કરજણ નવાબજાર વિસ્તારના શાકમાર્કેટમાં શાકભાજી લેવા માટે જતી એક મહિલાને વાતોમાં ફોસલાવી વેપારીને ત્યાં કામ કરતો ૫૫ વર્ષનો એક વિધમી ઓરડીમાં લઇ જઇ બે માસ સુધી દુષ્કર્મ આચરતા આધેડ વિધર્મીની પોલીસે ધરપકડ કરી છે.

પ્રાપ્ત માહિતી મુજબ જલારામનગરમાં સંતોષનગર ખાતે રહેતો શરીફ ઇબ્રાહિમ પટેલ શાકમાર્કેટમાં એક વેપારીને ત્યાં નોકરી કરે છે. શાકભાજીની દુકાનમાં આશરે ૩૫ વર્ષની એક મહિલા શાકભાજી લેવા માટે આવે ત્યારે શરીફ પટેલ મહિલાને પોતાની વાતમાં ફોસલાવતો હતો. આ મહિલા થોડી માનસિક અસ્વસ્થ હતી જેથી તેનું લગ્ન પણ થયું ન હતું તેનો લાભ ઉઠાવી આધેડ શરીફ પટેલ મહિલાને શાકમાર્કેટ પાછળની એક ઓરડીમાં લઇ જતો હતો અને તેના પર દુષ્કર્મ ગુજારતો હતો.

બે મહિના સુધી વારંવાર દુષ્કર્મ ગુજારતા મહિલા ગર્ભવતી થઇ હતી અને તેનું મેડિકલ ચેકઅપ કરાવતા તેને બે માસનો ગર્ભ હોવાનું જાણવા મળ્યું હતું. દરમિયાન શાકભાજીના વેપારીને ત્યાં કામ કરતા શરીફનું નામ ખુલતા આ અંગે કરજણ પોલીસ સ્ટેશનમાં ફરિયાદ દાખલ થઇ હતી જેના આધારે પોલીસે તેની ધરપકડ કરી હતી. પોલીસ તપાસમાં જાણવા મળ્યું હતું કે ૫૫ વર્ષનો શરીફ પરિણીત અને બે સંતાનોનો પિતા છે.

એમ.એસ.યુનિવર્સિટીમાં એક તરફ મોટાભાગની ફેકલ્ટીઓમાં વાર્ષિક પરીક્ષાઓ ચાલી રહી છે તો બીજી તરફ યુનિવર્સિટીના સેંકડો કર્મચારીઓ અને શિક્ષકોને મ્યુનિસિપલ કોર્પોરેશનની ચૂંટણી માટે ફરજ સોંપવામાં આવી છે.જેના કારણે યુનિવર્સિટી સત્તાધીશો અને ડીન મૂંઝવણમા મૂકાયા છે.

મળતી વિગતો પ્રમાણે ચૂંટણી માટે જિલ્લા ચૂંટણી તંત્ર દ્વારા શુક્રવારે તાલીમ આપવાનું આયોજન કરવામાં આવ્યું છે.બીજી તરફ ૭ એપ્રિલથી ફેકલ્ટીઓમાં પરીક્ષા ચાલી રહી હોવાથી ચૂંટણી તાલીમમાં જનારા અધ્યાપકો અને કર્મચારીઓ પરીક્ષાની ફરજ બજાવવા હાજર નહીં રહી શકે.છેલ્લી ઘડીએ પરીક્ષા રદ કરી શકાય તેમ પણ નથી.જેના કારણે  ફેકલ્ટી ડીનોને વૈકલ્પિક વ્યવસ્થા કરવાની ફરજ પડી છે.આ મુદ્દે ફેકલ્ટીઓમાંથી યુનિવર્સિટી હેડ ઓફિસમાં પણ રજૂઆતો થઈ હતી.જેના કારણે સત્તાધીશોએ જિલ્લા ચૂંટણી તંત્રને પરીક્ષાની કામગીરી સાથે જોડાયેલા અધ્યાપકો અને કર્મચારીઓને ચૂંટણીની ફરજ નહીં સોપવા માટે પણ અપીલ કરી છે.જોકે જિલ્લા તંત્ર આ અપીલ માન્ય રાખે તેવી શક્યતાઓ ઓછી છે.

યુનિવર્સિટીના પરીક્ષા વિભાગનું કહેવું છે કે, ચૂંટણીની તાલીમ હોવા છતા ફેકલ્ટીઓને પરીક્ષા લેવામાં વાંધો નહીં આવે.કોઈ ફેકલ્ટી તરફથી પરીક્ષા રદ કરવા માટે ભલામણ થઈ નથી.

મેનેજમેન્ટ ફેકલ્ટીને કેમ્પસ ઈન્ટરવ્યૂમાં પસંદ થયેલા

વિદ્યાર્થીઓ માટે તા.૧ મે પહેલા પરીક્ષા પૂરી કરવી પડે તેમ છે

યુનિવર્સિટીની મેનેજમેન્ટ ફેકલ્ટીની હાલત કફોડી છે.મેનેજમેન્ટ ફેકલ્ટીમાં હાલમાં પરીક્ષા ચાલી રહી છે અને લગભગ તમામ કર્મચારીઓ અને અધ્યાપકોને ચૂંટણીની ફરજ સોંપાઈ છે.તેમને તાલીમ માટે પણ જવાનું છે.બીજી તરફ સત્તાધીશોને પરીક્ષા તા.૧ મે પહેલા પૂરી કરવી પડે તેમ છે.કારણકે પરીક્ષા આપી રહેલા ૪૫ જેટલા વિદ્યાર્થીઓની કેમ્પસ ઈન્ટરવ્યૂમાં જ નોકરી માટે પસંદગી થઈ ચૂકી છે.આ વિદ્યાર્થીઓને તા.૧ મેના રોજ નોકરી પર હાજર થવાનું છે.આમ સત્તાધીશોને આ વિદ્યાર્થીઓ માટે કોઈ પણ સંજોગોમાં પરીક્ષા લેવી પડે તેમ છે.મેનેજમેન્ટ ફેકલ્ટી ડીને આ મુદ્દે ચૂંટણી તંત્રના એક અધિકારીને રજૂઆત પણ કરી હતી.જોકે જિલ્લા ચૂંટણી તંત્ર આ મુદ્દે અધ્યાપકો અને કર્મચારીઓને કોઈ પણ પ્રકારની રાહત આપવાના મૂડમાં નથી.

સ્થાનિક સ્વરાજની ચૂંટણીઓ જાહેર થતાં જ પોલીસતંત્ર પણ એલર્ટ બન્યું છે અને દારૃના જથ્થાની હેરાફેરી ઝડપી પાડવા માટે દોડાદોડી કરી રહ્યું છે. વાઘોડિયામાં બીયરનો જથ્થો લઇને જતા બે શખ્સોને ઝડપી પાડયા હતાં.

પ્રાપ્ત માહિતી મુજબ ભાનપુરાથી રુસ્તમપુરા તરફ એક ટુ વ્હિલર પર દારૃનો જથ્થો લઇને બે શખ્સો પસાર થવાના છે તેવી માહિતીના આધારે વાઘોડિયા પોલીસે વોચ ગોઠવી હતી અને બાતમી મુજબનું વાહન આવતા તેને રોકી તેમની પાસેનો સામાન ચેક કરતાં રૃા.૧.૧૮ લાખ કિંમતના ૫૯૩ નંગ બીયરના ટીન મળ્યા  હતાં. પોલીસે બીયરનો જથ્થો, મોબાઇલ તેમજ ટુ વ્હિલર સહિત કુલ રૃા.૧.૭૩ લાખનો મુદ્દામાલ જપ્ત કર્યો હતો.

ઝડપાયેલા બે શખ્સો મોન્ટુ અમરસિંગ રાઠવા (રહે.નાની સઢલી, હોળી ફળિયું, રંગપુર) અને મસ્તાભાઇ સેગજીભાઇ વસાવા (રહે.રુસ્તમપુરા વસાહત)ની પોલીસે દારૃના જથ્થા અંગે વધુ પૂછપરછ હાથ ધરી છે.

શહેરમાં છેલ્લા ૨પ દિવસ દરમિયાન માર્ગ અકસ્માતોની ચિંતાજનક સ્થિતિ સામે આવી છે. પોલીસ મથકના ચોપડે નોંધાયેલા આંકડા મુજબ કુલ ૩૨ અકસ્માતના બનાવો નોંધાયા છે, જેમાં ૯લોકોના મોત નિપજ્યા છે જ્યારે ૩૯ લોકો ઇજાગ્રસ્ત થયા છે.

શહેરમાં છેલ્લા કેટલાક સમયથી માર્ગ અકસ્માતોની સંખ્યામાં નોંધપાત્ર વધારો જોવા મળી રહ્યો છે. રોજબરોજ થતા નાના-મોટા અકસ્માતોના બનાવો નાગરિકોની સુરક્ષાને લઈને ગંભીર પ્રશ્નો ઉભા કરી રહ્યા છે. ખાસ કરીને ઓવર સ્પીડ મોટાભાગના અકસ્માતો પાછળનું મુખ્ય કારણ બની રહ્યું છે, જેના કારણે જીવલેણ પરિસ્થિતિ સર્જાઈ રહી છે. વાહનચાલકો ઝડપની મર્યાદાનો ભંગ કરી રહ્યા છે.

બીજી તરફ, શહેરમાં રખડતા પશુઓની સમસ્યા પણ ગંભીર બની રહી છે. રસ્તા વચ્ચે અચાનક પશુઓ આવી જતા વાહનચાલકો નિયંત્રણ ગુમાવી દે છે અને અકસ્માત સર્જાય છે. શહેરના ઘણા વિસ્તારોમાં જોખમી ડીવાઈડર કટ્સ હજુ પણ ખુલ્લા હોવાથી અકસ્માતનો ખતરો વધે છે. ચાલુ વાહને મોબાઇલફોન પર વાતો કરવી અને સતત લોકેશન નિહાળતા વાહન હંકારવું પણ અકસ્માતને નોતરું આપે છે. સાથે જ નશાની હાલતમાં વાહન ચલાવવાના બનાવો પણ ચિંતા વધારે છે.

આડેધડ પાર્કિંગ -દબાણોથી માર્ગ સાંકડા થયા

શહેરમાં ફૂટપાથ ઉપર લારી-ગલ્લા અને ગેરકાયદેસર પાર્કિંગના કારણે માર્ગો દિવસેને દિવસે સાંકડા બની રહ્યા છે, જેના પરિણામે ટ્રાફિક વ્યવસ્થા પર ગંભીર અસર પડી રહી છે. ખાસ કરીને રાહદારીઓ માટે ચાલવા યોગ્ય જગ્યા ન મળતા તેઓ રસ્તા પર ઉતરવા મજબૂર બને છે, આથી અકસ્માતનું જોખમ વધે છે.

પાર્કિંગની સુવિધામાં તંત્ર નિષ્ફળ

મોટાભાગના વિસ્તારોમાં રસ્તાની બંને તરફ વાહનોના પાર્કિંગના દ્રશ્યો સામાન્ય બની ગયા છે. માર્ગ સાંકડા થવાથી ટ્રાફિકમાં અવરજવર મુશ્કેલ બની રહી છે, સાથે જ નાના-મોટા અકસ્માતોના બનાવોમાં પણ વધારો થઈ રહ્યો છે. પાર્કિંગ સ્પેસ વગરના બાંધકામો શહેરમાં વધી રહ્યા છે, જૈના કારણે લોકો રસ્તા ૫૨જ વાહનો પાર્ક કરે છે. પરિણામે પિકઅવર્સ દરમિયાન માર્ગો પર સતત ટ્રાફિક જામ અને અકસ્માતની શક્યતાઓ ઊભી થાય છે.

ઓવર સ્પીડ અને બેદરકારીથી અક્સમાતો વધુ

નશાની હાલતમાં અકસ્માત – ૧

-રાહદારીઓને ટક્કર મારવાના બનાવો – ૭

-ઓવર સ્પીડના કારણે અકસ્માત – ૮

-બેદરકારીના કારણે અકસ્માત – ૭

(સ્લીપ થવું, વાહન પાછળ ઘૂસી જવું વગેરે)