ઉત્તર પ્રદેશના મેરઠ જિલ્લામાં આજે સવારે એક ભયાનક અકસ્માત સર્જાયો હતો, જેમાં સેન્ટ મેરી સ્કૂલના માસૂમ બાળકોનો આબાદ બચાવ થયો છે. દૌરાલા લવાડ રોડ પર ૪૮ બાળકોથી ભરેલી સ્કૂલ બસ અચાનક કાબુ ગુમાવી બેસતા રસ્તાની બાજુના ઊંડા ખાડામાં પલટી ગઈ હતી. આ અકસ્માત એટલો જોરદાર હતો કે જો બસ એક મોટા ઝાડ સાથે ન અથડાઈ હોત, તો કદાચ કોઈ મોટી જાનહાનિ થઈ શકી હોત.

સેન્ટ મેરી સ્કૂલ, ખેડીની આ બસ રોજની જેમ બાળકોને લઈને સ્કૂલે જઈ રહી હતી. અચાનક ચાલકે સ્ટીયરિંગ પરથી કાબુ ગુમાવતા બસ રસ્તા નીચે ઉતરી ગઈ અને પલટી ખાઈ ગઈ. બસ પલટી જતાં જ અંદર સવાર બાળકોમાં ગભરાટ ફેલાઈ ગયો હતો અને આખો વિસ્તાર બાળકોની ચીસોથી ગુંજી ઉઠ્યો હતો. બસ પલટી ખાઈને સીધી એક ઘટાદાર ઝાડ સાથે અથડાઈને અટકી ગઈ હતી, જેના કારણે તે વધુ ગબડતા કે સંપૂર્ણપણે ચગદાઈ જતા બચી ગઈ હતી.

ઘટનાની જાણ થતા જ આસપાસના ગ્રામજનો અને રસ્તે પસાર થતા લોકો તરત જ મદદે દોડી આવ્યા હતા. લોકોએ બસના કાચ તોડીને અને ઈમરજન્સી એક્ઝિટ દ્વારા બાળકોને એકપછી એક બહાર કાઢવાનું શરૂ કર્યું હતું. આ દરમિયાન પોલીસને પણ જાણ કરવામાં આવી હતી. સ્થાનિક લોકોની ત્વરિત કામગીરીને કારણે બાળકોને સમયસર સુરક્ષિત બહાર કાઢી શકાયા હતા.

આ અકસ્માતમાં ઘણા બાળકોને નાની-મોટી ઈજાઓ પહોંચી છે. પોલીસ કાફલાએ ઘટનાસ્થળે પહોંચી તમામ ઈજાગ્રસ્ત બાળકોને નજીકની હોસ્પિટલમાં સારવાર અર્થે ખસેડ્યા હતા. સદનસીબે, કોઈ બાળક ગંભીર રીતે ઘાયલ થયું નથી. અકસ્માતની જાણ થતા જ બાળકોના વાલીઓ પણ હોસ્પિટલ દોડી આવ્યા હતા. જે બાળકોને સામાન્ય ઈજા હતી, તેમને પ્રાથમિક સારવાર આપી ઘરે મોકલી દેવાયા હતા.

પોલીસે આ મામલે ડ્રાઈવરની બેદરકારી છે કે વાહનમાં કોઈ ટેકનિકલ ખામી હતી, તે દિશામાં તપાસ હાથ ધરી છે. બસને ક્રેઈન દ્વારા ખાડામાંથી બહાર કાઢવાની કામગીરી પણ હાથ ધરાઈ હતી. આ ઘટનાએ ફરી એકવાર સ્કૂલ બસોની સુરક્ષા અને ડ્રાઈવરોની સતર્કતા સામે પ્રશ્નો ઉભા કર્યા છે.

પંજાબ અને હરિયાણા હાઈકોર્ટે રાજદ્રોહના કેસમાં સ્વયંભૂ સંત રામપાલના જામીન મંજૂર કર્યા છે. રામપાલને લગભગ 11 વર્ષ પછી મળેલી આ રાહતથી રામપાલના સમર્થકો ખૂબ જ ખુશ છે. સંત રામપાલ હાલમાં હરિયાણાની હિસાર જેલમાં બંધ છે. 2014માં હરિયાણાના બરવાલામાં સતલોક આશ્રમમાં વહીવટીતંત્ર અને તેના સમર્થકો વચ્ચે થયેલી મોટી અથડામણ બાદ તેમની ધરપકડ કરવામાં આવી હતી. આ અથડામણ દરમિયાન 6 લોકોના મોત થઈ ગયા હતા અને અન્ય ઘણા લોકો ઘાયલ થયા હતા. આ કેસ સાથે જોડાયેલા વિવિધ આરોપોમાં રામપાલ વિરુદ્ધ અનેક કેસ નોંધાયા હતા, જેમાં રાજદ્રોહનો કેસ પણ સામેલ હતો.

હાઈકોર્ટમાંથી જામીન મળવા છતાં સંત રામપાલની જેલમાંથી મુક્તિ અન્ય કેસોની કાનૂની સ્થિતિ પર નિર્ભર કરશે, કારણ કે તેમની સામે વિવિધ અદાલતોમાં અનેક કેસ પેન્ડિંગ છે. પ્રાપ્ત માહિતી પ્રમાણે જામીનની શરતોનું પાલન કરવું તેમના માટે અનિવાર્ય હશે. સંત રામપાલ સતલોક આશ્રમના પ્રમુખ છે અને તેમના અનુયાયીઓ અનેક રાજ્યોમાં ફેલાયેલા છે. હાઈકોર્ટના આ નિર્ણય બાદ તેમના સમર્થકોમાં ખુશીનો માહોલ છે, બીજી તરફ વહીવટી સ્તર પર આગળની કાનૂની પ્રક્રિયા પર નજર રાખવામાં આવી રહી છે.

રામપાલ એક ભારતીય આધ્યાત્મિક ઉપદેશક અને સતલોક આશ્રમના સ્થાપક છે. તેમનો જન્મ 1951માં ભારતના હરિયાણામાં થયો હતો. ધાર્મિક નેતા બનતા પહેલા તેઓ સિંચાઈ વિભાગમાં જુનિયર એન્જિનિયર તરીકે કામ કરતા હતા. તેમણે ભગવદ ગીતા, કબીર સાગર અને અન્ય ધર્મગ્રંથોની વ્યાખ્યાઓના આધારે આધ્યાત્મિક ઉપદેશોનો પ્રચાર કરવાનું શરૂ કર્યું. તેઓ 15મી સદીના સંત કબીરના ઉપદેશોનું પાલન અને પ્રચાર કરવાનો દાવો કરે છે. તેમના અનુયાયીઓ તેમને એક સંત (આધ્યાત્મિક ગુરુ) માને છે અને ભક્તિ અને મોક્ષ પ્રત્યેના તેમના દ્રષ્ટિકોણમાં વિશ્વાસ રાખે છે.

2006માં હરિયાણામાં રામપાલના અનુયાયીઓ અને અન્ય ધાર્મિક જૂથ વચ્ચે અથડામણ થઈ હતી, આ ઘટના બાદ તેઓ ચર્ચામાં આવ્યા હતા. ત્યારબાદ 2014માં હિસાર સ્થિત તેમના આશ્રમમાં પોલીસ સાથે હિંસક અથડામણમાં 6 લોકોના મોત થઈ ગયા હતા. પોલીસને ત્યારે રામપાલને પકડવામાં ખૂબ મુશ્કેલી પડી હતી. રામપાલ પર ગેરકાયદેસર કારાવાસ બનાવવો અને લોકો પર અત્યાચાર ગુજારવા જેવા અનેક ગંભીર આરોપો લાગ્યા છે, અને કેટલાક કિસ્સાઓમાં અદાલતોએ તેમની વિરુદ્ધ ચુકાદો આપ્યો છે. વિવાદો છતાં સમગ્ર ભારતમાં અને ખાસ કરીને ઉત્તરીય રાજ્યોમાં મોટી સંખ્યામાં તેમના અનુયાયીઓ છે. તેમનું સંગઠન આશ્રમ ચલાવે છે અને પુસ્તકો, ટીવી ચેનલો અને ઓનલાઈન પ્લેટફોર્મ દ્વારા ઉપદેશોનો પ્રસાર કરે છે.

મધ્ય પૂર્વમાં સીઝફાયર અને વૈશ્વિક સપ્લાય સંકટ વચ્ચે ભારત માટે રાહતના મોટા સમાચાર સામે આવ્યા છે. અંદાજે સાત વર્ષ બાદ ઈરાનથી ક્રૂડ ઓઈલનો સપ્લાય ફરી શરૂ થવા જઈ રહ્યો છે, અને આ વખતે વાર્તામાં એક રસપ્રદ વળાંક પણ છે. જે ક્રૂડ પહેલા ચીન જઈ રહ્યું હતું, તે જ હવે ભારત તરફ વળ્યું છે.

જાણકારી મુજબ, ક્યુરેકો ફ્લેગવાળું એક મોટું ક્રૂડ ટેન્કર ‘જયા’ હવે ભારતના પૂર્વી તટ તરફ આગળ વધી રહ્યું છે. આ એ જ જહાજ છે, જે પહેલા દક્ષિણ-પૂર્વ એશિયાના રસ્તે ચીન તરફ આગળ વધી રહ્યું હતું, પરંતુ અચાનક તેણે પોતાનો રસ્તો બદલી નાખ્યો. શિપિંગ ડેટાથી સ્પષ્ટ છે કે આ ફેરફાર કોઈ સામાન્ય વેપારી નિર્ણય કરતા વધારે, બદલાતા વૈશ્વિક સંજોગોનો સંકેત છે

આ ક્રૂડની ખરીદી ઈન્ડિયન ઓઈલ કોર્પોરેશન (IOC) દ્વારા કરવામાં આવી છે, જે દેશની સૌથી મોટી સરકારી ક્રૂડ કંપની છે. જો કે કંપનીએ હજુ સુધી આ અંગે કોઈ સત્તાવાર નિવેદન આપ્યું નથી, પરંતુ સંકેતો સ્પષ્ટ છે કે ભારતે ફરીથી ઈરાની ક્રૂડને પોતાના ઈમ્પોર્ટ પોર્ટફોલિયોમાં સામેલ કરવાનું શરૂ કરી દીધું છે.

માત્ર એક જ નહીં, પરંતુ ‘જોર્ડન’ નામનું વધુ એક ટેન્કર પણ ભારત તરફ આગળ વધી રહ્યું છે, જેનાથી એ સ્પષ્ટ થઈ જાય છે કે આ કોઈ એક વખતની ડીલ નથી, પરંતુ એક ટ્રેન્ડની શરૂઆત હોઈ શકે છે. હકીકતમાં, ભારતે છેલ્લે મે 2019માં ઈરાન પાસેથી ક્રૂડ ખરીદ્યું હતું. તે સમયે અમેરિકા દ્વારા લાદવામાં આવેલા કડક પ્રતિબંધોને કારણે ભારતીય કંપનીઓએ આ આયાત રોકવી પડી હતી. ત્યારબાદ ભારતે પોતાની જરૂરિયાતો માટે સાઉદી અરેબિયા, ઈરાક અને અમેરિકા જેવા દેશો પર નિર્ભરતા વધારી દીધી હતી.

પરંતુ હવે સંજોગો બદલાઈ રહ્યા છે. પશ્ચિમ એશિયામાં ચાલતા સંઘર્ષ અને હોર્મુઝ સ્ટ્રેટ જેવા મહત્વના દરિયાઈ માર્ગો પર દબાણને કારણે વૈશ્વિક ક્રૂડ સપ્લાય પ્રભાવિત થયો છે. આ બાબતને ધ્યાનમાં રાખીને અમેરિકાએ કામચલાઉ ધોરણે ઈરાની ક્રૂડ પર લાગેલા કેટલાક પ્રતિબંધોમાં ઢીલ આપી છે, જેથી બજારમાં સ્થિરતા લાવી શકાય.

આ નિર્ણયનો સીધો ફાયદો ભારતને મળ્યો છે. ભારતીય રિફાઇનર્સ લાંબા સમયથી સસ્તા અને સ્થિર સપ્લાયની શોધમાં હતા, અને ઈરાન હંમેશા તેમને વધુ સારી શરતો પર ક્રૂડ આપતું રહ્યું છે. એવામાં આ વાપસી ભારતીય બજાર માટે ફાયદાકારક માનવામાં આવી રહી છે. સરકારી સૂત્રોના જણાવ્યા મુજબ ભારતના પેટ્રોલિયમ મંત્રાલયે પણ સંકેત આપ્યો છે કે ઘરેલુ રિફાઇનર્સ હવે ઈરાનથી ક્રૂડ ખરીદવા લાગ્યા છે. ખાસ વાત એ છે કે પેમેન્ટ સિસ્ટમમાં પણ હાલમાં કોઈ મોટો અવરોધ નથી, જે પહેલા સૌથી મોટી સમસ્યા ગણાતી હતી.

નિષ્ણાતોનું માનવું છે કે ઈરાની ક્રૂડની વાપસીથી ભારતને બે મોટા ફાયદા થશે. પહેલો, ક્રૂડની કિંમતોમાં સ્થિરતા આવશે, અને બીજો, સપ્લાયનું જોખમ ઘટશે. વર્તમાન સમયમાં જ્યારે વૈશ્વિક બજારમાં અનિશ્ચિતતા બનેલી છે, ત્યારે આ પગલું ભારતની ઊર્જા સુરક્ષાને મજબૂત કરી શકે છે.