દાહોદ જિલ્લાના ગરબાડા તાલુકાના પાટીયાઝોલ પુલ પર આજે એક વિચિત્ર અને શરમજનક ઘટના સામે આવી છે. મધ્યપ્રદેશથી ગુજરાત તરફ આવી રહેલી લીલા નારિયેળ ભરેલી એક લોડિંગ ટ્રક પલટી મારી જતા અકસ્માત સર્જાયો હતો. જોકે, અકસ્માત બાદ ઇજાગ્રસ્તોની મદદ કરવાને બદલે સ્થાનિક લોકોમાં નારિયેળ લૂંટવાની દોડધામ મચી ગઈ હતી.મળતી માહિતી મુજબ, પાટીયાઝોલ પુલ પર ટ્રક ચાલકે સ્ટેયરિંગ પરથી કાબૂ ગુમાવતા ટ્રક પલટી ખાઈ ગઈ હતી. ટ્રકમાં ભરેલા સેંકડો લીલા નારિયેળ રસ્તા પર વેરાઈ ગયા હતા. અકસ્માતની જાણ થતા જ આસપાસના લોકો ઘટનાસ્થળે દોડી આવ્યા હતા, પણ ઇજાગ્રસ્ત ડ્રાઈવર કે કંડક્ટરને મદદ કરવાને બદલે લોકો જે હાથમાં આવે તે રીતે નારિયેળ લૂંટીને ભાગવા લાગ્યા હતા.

ઘટનાની જાણ થતા જ ગરબાડા પોલીસનો કાફલો સ્થળ પર પહોંચ્યો હતો અને લાઠીના જોરે લૂંટ ચલાવી રહેલા લોકોને ભગાડી પરિસ્થિતિ પર કાબૂ મેળવ્યો હતો. અકસ્માતમાં ઘવાયેલા ડ્રાઈવર અને કંડક્ટરને તાત્કાલિક 108 એમ્બ્યુલન્સ મારફતે સારવાર અર્થે હોસ્પિટલ ખસેડવામાં આવ્યા છે. ઉલ્લેખનીય છે કે, પાટીયાઝોલ પુલ પર અવારનવાર અકસ્માતો સર્જાતા હોવા છતાં લોકોની આવી સંવેદનહીનતા ચર્ચાનો વિષય બની છે.

ગુજરાતનું ‘છોટા કાશી’ ગણાતું જામનગર અત્યારે માત્ર તેના ઉદ્યોગો કે બાંધણી માટે નહીં, પરંતુ રાજકીય ગરમાવાને કારણે ચર્ચાનું કેન્દ્ર બન્યું છે. મહાનગરપાલિકાની ચૂંટણીમાં આ વખતે એવો ઇતિહાસ રચાવા જઈ રહ્યો છે, જે લોકશાહીની મૂલ્યનિષ્ઠા સામે અનેક સવાલો ઉભા કરે છે. જામનગરના રાજકીય ફલક પર પ્રથમ વખત એવા ત્રણ આગેવાનો નસીબ અજમાવવા જઈ રહ્યા છે, જેમના પર રાજ્યના સૌથી કડક કાયદા પૈકીના એક એવા ‘ગુજસીટોક’ હેઠળ ગંભીર ગુનાઓ નોંધાયેલા છે.

જામનગર મહાનગરપાલિકાની આગામી ચૂંટણીમાં જે પ્રકારની ઉમેદવારોની પસંદગી થઈ રહી છે, તે જોતા સ્પષ્ટ લાગે છે કે રાજકીય પક્ષો માટે જીત એ જ એકમાત્ર માપદંડ બની ગયો છે. કોંગ્રેસ દ્વારા વોર્ડ નં.૧૬માં પૂર્વ કોર્પોરેટર અતુલ ભંડેરીની પસંદગી કરવામાં આવી છે. તેમનો રાજકીય પ્રવાસ પક્ષપલટાથી ભરેલો રહ્યો છે. સૌપ્રથમ કોંગ્રેસ, પછી ભાજપ અને હવે ફરી કોંગ્રેસ. જો કે, તેમની ઓળખ માત્ર પક્ષપલટા પૂરતી મર્યાદિત નથી. અગાઉ ગુજસીટોક પ્રકરણમાં સંડોવાયેલા હતા અને જેલવાસ પણ ભોગવી ચૂક્યા છે. હાલ જામીન પર મુક્ત થતાં જ તેમને પક્ષે ટિકિટ આપતા રાજકીય વર્તુળમાં ભારે ગણગણાટ જોવા મળી રહ્યો છે.

બીજી તરફ કોંગ્રેસના જ પૂર્વ વિપક્ષી નેતા અલ્તાફ ખફી પણ આ વખતે ચૂંટણી મેદાનમાં છે. તેમનું નામ પણ ગુજસીટોકના ગંભીર ગુનાઓમાં ઉછળ્યું હતું. પક્ષના પૂર્વ હોદ્દેદાર હોવાના નાતે તેમની પકડ મજબૂત મનાય છે, પરંતુ અપરાધના ઓછાયા હેઠળની તેમની ઉમેદવારી વિરોધ પક્ષ માટે મોટું હથિયાર બની રહી છે. આ ઉપરાંત આમ આદમી પાર્ટી પણ ‘રાજકારણના અપરાધીકરણ’ની રેસમાં પાછળ નથી. ‘આપ’ તરફથી પૂર્વ કોર્પોરેટર અસલમ ખિલજી મેદાનમાં છે. નોંધનીય છે કે, તેમની સામેના કેસો એટલા ગંભીર છે કે તેમને ચૂંટણી લડવા માટે રાજકોટની કોર્ટ પાસેથી ખાસ મંજૂરી મેળવવી પડી છે. 

માત્ર ગુજસીટોક જ નહીં, ભ્રષ્ટાચારના કેસો પણ આ ચૂંટણીમાં મુખ્ય મુદ્દો છે. વોર્ડ નં. 6માં ગત ટર્મમાં બસપાના સિમ્બોલ પરથી ચૂંટાયેલા પૂર્વ કોર્પોરેટર, જેઓ મનપાની કચેરીમાં જ લાંચ લેતા રંગેહાથ ઝડપાયા હતા, તેઓ પણ હવે પંજાના સહારે મેદાનમાં ઉતરે તેવી પૂરેપૂરી શક્યતા છે. જેલમાં જઈ આવ્યા બાદ બે દિવસ પહેલા જ તેમનું કોંગ્રેસમાં સ્વાગત કરવામાં આવ્યું છે, જે પક્ષની નૈતિકતા સામે મોટા પ્રશ્નાર્થ ચિન્હો ઉભા કરે છે.

અમરેલી જિલ્લાના સાવરકુંડલા તાલુકાના મિતિયાળામાં ભૂકંપોનો સિલસિલો શાંત થવાનું નામ લેતો નથી. ગઈકાલે પરોઢીયે 3.3ના તીવ્ર ભૂકંપ બાદ ફરી રાત્રિના 1.14 વાગ્યે 3.0નો તીવ્ર ભૂકંપ એક જ વિસ્તારમાં ઉદ્ભવ્યો હતો અને ગત 30 કલાકમાં ભૂકંપના નાના-મોટા 14 આંચકા નોંધાયા છે. 

અમરેલીથી વિશેષ અહેવાલ મૂજબ લોકો પરોઢીયે ચારેક વાગ્યે અને ગત મોડી રાત્રે તીવ્ર ભૂકંપથી લોકો ભરઉંઘમાંથી જાગી ગયા હતા અને ઘરબહાર દોડી ગયા હતા. આ ભૂકંપ પછી 1.37 વાગ્યે, સવારે 4.18 વાગ્યે, 8.58 વાગ્યે, 4.16 વાગ્યે, 4.24 વાગ્યે, 4.57 વાગ્યે, 7 વાગ્યે, 7.15 વાગ્યે, 7.51 વાગ્યે એમ ઉપરાઉપરી કૂલ 14આંચકા અને ત્યારબાદ પણ કંપન ચાલુ રહ્યું છે. સતત ભૂકંપો કે જેની ધ્રુજારી અનુભવાય છે તેનાથી લોકોમાં ભયની વ્યાપક લાગણી પ્રસરી છે. વર્ષોથી અમરેલીના આ વિસ્તારમાં સેંકડો ભૂકંપો આવી રહ્યા છે જેનું કેન્દ્રબિંદુ અમરેલીથી 35થી 45 કિ.મી. દક્ષિણ-દક્ષિણ-પશ્ચિમ દિશાએ મિતિયાળા આસપાસ રહ્યું છે અને આ ભૂકંપોની ઉંડાઈ 8- 9 કિ.મી. એટલે કે ધરતીની ઉપરી સપાટીએ ઉદ્ભવે છે.