ગુજરાતમાં એક તરફ ગુણવત્તાયુક્ત શિક્ષણના દાવા કરવામાં આવે છે, તો બીજી તરફ સરકારી કાર્યક્રમોમાં ભીડ એકઠી કરવા માટે શિક્ષણ જગતનો જ ભોગ લેવાતો હોવાની વરવી વાસ્તવિકતા સામે આવી છે. બનાસકાંઠા જિલ્લા પ્રાથમિક શિક્ષણાધિકારીના એક લેટેસ્ટ પરિપત્રએ વિવાદ છેડ્યો છે, જેમાં હજારો મહિલા શિક્ષિકાઓને શાળા છોડી વડાપ્રધાનના કાર્યક્રમમાં હાજર રહેવા આદેશ કરાયો છે.

બનાસકાંઠા જિલ્લાના 14 તાલુકાઓમાંથી કુલ 4374 મહિલા શિક્ષિકાઓની વિગતો મંગાવવામાં આવી છે. આ પૈકી 1800 શિક્ષિકાઓને ફરજિયાતપણે કાર્યક્રમ સ્થળે હાજર રાખવા માટે સ્પષ્ટ આદેશ કરવામાં આવ્યો છે. આ શિક્ષિકાઓએ બાળકોને ભણાવવાને બદલે VIP અને VVIP બેઠક વ્યવસ્થામાં હાજર રહેવાનું રહેશે. નોડલ અધિકારીઓને આ શિક્ષિકાઓને લાવવા-લઈ જવાની અને બેઠક વ્યવસ્થા જાળવવાની જવાબદારી સોંપવામાં આવી છે.

જ્યારે હજારો શિક્ષિકાઓ એકસાથે શૈક્ષણિક કાર્ય છોડીને સરકારી ઇવેન્ટમાં જોડાશે, ત્યારે તે દિવસે શાળાઓમાં અભ્યાસ કરતા હજારો નિર્દોષ બાળકોના શિક્ષણનું શું? આ પ્રશ્ન હાલ વાલીઓ અને શિક્ષણવિદોમાં ચર્ચાનો વિષય બન્યો છે. શું શિક્ષણ વિભાગનું કામ ગુણવત્તાલક્ષી શિક્ષણ આપવાનું છે કે પછી માત્ર રાજકીય કાર્યક્રમોમાં પ્રેક્ષકોની સંખ્યા વધારવાનું?

એક તરફ રાજ્યની અનેક શાળાઓમાં શિક્ષકોની ઘટ હોવાની બૂમો ઊઠી રહી છે, ત્યારે બીજી તરફ હાજર શિક્ષકોને પણ બિન-શૈક્ષણિક કામોમાં જોતરવામાં આવી રહ્યા છે. જાહેર જનતાના ટેક્સના પૈસે ચાલતા તંત્રનો ઉપયોગ જ્યારે આ પ્રકારે ‘ભીડ વધારવાના સાધન’ તરીકે થાય, ત્યારે તે લોકશાહીની ગરિમા સામે ગંભીર પ્રશ્નાર્થો ઊભા કરે છે.

 ખેડા જિલ્લાના મહુધા તાલુકાના પોરડા ગામમાં સરકારી તંત્રની બેદરકારી સામે આવી છે. ગામમાં લાખો રૂપિયાના ખર્ચે બનાવવામાં આવેલા સાર્વજનિક શૌચાલય આજે જાળવણીના અભાવે શોભાના ગાંઠિયા સમાન બની ગયું છે. ગંદકી અને ઝાડી-ઝાંખરાના સામ્રાજ્યના કારણે લોકો શૌચાલયમાં જઇ શકતા નથી. ત્યારે જાહેર શૌચાલયની સાફ-સફાઈ કરવા ગ્રામજનોમાંથી માગણી ઊઠવા પામી છે.

સરકાર દ્વારા નિર્મળ ગામ સ્વચ્છ ગામની ગુલબાંગો પોકારવામાં આવી રહી છે. તેમજ નિર્મળ ગામનું સપનું સાકાર કરવા સ્વચ્છતા અભિયાન હેઠળ લાખો રૂપિયાના ખર્ચે જાહેર શૌચાલય બનાવવામાં આવી રહ્યા છે. ત્યારે મહુધા તાલુકાના પોરડા ગામમાં ગ્રામજનોની સુવિધા માટે બનાવવામાં આવેલા જાહેર શૌચાલય લાંબા સમયથી બંધ હાલતમાં છે. ગામમાં બનાવેલા જાહેર શૌચાલય ગંદકીથી ખદબદી રહ્યાં છે. જેથી અંદર જઈ ન શકાય તેવી ભારી ભારે દુર્ગંધ મારી રહી છે. આ ઉપરાંત યોગ્ય સાફ-સફાઈ અને જાળવણી ન થવાને કારણે આ પરિસરમાં કમર સુધી ઝાડી-ઝાંખરા ઉગી નીકળ્યા છે. શૌચાલયોમાં ગંદકી એટલી હદે વધી ગઈ છે કે, ત્યાં પગ મૂકવો પણ મુશ્કેલ બન્યો છે. સફાઈના અભાવે શૌચાલયની અંદર અને બહાર કાંટાળી વનસ્પતિઓ ઉગી નીકળી છે, જેનાથી જીવજંતુઓનો ઉપદ્રવ વધી રહ્યો છે. આમ લાખો રૂપિયાના ખર્ચે તૈયાર થયેલ જાહેર સૌચાલય હાલ ધૂળ ખાઈ રહી છે. શૌચાલયોનો ઉપયોગ ન થઈ શકવાને કારણે ગ્રામજનોને ખાસ કરીને મહિલાઓ ખુલ્લામાં શૌૈચક્રિયા કરવા જવા મજબૂર બની છે. ગામના નાગરિકોનું કહેવું છે કે, એક તરફ સરકાર ‘સ્વચ્છ ભારત’ની વાતો કરે છે, ત્યારે બીજી તરફ પોરડા ગામમાં સ્વચ્છતા અભિયાનના લીરેલીરા ઉડી રહ્યા છે. ગ્રામ પંચાયત અને તાલુકા વિકાસ અધિકારી ત્વરિત પગલાં લઇ શૌચાલયોની સફાઈ કરાવી તેને કાર્યરત કરે તેવી માગણી ઉઠવા પામી છે.

કઠલાલ પોલીસ સ્ટેશનના હદ વિસ્તારમાં આવેલા સરખેજ ડાભીની મુવાડી ગામેથી થયેલી પશુ ચોરીનો ભેદ ઉકેલવામાં પોલીસને મોટી સફળતા મળી છે. ગત તા. ૧૪-૦૩-૨૬ના રોજ રાત્રિના સમયે થયેલી ભેંસની ચોરી મામલે પોલીસે ફિલ્મી ઢબે તપાસ કરી અમદાવાદની કુખ્યાત ટોળકીને ઝડપી પાડી છે.

ગત ૧૪ માર્ચના રોજ મોડી રાત્રે આશરે ૩ઃ૦૦ વાગ્યાના સુમારે સરખેજ ડાભીની મુવાડી ગામે તસ્કરોએ ત્રાટકીને એક ઘર આંગણે ગમાણમાં બાંધેલી રૂપિયા ૬૦,૦૦૦ની કિંમતની ભેંસની ચોરી કરી હતી. તસ્કરો કાળા રંગની લક્ઝરી કારમાં પશુને ચઢાવી પૂરઝડપે નાસી છૂટયા હતા. આ અંગે કઠલાલ પોલીસે ગુનો નોંધી તપાસ હાથ ધરી હતી.

કઠલાલ સર્વેલન્સ ટીમ પેટ્રોલિંગમાં હતી તે દરમિયાન ટેકનિકલ સોર્સ અને ૩૦થી વધુ સીસીટીવી ફૂટેજની બારીકાઈથી તપાસ કરવામાં આવી હતી. જેમાં ચોરીમાં વપરાયેલી કાળા રંગની ફોર્ચ્યુનર ગાડીનો નંબર મેળવી બાતમીદારોને સક્રિય કરાયા હતા. બાતમીના આધારે પોલીસે અમદાવાદ-ઈન્દોર હાઈવે પર ખલાલ ચેકપોસ્ટ પાસેથી આરોપીઓને આંતર્યા હતા. પોલીસે ગુલામ સાબીર મહંમદ કાલુમિયા કુરેશી (રહે. જમાલપુર ખાટકીવાડ, દાણીલીમડા, અમદાવાદ),

આસિફ ઉર્ફે માઈકલ નૂર મોહમ્મદ ઈસ્માઈલ કુરેશી (રહે. રખિયાલ, અમદાવાદ) અને સલીમ ઉર્ફે કાલીયા દિલ્લી કમાત્રી અકબરભાઈ શેખ (રહે. બેરલ માર્કેટ, દાણીલીમડા, અમદાવાદ) આરોપીની ઝડપી પાડયા હતા. તેમજ પોલીસે ગુનામાં વપરાયેલી ફોર્ચ્યુનર કાર સહિત કુલ રૂપિયા ૪,૫૬,૫૦૦નો મુદ્દામાલ જપ્ત કર્યો છે. પ્રાથમિક તપાસમાં જાણવા મળ્યું છે કે, પકડાયેલા ત્રણેય આરોપીઓ રીઢા ગુનેગારો છે અને તેમના વિરુદ્ધ અગાઉ પણ અનેક પોલીસ સ્ટેશનોમાં ગુના નોંધાયેલા છે.

 ધ્રાંગધ્રા શહેરી વિસ્તારમાં રહેતા એક વિધવા માતા મજૂરી કામ કરી પોતાનું અને સંતાનોનું ગુજરાન ચલાવતા હતા જેમાં પોતાની ૧૭ વર્ષની સગીર દીકરીની હાલમાં જ સગાઈ કરવામાં આવી હતી.

દરમિયાન સગીરાની માતા ઘરેથી બહાર ગયા હોય અને સગીરા એકલી પોતાના ઘરે કપડાં ધોવા માટે હાજર હોય તેવા સમયે મોહસીન અબ્દુલભાઈ કાજેડીયા નામના શખ્સે સગીરાની સગાઈ તોડાવી નાખવાની ધમકી આપી હતી અને સગીરાની એકલતાનો લાભ લઈ બાવડું પકડી જબરદસ્તી સગીરાને ઘરમાં લઈ જઈ હાથ અને પગ બાંધી સગીરા પર દુષ્કર્મ આચર્યું હતું. આ તરફ સગીરાની માતા પોતાના ઘરે જતા ડરી ગયેલી સગીરાએ તમામ હકીકત પોતાની માતાને જણાવી હતી અને અગાઉ પણ મોહસીન કાજેડીયા દ્વારા સગીરાની પાછળ પડી તાબે થવા માટે ધમકીઓ આપી હોવાનું જણાવતા માતાએ દુષ્કર્મ આચરનાર મોહસીન અબ્દુલભાઈ કાજેડીયા વિરુધ સિટી પોલીસ મથકે પોક્સો એક્ટ હેઠળ ગુનો નોંધી કાર્યવાહી હાથ ધરી છે.