નવસારીમાં DGVCL ની બેદરકારીથી 16 વર્ષીય કિશોરી પર અચાનક જીવંત વીજતાર તૂટી પડતા તેને જોરદાર વીજ કરંટ લાગ્યો હતો. હોસ્પિટલમાં ટૂંકી સારવાર બાદ કિશોરીનું મોત થયું છે.નવસારી શહેરમાં DGVCLની ગંભીર બેદરકારી સામે આવી છે. શહેરના કૃષિ વિશ્વવિદ્યાલયની સામેના વિસ્તારમાં રહેતી એક 16 વર્ષીય કિશોરી પર અચાનક જીવંત વીજતાર તૂટી પડતા તેને જોરદાર વીજ કરંટ લાગ્યો હતો. કમનસીબે, હોસ્પિટલમાં ટૂંકી સારવાર બાદ કિશોરીનું મોત નિપજતા સમગ્ર પંથકમાં શોકનું મોજું ફરી વળ્યું છે.

મળતી માહિતી મુજબ, આયુષી નાયકા નામની કિશોરી જ્યારે વિસ્તારમાંથી પસાર થઈ રહી હતી, ત્યારે અચાનક ઉપરથી પસાર થતો હાઈટેન્શન વીજતાર તૂટીને તેના પર પડ્યો હતો. જીવંત વાયરમાંથી વહેતા જોરદાર વીજ પ્રવાહને કારણે કિશોરીને વીજળીનો જોરદાર ઝટકો લાગ્યો હતો અને તે સ્થળ પર જ ફસડાઈ પડી હતી.

ઘટનાને પગલે આસપાસના લોકો તાત્કાલિક દોડી આવ્યા હતા અને ગંભીર રીતે દાઝી ગયેલી આયુષીને તાત્કાલિક નજીકની હોસ્પિટલમાં સારવાર અર્થે ખસેડવામાં આવી હતી. જોકે, તેની સ્થિતિ અત્યંત નાજુક હોવાથી સારવાર દરમિયાન તેણે દમ તોડ્યો હતો.

માત્ર 16 વર્ષની વયે આયુષીનું અકાળે અવસાન થતા તેના પરિવારજનોમાં ભારે આક્રંદ જોવા મળી રહ્યો છે. સ્થાનિકોમાં DGVCL પ્રત્યે ભારે રોષ છે. લોકોનો આરોપ છે કે જર્જરિત વીજતારોના મેન્ટેનન્સમાં તંત્ર દ્વારા દાખવવામાં આવતી બેદરકારીને કારણે આજે એક માસૂમે જીવ ગુમાવવો પડ્યો છે. આ ઘટનામાં જવાબદાર અધિકારીઓ સામે કડક પગલાં લેવામાં આવે તેવી માંગ ઉઠી રહી છે.

સુરેન્દ્રનગર સબજેલમાં કેદીઓ વચ્ચે મોડી રાત્રે મારામારી થઈ છે.. 4 કેદીઓ ઇજાગ્રસ્ત થતા સિવિલ હોસ્પિટલ ખસેડાયા છે.. 125 ની ક્ષમતા સામે 250 કેદીઓ હોવાથી વિવાદ થયો છે.ઝાલાવાડના મુખ્ય મથક સુરેન્દ્રનગરની સબજેલમાં મોડી રાત્રે કેદીઓ વચ્ચે હિંસક મારામારીની ઘટના સામે આવી છે. જેલની બેરેકમાં સામાન્ય બાબતે શરૂ થયેલા વિવાદે ઉગ્ર સ્વરૂપ ધારણ કરતા કેદીઓ સામસામે આવી ગયા હતા. આ અથડામણમાં ચાર કેદીઓને શરીરે ઇજાઓ પહોંચતા જેલ તંત્રમાં દોડધામ મચી ગઈ હતી.

મળતી માહિતી મુજબ, રાત્રિના સમયે જેલની બેરેકમાં રહેલા કેદીઓ વચ્ચે કોઈ બાબતે બોલાચાલી થઈ હતી, જે જોતજોતામાં મારામારીમાં ફેરવાઈ ગઈ હતી. જેલ ગાર્ડ અને સત્તાધીશો સ્થળ પર પહોંચી મામલો થાળે પાડે તે પહેલા ચાર કેદીઓ લોહીલુહાણ થયા હતા. જેલ પ્રશાસન દ્વારા તાત્કાલિક તમામ ઇજાગ્રસ્તોને ચુસ્ત પોલીસ બંદોબસ્ત હેઠળ શહેરની સિવિલ હોસ્પિટલમાં સારવાર અર્થે ખસેડવામાં આવ્યા હતા.

આ ઘટનાએ ફરી એકવાર સુરેન્દ્રનગર સબજેલની સુરક્ષા અને વ્યવસ્થા સામે સવાલો ઉભા કર્યા છે. નોંધનીય છે કે આ જેલની વાસ્તવિક ક્ષમતા માત્ર 125 કેદીઓની છે, પરંતુ તેની સામે હાલમાં 250 થી વધુ કેદીઓને રાખવામાં આવ્યા છે. ક્ષમતા કરતા બમણા કેદીઓના કારણે અવારનવાર નાની બાબતોમાં વિવાદો સર્જાય છે અને જેલ સતત વિવાદોના કેન્દ્રમાં રહે છે.જેલમાં થયેલી આ મારામારી અંગે જેલ સત્તાધીશો દ્વારા એ-ડિવિઝન પોલીસને જાણ કરવામાં આવી છે.

જામનગર-રાજકોટ ધોરીમાર્ગ પર એક પેટ્રોલ પંપના પાર્કિંગમાં વર્ના કાર રાખવામાં આવેલી છે, જેની અંદર બિયરના ટીનનો મોટો જથ્થો સંતાડેલો છે, તેવી ચોક્કસ બાતમીના આધારે એલસીબીની ટુકડીએ મોડી રાત્રે દરોડો પાડયો હતો.

જે દરોડા દરમિયાન જી.જે. 7 કે.આર. 5988 નંબરની કાર બિનવરસુ હાલતમાં મળી આવી હતી. જે કારને ખોલીને અંદર તલાસી લેતા તેમાંથી કુલ 744 નંગ બિયરના ટીનનો જથ્થો મળી આવ્યો હતો. આથી પોલીસે કાર અને બિયર સહિત રૂપિયા 3,40,000 નો મુદ્દામાલ કબજે કરી લીધો છે, જ્યારે વાહનના રજીસ્ટ્રેશન નંબરના આધારે બિયરનો જથ્થો મોકલનાર અને મંગાવનાર સહિતના શખ્સોની શોધ ખોળ હાથ ધરી છે.

દાહોદ શહેરમાં નિર્દોષ લોકોને વાતોમાં ભોળવી તેમની કિંમતી જણસો સેરવતી એક રીઢા ગુનેગાર જોડીનો પર્દાફાશ થયો છે. સરનામું પૂછવાના બહાને મહિલાને વિશ્વાસમાં લઈ નજર ચૂકવી દાગીનાની લૂંટ ચલાવનાર મૂળ મહારાષ્ટ્રના બે આરોપીઓની દાહોદ પોલીસે ગણતરીના કલાકોમાં ધરપકડ કરી છે.

આ ઠગ ટોળકીની કામ કરવાની પદ્ધતિ ફિલ્મી છે. સૌ પ્રથમ પુરુષ આરોપી મહિલાને સરનામું પૂછવા માટે ઉભી રાખે છે અને વાતચીત કરીને જતો રહે છે. તેના ગયા પછી તરત જ મહિલા સાગરીત આવે છે અને ભોગ બનનાર મહિલાને ડરાવે છે કે ‘આવા લોકો લૂંટ ચલાવતા હોય છે, તમે તમારા દાગીના સુરક્ષિત રીતે પર્સમાં મૂકી દો’. મહિલા ડરના માર્યા પોતાની ચેન અને બુટ્ટી ઉતારી પર્સમાં મુકે છે, ત્યારે આ ઠગ મહિલા નજર ચૂકવી પર્સમાંથી દાગીના સેરવી લઈ બંને ફરાર થઈ જાય છે.

લૂંટની ઘટનાની જાણ થતા જ દાહોદ પોલીસ સક્રિય થઈ હતી અને ટેકનિકલ સર્વેલન્સના આધારે ગણતરીના સમયમાં જ આરોપી પુરુષ અને મહિલાને ઝડપી પાડ્યા હતા. પોલીસ તપાસમાં બહાર આવ્યું છે કે બંને આરોપીઓ મૂળ મહારાષ્ટ્રના રહેવાસી છે. પકડાયેલી મહિલા આરોપી સામાન્ય ગુનેગાર નથી, તેના પર ગુજરાત રાજ્યમાં આ પ્રકારના અગાઉ 8 જેટલા ગુના નોંધાઈ ચૂક્યા છે.

દાંતીવાડા તાલુકાના ઓઢવા ગામ પાસે કાર રોડ સાઈડમાં આવેલા ઝાડ સાથે અથડાતા ભીષણ આગ ફાટી નીકળી હતી. આ દુર્ઘટનામાં કારમાં સવાર બે વ્યક્તિઓના મોત થયા છે.