અમરેલી જિલ્લાના રાજુલા પંથકમાં હનીટ્રેપ આચરીને નિર્દોષ લોકોને ફસાવતી ટોળકીને પોલીસે ઝડપી પાડી છે. હિંડોરણા ગામની સીમમાં એક યુવકને લઈ જઈ, મહિલા સાથે વીડિયો ઉતારીને તેને બદનામ કરવાની ધમકી આપી લાખો રૂપિયા પડાવવાનું કાવતરું પોલીસે નિષ્ફળ બનાવ્યું છે.

હિંડોરણા ગામની સીમમાં રચાયું હતું કાવતરું

મળતી માહિતી અનુસાર, થોડા દિવસો પહેલા એક મહિલા સહિત પાંચ શખસોએ હનીટ્રેપનું કાવતરું ઘડ્યું હતું. ફરિયાદી યુવકને રાજુલાના હિંડોરણા ગામની સીમમાં બાવળની કાંટમાં લઈ જવામાં આવ્યો હતો. ત્યાં પૂર્વ આયોજિત કાવતરા મુજબ મહિલા સાથે યુવકનો વીડિયો ઉતારી લેવામાં આવ્યો હતો. આ દરમિયાન અન્ય શખસોએ ત્યાં ધસી આવી યુવકને મૂંઢમાર મારી ડરાવી-ધમકાવીને લૂંટ ચલાવી હતી.

આરોપીઓએ યુવક પાસેથી બળજબરીથી 1950 રોકડ રૂપિયા અને તેનો મોબાઈલ ફોન પડાવી લીધા હતા. આટલેથી ન અટકતા, વીડિયો વાઈરલ ન કરવાના બદલામાં આરોપીઓએ 5 લાખ રૂપિયાની વધુ માંગણી કરી હતી. આરોપીઓએ યુવકને ઘરેથી પૈસા લેવા માટે મોકલ્યો હતો, પરંતુ ફરિયાદી ગભરાવાને બદલે સીધો રાજુલા પોલીસ મથકે પહોંચ્યો હતો અને સમગ્ર આપવીતી જણાવી હતી.

પોલીસની કાર્યવાહી અને ધરપકડ

આ મામલે રાજુલા પોલીસ તાત્કાલિક એક્શન આવી હતી. પોલીસે હનીટ્રેપના આ રેકેટમાં સામેલ મુખ્ય એક મહિલા સહિત કરણ પટાટ, જિતેન્દ્ર ચૌહાણ અને એક અન્ય આરોપીની ધરપકડ કરી છે.

DySP નયના ગોરડીયાએ આ સફળ ઓપરેશન બાદ પ્રેસ કોન્ફરન્સ યોજી હતી. તેમણે જણાવ્યું કે ‘આ કેસમાં હજુ એક અજાણ્યો આરોપી ફરાર છે, જેને પકડવા માટે ચક્રો ગતિમાન કર્યા છે. જો રાજુલા પંથકમાં અન્ય કોઈ વ્યક્તિ પણ આ પ્રકારે હનીટ્રેપનો શિકાર બની હોય, તો ડર્યા વગર રાજુલા પોલીસનો સંપર્ક કરે જેથી આ ટોળકીના અન્ય ગુનાઓનો પણ પર્દાફાશ થઈ શકે.’

નવસારી-સુરત સ્ટેટ હાઇવે પર આજે એક હૃદયદ્રાવક અકસ્માતની ઘટના સામે આવી છે. કોલાસણા પાટીયા પાસે એક પૂરઝડપે આવતી સ્વિફ્ટ ડિઝાયર કારના ચાલકે સ્ટેરીંગ પરથી કાબૂ ગુમાવતા કાર ડિવાઈડર કૂદીને સામેના ટ્રેક પર પહોંચી ગઈ હતી. આ ગંભીર અકસ્માતમાં કારમાં સવાર ચાર લોકો પૈકી એક વ્યક્તિનું ઘટનાસ્થળે જ કમકમાટીભર્યું મોત નીપજ્યું છે, જ્યારે અન્ય ત્રણ લોકોને ગંભીર ઇજાઓ પહોંચી છે.

પ્રાપ્ત વિગતો અનુસાર, સ્વિફ્ટ ડિઝાયર કાર સુરતથી નવસારી તરફ આવી રહી હતી. કોલાસણા પાટીયા નજીક અચાનક ચાલકે કાબૂ ગુમાવતા કાર એટલી જોરદાર પલટી ખાઈ ગઈ હતી કે તે ઉછળીને સીધી સામેના રોડ (ટ્રેક) પર જઈ પડી હતી. અકસ્માત એટલો ભીષણ હતો કે કારનો કચ્ચરઘાણ નીકળી ગયો હતો. માર્ગ પરથી પસાર થતા અન્ય વાહનચાલકોએ તુરંત જ બચાવ કામગીરી શરૂ કરી હતી અને ઇજાગ્રસ્તોને કારમાંથી બહાર કાઢ્યા હતા.

ઘટનાની જાણ થતા જ નવસારી પોલીસનો કાફલો તાત્કાલિક સ્થળ પર દોડી આવ્યો હતો. પોલીસે પ્રથમ રાહત અને બચાવ કામગીરી હાથ ધરી તમામ ઘાયલોને તાત્કાલિક સારવાર માટે નજીકની હોસ્પિટલમાં ખસેડ્યા હતા, જ્યાં તેમની હાલત નાજુક હોવાનું જાણવા મળ્યું છે. પોલીસે મૃતદેહને પોસ્ટમોર્ટમ માટે ખસેડી આ મામલે કાયદેસરની તપાસ શરૂ કરી છે. હાઇવે પર અકસ્માતને પગલે થોડો સમય ટ્રાફિક જામના દ્રશ્યો પણ સર્જાયા હતા.

ગુજરાતમાં આગામી સમયમાં યોજાનારી મહાનગરપાલિકાઓ, નગરપાલિકાઓ, જિલ્લા અને તાલુકા પંચાયતોની સામાન્ય તથા પેટા ચૂંટણીઓ માટે રાજ્ય ચૂંટણી આયોગે કમર કસી છે. ચૂંટણી પ્રક્રિયા સંપૂર્ણપણે નિષ્પક્ષ, મુક્ત અને ન્યાયપૂર્ણ વાતાવરણમાં સંપન્ન થાય તે હેતુથી આયોગ દ્વારા રાજ્યના 34 ઉચ્ચ વહીવટી અધિકારીઓને વિવિધ જિલ્લાઓ માટે ચૂંટણી નિરીક્ષક (Election Observers) તરીકે નિયુક્ત કરવાનો મહત્વનો હુકમ કરવામાં આવ્યો છે. આ અધિકારીઓમાં સિનિયર IAS અધિકારીઓનો પણ સમાવેશ થાય છે, જેમને અલગ-અલગ જિલ્લાઓની જવાબદારી સોંપાઈ છે.

રાજ્ય ચૂંટણી આયોગના સચિવ આર. જી. ગોહિલ દ્વારા જાહેર કરવામાં આવેલા હુકમ અનુસાર, અમદાવાદ મહાનગરપાલિકા અને જિલ્લાની જવાબદારી અવંતીકા સિંઘ ઔલખને સોંપવામાં આવી છે. તેવી જ રીતે, સુરત માટે ડૉ. વિનોદ રાવ, વડોદરા માટે લોચન સેહરા, રાજકોટ માટે આલોક કુમાર પાંડે અને ભાવનગર-બોટાદ જિલ્લા માટે કુ. આર્દ્રા અગ્રવાલની નિમણૂક કરવામાં આવી છે. આ નિરીક્ષકો મતદાન મથકોની મુલાકાત લેશે, આદર્શ આચાર સંહિતાનું પાલન કરાવશે અને કાયદો-વ્યવસ્થાની સ્થિતિ પર સીધી દેખરેખ રાખશે.

નિયુક્ત કરાયેલા નિરીક્ષકોને મતદાનના દિવસ સુધીનો પ્રથમ અહેવાલ અને મતગણતરી બાદનો બીજો અહેવાલ આયોગને રજૂ કરવાના રહેશે. તેઓ મતદાન મથકે પ્રવેશ કરી શકશે, ઉમેદવારોના ખર્ચના રજિસ્ટર તપાસી શકશે અને EVM મશીનોના ઉપયોગ અંગેની તાલીમનું પણ નિરીક્ષણ કરશે. આ ઉપરાંત, સંવેદનશીલ વિસ્તારોમાં મતદાન દૂષિત ન થાય તેની ખાસ તકેદારી રાખવાની જવાબદારી પણ નિરીક્ષકોના શિરે રહેશે

આ ચૂંટણી નિરીક્ષકોની કામગીરી અને માર્ગદર્શન માટે તા. 10-04-2026ના રોજ બપોરે 12:00 કલાકે ગાંધીનગર સચિવાલય ખાતે એક મહત્વની બ્રીફિંગ બેઠકનું આયોજન કરવામાં આવ્યું છે. આ બેઠકમાં તમામ અધિકારીઓને ચૂંટણીલક્ષી સાહિત્ય અને જરૂરી સૂચનાઓ પૂરી પાડવામાં આવશે. રાજ્ય ચૂંટણી આયોગના આ કડક પગલાથી ચૂંટણી પ્રક્રિયા વધુ પારદર્શક બનશે તેવી અપેક્ષા સેવાઈ રહી છે.