતો. ફાયર વિભાગ દ્વારા કાટમાળ ખસેડીને બચાવ કામગીરી શરૂ કરવામાં આવી હતી, જેમાં એક વ્યક્તિ મૃત હાલતમાં મળી આવી હતી.પોલીસે સુરક્ષાના કારણોસર સમગ્ર વિસ્તારને કોર્ડન કરી લીધો છે.

વડોદરાનું આ બસ ટર્મિનલ ગુજરાતના આધુનિક પ્રોજેક્ટ્સમાંનું એક ગણાય છે, અંદાજે 110 કરોડના ખર્ચે 20,300 ચોરસ મીટરમાં ફેલાયેલું આ ટર્મિનલ PPP (Public-Private Partnership) મોડલ હેઠળ બનાવાયું છે. Sphere Cube Infrastructure Pvt. Ltd. નામની કંપનીને આગામી 31 વર્ષ સુધી આ ટર્મિનલના સંચાલન અને જાળવણીની જવાબદારી સોંપવામાં આવી છે. સિંગાપુર, શાંઘાઈ અને હોંગકોંગ જેવા આંતરરાષ્ટ્રીય શહેરોના બસ સ્ટેશનોનો અભ્યાસ કરીને આ ડિઝાઇન તૈયાર કરવામાં આવી હતી.

આ ઘટનાએ ટર્મિનલની મેન્ટેનન્સ અને સુરક્ષા વ્યવસ્થાને લઈને ગંભીર પ્રશ્નો ઊભા કર્યા છે. કરોડો રૂપિયાના ખર્ચે બનેલા અને આંતરરાષ્ટ્રીય ધોરણો ધરાવતા ટર્મિનલમાં આવી ઘટના બનતા લોકોમાં રોષ ફાટી નીકળ્યો છે. સંચાલન સંભાળતી કંપનીની જવાબદારી સામે પણ હવે સવાલો ઊભા થઈ રહ્યા છે.

1...172173174...765Page 173 of 765