રાજકોટ, : જૂનાગઢ જિલ્લાની જીવાદોરી સમાન ઓઝત નદી ઘણા સમયથી ખનીજ માફિયાઓના લાલચુ પંજામાં ફસાઈ છે. વંથલી પંથકમાં મોટાપાયે રેતીનું ગેરકાયદે ખનન થઈ રહ્યું હોવાની બાતમી પરથી રાજકોટ સ્થિત ખાણ ખનીજ વિભાગની ફ્લાઈંગ સ્કવોડની ટીમે ત્રાટકીને ઓઝત નદીમાં પાણી હોવા છતાં વેક્યુમ સિસ્ટમથી ડ્રેજીંગ કરીને પેટાળમાંથી રેતી ઉલેચતા 8 મોટા બાર્જ અને 4 હોડી ઉપરાંત 2 ટ્રક સહિતના રૂા. 1.28 કરોડના સાધનો ઉપરાંત 2000 ટન રેતીનો જથ્થો ઝડપી લઈને ખનીજ માફિયાઓમાં ફફડાટ ફેલાવી દીધો છે. અહીંથી 6 શખ્સોને સકંજામાં લઈને મુખ્ય ખનીજમાફિયાની શોધખોળ હાથ ધરી હતી.

રાજકોટ ફ્લાઈંગ સ્કવોડના મદદનીશ નિયામકની ટીમે બાતમીના આધારે કણજડીથી વંથલી વચ્ચેના ઓઝત નદીના પટ્ટમાં ઓચિંતી તપાસ હાથ ધરી હતી. જેમાં ખુલ્યું કે, કોઈપણ સિંચાઈ પ્રોજેક્ટ કે નદી પરના પુલથી 500 મીટરની ત્રિજ્યામાં રેતી ખનન પર પ્રતિબંધ હોવા છતાં વંથલી પાસે નેશનલ હાઈવેના પુલથી માત્ર 350 મીટરના અંતરે માફિયાઓ નિર્ભય બનીને રેતી ચોરી કરી રહ્યા હતા. તપાસ દરમિયાન રૂા. 40 લાખના 8 મોટા બાર્જ (મશીનરી સજ્જ બોટ), રૂા. 8 લાખની 4 નાની નાવડી ઉપરાંત રૂા. 80 લાખની કિંમતના રેતી ભરેલા 2 ટ્રક-ડમ્પર મળીને કુલ અંદાજે રૂા. 1.28 કરોડથી વધુનો મુદ્દામાલ સીઝ કરવામાં આવ્યો હતો. આ સાથે સ્થળ પરથી છ શખ્સોને સકંજામાં લેવાયા હતા, જ્યારે અન્ય ઈસમો નાસી છૂટયા હતા. જેથી તમામ મશીનરી અને વાહનો સીઝ કરાયા હતા. આ ઉપરાંત 2000 ટન રેતીનો જથ્થો મળ્યો હતો, જેની માપણી ચાલુ કરવામાં આવી હતી. નોંધનીય છે કે, ખનીજ ચોરોએ નદીમાં પાણી ભરેલું હોવાથી ખાસ પ્રકારના ‘બાર્જ’ (મોટી બોટ) ઉતાર્યા હતા. જેમાં હાઈ-પાવર વેક્યુમ મશીનરી ફીટ કરવામાં આવી હતી, જે નદીના તળિયેથી રેતી ઉલેચીને બહાર કાઢે છે. આ હાઈટેક ખનીજચોરીમાં નદીના એક છેડાથી બીજા છેડા સુધી ચેનલ બનાવીને ઊંડા ખાડા પણ પાડી દેવામાં આવતા હોય છે. આ ગેરકાયદે પ્રવૃત્તિને કારણે નદીમાં રહેલા જળચર જીવોના રહેઠાણો નાશ પામે છે અને માછલીઓ સહિતના જીવો પર અસ્તિત્વનું જોખમ ઊભું થાય છે.

એક બોટ વડે 25 ટનથી વધુ રેતી ઉલેચાતી હતી!

રાજકોટ ફ્લાઈંગ સ્કવોડની તપાસ દરમિયાન અંદાજે 2000 ટન સાદી રેતીનો જથ્થો પકડાયો હતો. એક બોટ દ્વારા દરરોજ 25 ટન જેટલી રેતી કાઢવામાં આવતી હોવાનું પ્રાથમિક રોજકામમાં બહાર આવ્યું છે. આ આંકડા પરથી અંદાજ લગાવી શકાય છે કે દરરોજ લાખો રૂપિયાની સરકારી રોયલ્ટીની ચોરી કરવામાં આવતી હતી.

જેતપુરનાં ઉદ્યોગનગર પોલીસ મથક વિસ્તારમાં આવેલ ખેતલીયા ટેક્સટાઇલમાં સંગ્રહ કરાયેલા એલપીજી સિલિન્ડર મળી આવ્યા બાદ પોલીસે મહાદેવ ગેસ એજન્સીનાં ગોડાઉનને સીઝ કરી દીધું છે. 2 આરોપીઓ સામે ગુનો નોંધી પોલીસે અટકાયત કરી છે.

ચોક્કસ બાતમીના આધારે SOGના પીએસઆઇ જી.જે. ઝાલાએ ખેતલીયા ટેક્સટાઇલમાં દરોડો પાડયો હતો. તે વખતે ત્યાંથી 69 ભરેલા અને 24 ખાલી LPG સિલિન્ડર મળી આવ્યા હતા. જેનો ઉપયોગ સાડી પ્રિન્ટીંગના હેતું માટે કરાતો હતો. આજ કારણથી એલપીજી સિલિન્ડરનો ગેરકાયદે રીતે સંગ્રહ કરાયો હતો. તમામ એલપીજી સિલિન્ડર મહાદેવ ગેસ એજન્સીમાંથી આવ્યાનું ખુલતાં એસઓજીએ તેનું ગોડાઉન સીઝ કરી દીધું હતું. આ અંગે ખેતલીયા ટેક્સટાઇલનાં માલિક ફેનીલ જીતેન્દ્રભાઇ પાદરીયા (રહે. જૂનાગઢ રોડ, જેતપુર) અને મહાદેવ ગેસ એજન્સીનાં સંચાલક રાજ ભાવેશભાઇ સાકરીયા (રહે. ગંગા-જમુના રેસિડેન્સી, જેતપુર) વિરૂદ્ધ એલપીજી ગેસ સિલિન્ડરની ગેરકાયદે રીતે સંગ્રહખોરી કરવાની, ફાયર સેફ્ટીની જોગવાઇઓનો ભંગ કરવાની, સંગ્રહ અને વપરાશ ક્ષમતા કરતા વધુ માત્રામાં ગેસ સિલિન્ડરનું વેંચાણ કરવાની અને ગેસ સિલિન્ડર રૂલ્સની જોગવાઇઓનો ભંગ કરવા સહિતની બાબતોએ કાર્યવાહી કરી હતી.

એસઓજીએ એલપીજીના ખાલી અને ભરેલા સિલિન્ડર ઉપરાંત મોબાઇલ ફોન મળી કુલ રૂા. 2.67 લાખનો મુદ્દામાલ કબજે કર્યો હતો. આરોપીઓ સામે આવશ્યક ચીજવસ્તુધારા, એક્સપ્લોઝીવ એક્ટ અને બીએનએસની જુદી-જુદી કલમો હેઠલ ગુનો દાખલ કર્યો હતો. 

રાજુલા પંથકમાં હનીટ્રેપ અને ખંડણીની ઘટના સામે આવી છે. વારાહ સ્વરૂપ ગામે રહેતા યુવાનને જાળમાં ફસાવી હીંડોરણા ગામે રહેતા મિત્રએ રાજુલાની સ્ત્રી મીત્ર સહિત પાંચ સાથે મળી તેને નિવસ્ત્ર કરી વીડિયો ઉતાર્યા બાદ વાયરલ કરવાની ધમકી આપી રૂા.5 લાખની માગણી કર્યાની રાજુલા પોલીસ મથકમાં ફરિયાદ નોંધાઇ છે.

વારાહ સ્વરૂપ ગામમાં રહેતા રોનકદાસ નામના યુવાને રાજુલા પોલીસ મથકમાં હીંડોરણા ગામનો મિત્ર કરણ દંતુભાઇ પટાટ, રાજુલાની સમીના સેલોત, જીતુ રાઘવભાઇ ચૌહાણ તથા બે અજાણ્યા સહિત પાંચ સામે ફરિયાદ નોંધાવી છે. રોનકદાસે ફરિયાદમાં જણાવ્યું છે કે, ગઇકાલે તે તેના મિત્રો સાથે રાજુલા મામલતદાર કચેરી ખાતે ગયો હતો. ત્યાં કામ પુરૂ કરી કચેરીએથી નીકળીને હીંડોરણા ગામ ચોકડી પાસે રસ પીવા માટે ઉભા હતા ત્યારે તેના મોબાઇલમાં હીંડોરણા ગામે રહેતો મિત્ર કરણ દંતુભાઇ પટાટનો ફોન આવ્યો હતો અને ક્યાં છો પૂછતા તેણે ગામની ચોકડી પાસે હોવાનું કહ્યું હતું. થોડીવાર બાદ કરણ ત્યાં બાઇક લઇને આવ્યો હતો અને કામ છે કહીં પોતાનું બાઇક ત્યાં મુકી દીધું હતું અને તેના બાઇક પર ક્રિષ્ના સોસાયટી પાસે બાવળની જાળીમાં લઇ ગયો હતો.

 ત્યારબાદ આરોપીઓએ યુવક પર હુમલો કરી ગાલ પર લાફા ઝીંકી દીધા હતા અને ઢીકાપાટુનો માર મારી આરોપીઓએ યુવકને ડરાવી-ધમકાવી તેની સાથે રહેલી એક મહિલા સાથે ખરાબ કામ કરવાનું કહીં તેનો વીડિયો ઉતાર્યો હતો. આરોપીઓએ યુવકને નિર્વસ્ત્ર કરી લાકડીઓ વડે માર માર્યો હતો. આ ક્રૂરતાનો વીડિયો પણ આરોપીઓએ મોબાઇલમાં કેદ કર્યો હતો. એટલું જ નહીં યુવકના ખિસ્સામાંથી રૂા. 1,950 રોકડા બળજબરીથી કાઢી લીધા હતા અને તેનો નવો મોબાઇલ ફોન પણ લૂંટી લીધો હતો. ત્યારબાદ યુવકને ધમકી આપી હતી કે, જો તે 5 લાખ રૂપિયા નહીં આપે તો તેનો વીડિયો વાયરલ કરી દેવામાં આવશે અને તેને બળાત્કારના ખોટા કેસમાં ફસાવી દેવામાં આવશે. યુવકને જાનથી મારી નાખવાની ધમકી આપી આરોપીઓ ફરાર થઇ ગયા હતા. આ મામલે રાજુલા પોલીસે તપાસ હાથ ધરી છે