ભારતીય ક્રિકેટ ટીમ આગામી સમયમાં ન્યૂઝીલેન્ડના પ્રવાસે જવાની છે, જ્યાં બંને ટીમો વચ્ચે T20,વનડે અને ટેસ્ટ શ્રેણી રમાવાની છે.જોકે,આ પ્રવાસ પહેલાં ન્યૂઝીલેન્ડની ટીમને મોટો ઝટકો લાગ્યો છે. ટીમનો સ્ટાર ફાસ્ટ બોલર વિલિયમ ઓ’રોર્કે ભારત સામેની વનડે અને ટેસ્ટ શ્રેણીમાં રમી શકશે નહીં. તે હાલમાં હેમસ્ટ્રિંગ અને પિંડળીની ઈજામાંથી સાજો થઈ રહ્યો છે.ન્યૂઝીલેન્ડ ક્રિકેટ બોર્ડે તેની ફિટનેસને ધ્યાનમાં રાખીને તેને ભારત સામેની શ્રેણીઓથી દૂર રાખવાનો નિર્ણય લીધો છે. ટીમ મેનેજમેન્ટ ઇચ્છે છે કે ઓ’રોર્કે સંપૂર્ણ રીતે ફિટ થયા બાદ જ મેદાનમાં વાપસી કરે.

વિલિયમ ઓ’રોર્કેની વાપસી અંગે ન્યૂઝીલેન્ડ સાવચેત

વિલિયમ ઓ’રોર્કે ન્યૂઝીલેન્ડના મહત્ત્વના ફાસ્ટ બોલરોમાંનો એક છે. તેની બોલિંગ ટીમ માટે ઉપયોગી રહી છે, પરંતુ ઈજાને કારણે હવે તે ભારત સામેની આગામી વનડે અને ટેસ્ટ શ્રેણીમાંથી બહાર થઈ ગયો છે.ન્યૂઝીલેન્ડના કોચ રૉબ વૉલ્ટરે આ અંગે જણાવ્યું હતું કે ભારત સામે ઘરઆંગણે રમાનારી મોટી શ્રેણીમાંથી બહાર રહેવું વિલ માટે નિરાશાજનક છે. તેને વનડે અને ટેસ્ટ બંને શ્રેણીમાં રમવાનું હતું, પરંતુ ચર્ચા બાદ તેને ઈજામાંથી સાજા થવા માટે વધુ સમય આપવાનો નિર્ણય લેવામાં આવ્યો છે.કોચના જણાવ્યા અનુસાર, વિલિયમને બંને ઈજામાંથી સંપૂર્ણ રીતે સાજો થવાની સાથે તેની બોલિંગનો કાર્યભાર પણ ધીમે ધીમે વધારવાની જરૂર છે.

ઓસ્ટ્રેલિયા સામેની ટેસ્ટ શ્રેણી પર નજર

ન્યૂઝીલેન્ડની ટીમ માટે ભારત સામેની શ્રેણી બાદ ઓસ્ટ્રેલિયા સામેની ટેસ્ટ શ્રેણી પણ મહત્ત્વપૂર્ણ છે.ડિસેમ્બરમાં શરૂ થનારી આ શ્રેણી પહેલાં ઓ’રોર્કે સંપૂર્ણ ફિટ થઈ જાય તે માટે તેને આરામ આપવાનો નિર્ણય લેવામાં આવ્યો છે. જોકે, ઓસ્ટ્રેલિયા સામેની પ્રથમ ટેસ્ટમાં તે રમશે કે નહીં તે તેની ઈજામાંથી સાજા થવાની સ્થિતિ અને ટીમ મેનેજમેન્ટના નિર્ણય પર નિર્ભર રહેશે.

T20 શ્રેણી પહેલાં પણ ન્યૂઝીલેન્ડને બે ઝટકા

ભારતના પ્રવાસ પહેલાં ન્યૂઝીલેન્ડની ટીમને T20 શ્રેણી માટે પણ ખેલાડીઓની ઈજાના કારણે મુશ્કેલીઓનો સામનો કરવો પડ્યો છે.માર્ક ચેપમેન અને જેક ફોક્સ ઈજાને કારણે T20 શ્રેણીમાંથી બહાર થઈ ગયા છે.આ બંને ખેલાડીઓની ગેરહાજરી બાદ ન્યૂઝીલેન્ડે જોશ ક્લાર્કસન અને બ્લેર ટિકનરને ટીમમાં સામેલ કર્યા છે. આ ફેરફારોને કારણે ટીમે શ્રેણી પહેલાં પોતાની તૈયારીઓમાં ફેરફાર કરી અને ન્યૂઝીલેન્ડ વચ્ચેની 5 મેચની T20 શ્રેણી 22 ઑક્ટોબરથી શરૂ થવાની છે. ત્યારબાદ બંને ટીમો વચ્ચે 5 વનડે અને 2 ટેસ્ટ મેચની શ્રેણી રમાવાની છે.

ભારત સામે ન્યૂઝીલેન્ડની કસોટી

ભારત સામેની શ્રેણી ન્યૂઝીલેન્ડ માટે મહત્વપૂર્ણ રહેશે.એક તરફ ટીમ ઘરઆંગણે રમવાનો લાભ લેવા માગશે, જ્યારે બીજી તરફ મુખ્ય ફાસ્ટ બોલરોની ગેરહાજરી ટીમની તૈયારીઓને અસર કરી શકે છે.વિલિયમ ઓ’રોર્કેની ગેરહાજરીમાં ન્યૂઝીલેન્ડના અન્ય બોલરો પર વધારાની જવાબદારી આવી શકે છે. હવે જોવાનું રહેશે કે ટીમ આ પડકારનો સામનો કેવી રીતે કરે છે અને ભારત સામેની શ્રેણીમાં કેવું પ્રદર્શન કરે છે.

રાંચી ખાતે રમાયેલી T20 આંતરરાષ્ટ્રીય મેચમાં વેસ્ટ ઇન્ડિઝે ભારત સામે નવો ઈતિહાસ રચતા રૅકોર્ડબ્રેક જીત નોંધાવી છે. ભારતે પ્રથમ બેટિંગ કરતા 5 વિકેટે 249 રનનો વેસ્ટ ઇન્ડિઝ સામેનો પોતાનો સર્વોચ્ચ T20 સ્કોર નોંધાવ્યો હતો. જોકે, 250 રનના વિશાળ લક્ષ્યાંકનો પીછો કરવા ઉતરેલી વેસ્ટ ઇન્ડિઝની ટીમે 18.3 ઓવરમાં જ 4 વિકેટ ગુમાવીને 252 રન બનાવી લીધા હતા. આ સાથે જ વેસ્ટ ઇન્ડિઝે ભારત સામે T20I માં સૌથી મોટો ટીમ ટોટલ બનાવવાનો અને હાઇએસ્ટ રન ચેઝ કરવાનો ઐતિહાસિક વર્લ્ડ રૅકોર્ડ પોતાના નામે કરીને 6 વિકેટે ધમાકેદાર જીત મેળવી છે.

ભારત : સંજુ, ઈશાન, શ્રેયશ, તિલકની મહેનત એડે ગઈ

ટોસ જીતીને વેસ્ટ ઇન્ડિઝે ભારતને પ્રથમ બેટિંગ કરવાનું આમંત્રણ આપ્યું હતું. ભારતીય બેટરોએ શરૂઆતથી જ આક્રમક વલણ અપનાવીને નિર્ધારિત 20 ઓવરમાં 5 વિકેટે 249 રનનો વિશાળ સ્કોર ઊભો કર્યો હતો. ભારત તરફથી સંજુ સેમસને 41 બોલમાં (9 ચોગ્ગા, 4 છગ્ગા) સૌથી વધુ શાનદાર 82 રન બનાવ્યા હતા. તિલક વર્માએ 18 બોલમાં (3 ચોગ્ગા, 3 છગ્ગા) અણનમ 44 રન ઝૂડ્યા હતા, જ્યારે ઈશાન કિશને 22 બોલમાં (6 ચોગ્ગા, 2 છગ્ગા) 43 રનનું મહત્વનું યોગદાન આપ્યું હતું. સુકાની શ્રેયસ ઐયરે 18 બોલમાં (3 ચોગ્ગા, 3 છગ્ગા) 40 રન જોડ્યા હતા. આ ઉપરાંત ઓપનર અભિષેક શર્માએ 12 બોલમાં (2 ચોગ્ગા, 1 છગ્ગો) 20 રન, શિવમ દુબેએ 10 બોલમાં (1 ચોગ્ગો) 7 રન અને નમન ધીરે 1 બોલમાં (1 ચોગ્ગો) અણનમ 4 રન કર્યા હતા. ભારતીય ઈનિંગ્સમાં એક્સ્ટ્રા 9 રન મળ્યા હતા. વેસ્ટ ઇન્ડિઝના બોલિંગ આક્રમણમાં રોસ્ટન ચેઝે 4 ઓવરમાં 24 રન આપીને 3 વિકેટ ઝડપી હતી, જ્યારે શમર સ્પ્રિંગરે 4 ઓવરમાં 64 રન આપીને 2 વિકેટ મેળવી હતી.

બંને ટીમોએ T20માં એકબીજા વિરુદ્ધ સર્વોચ્ચ સ્કોર કરી રૅકોર્ડ નોંધાવ્યો

રાંચી ખાતેની આ મેચમાં બંને ટીમો તરફથી T20 ક્રિકેટના ઐતિહાસિક સ્કોર નોંધાયા હતા. વેસ્ટ ઇન્ડિઝે 252/4 (18.3 ઓવર) રન બનાવીને ભારત સામે T20I માં સૌથી મોટો સ્કોર અને હાઇએસ્ટ રન ચેઝ કરવાનો નવો વિક્રમ સર્જ્યો છે. આ મેચમાં જ ભારતે પ્રથમ બેટિંગ કરતા 249/5 (20 ઓવર) રન બનાવ્યા હતા, જે ભારતનો વેસ્ટ ઇન્ડિઝ સામેનો સર્વોચ્ચ સ્કોર છે. આ અગાઉ 27 ઑગસ્ટ 2016ના રોજ લોડરહિલ ખાતે વેસ્ટ ઇન્ડિઝે 245/6 રન બનાવ્યા હતા અને ભારતે 244/4 રન કર્યા હતા. ઉપરાંત, 11 ડિસેમ્બર 2019ના રોજ વાનખેડે સ્ટેડિયમ ખાતે ભારતે 240/3 રન બનાવ્યા હતા.

વેસ્ટ ઇન્ડિઝની ઈનિંગ્સ: શાઈ હોપની સદી અને રધરફોર્ડની ફિફ્ટી

250 રનના વિશાળ લક્ષ્યાંકનો પીછો કરવા ઉતરેલી વેસ્ટ ઇન્ડિઝની ટીમે શરૂઆતમાં જ 5 રન પર 2 વિકેટ ગુમાવી દીધી હતી. પરંતુ કૅપ્ટન શાઈ હોપ અને શેરફેન રધરફોર્ડે મેચનું પાસું પલટી નાખ્યું હતું. કૅપ્ટન શાઈ હોપે 45 બોલમાં 6 ચોગ્ગા અને 9 છગ્ગાની મદદથી અણનમ 102 રનની અદ્ભુત સદી ફટકારી હતી. તેને સાથ આપતા શેરફેન રધરફોર્ડે 37 બોલમાં 7 ચોગ્ગા અને 7 છગ્ગા સાથે 84 રનની વિસ્ફોટક ઈનિંગ રમી હતી. અંતમાં રોમારિયો શેફર્ડે 13 બોલમાં અણનમ 34 રન અને રોવમેન પોવેલે 13 બોલમાં 24 રન કરીને ટીમને વિજયી લક્ષ્યાંક સુધી પહોંચાડી હતી.

અક્ષર પટેલે 21 બોલમાં 68 રન આપી દીધા

ભારતીય બોલરોની સ્થિતિ જોઈઅ તો મયંક યાદવે 3 ઓવરમાં 36 રન આપીને 3 વિકેટ ઝડપી હતી, જ્યારે કુલદીપ યાદવે 4 ઓવરમાં 53 રન આપીને 1 વિકેટ મેળવી હતી. અન્ય બોલરોમાં અરશદીપ સિંહે 4 ઓવરમાં 45 રન, અક્ષર પટેલે 3.3 ઓવરમાં 63 રન, શિવમ દુબેએ 2 ઓવરમાં 30 રન અને નમન ધીરે 2 ઓવરમાં 25 રન આપ્યા હતા પરંતુ તેઓને કોઈ વિકેટ મળી નહોતી. અંતે વેસ્ટ ઇન્ડિઝે 18.3 ઓવરમાં 4 વિકેટના નુકસાને 252 રન બનાવીને ભારત સામેની T20 મેચોમાં હાઇએસ્ટ રન ચેઝ કરીને ધમાકેદાર જીત હાંસલ કરી હતી

Aichi-Nagoya એશિયન ગેમ્સમાં ભારત 21 ગોલ્ડ સહિત 85 મેડલ સાથે ચોથા સ્થાને રહ્યું, પરંતુ અગાઉના 106 મેડલની સરખામણીએ 21 મેડલ ઓછા મળ્યા છે.

એશિયન ગેમ્સ 2026માં ભારતના પ્રદર્શનને લઈને સ્પોર્ટ્સ મંત્રાલય હવે સમીક્ષા બેઠક યોજશે. 13 ઓક્ટોબરે રમત મંત્રાલય અને નેશનલ સ્પોર્ટ્સ ફેડરેશન્સના અધિકારીઓ વચ્ચે બેઠક યોજાવાની છે. તેમાં ગેમ્સ દરમિયાન કયા રમતોમાં અપેક્ષા મુજબ પરિણામ ન આવ્યું અને ક્યાં સુધારાની જરૂર છે તેની ચર્ચા થશે. ભારતે Aichi-Nagoya એશિયન ગેમ્સમાં કુલ 85 મેડલ જીત્યા હતા. તેમાં 21 ગોલ્ડ, 27 સિલ્વર અને 37 બ્રોન્ઝ મેડલ સામેલ છે. ભારત મેડલ ટેલીમાં ચોથા સ્થાને રહ્યું હતું. જોકે 2022ની હાંગઝોઉ એશિયન ગેમ્સમાં ભારતે રેકોર્ડ 106 મેડલ જીત્યા હતા. એટલે આ વખતે કુલ મેડલમાં 21નો ઘટાડો થયો છે.

બેડમિન્ટન, શૂટિંગ અને એથ્લેટિક્સ પર નજર

સમીક્ષામાં ખાસ કરીને બેડમિન્ટન, શૂટિંગ અને એથ્લેટિક્સ જેવા રમતોમાં અપેક્ષા મુજબનું પરિણામ ન મળવા અંગે ચર્ચા થવાની છે. બેડમિન્ટનમાં ભારતને માત્ર એક બ્રોન્ઝ મેડલ મળ્યો હતો, જ્યારે શૂટિંગમાં 15 મેડલ મળ્યા હતા. જોકે અગાઉની એશિયન ગેમ્સની સરખામણીમાં શૂટિંગનું પ્રદર્શન ઘટ્યું હતું. એથ્લેટિક્સમાં ભારતે 24 મેડલ જીત્યા હતા, પરંતુ અગાઉની આવૃત્તિ કરતાં આ સંખ્યા 5 મેડલ ઓછી હતી. બીજી તરફ આર્ચરી, બોક્સિંગ, રેસલિંગ અને ટીમ સ્પોર્ટ્સમાં ભારતે સારો દેખાવ કર્યો હતો.

TOPSના પૈસાની પણ થશે સમીક્ષા

આ બેઠકમાં સરકારની Target Olympics Podium Scheme (TOPS) હેઠળ ખેલાડીઓને આપવામાં આવતા ફંડની પણ સમીક્ષા કરવામાં આવશે. સ્પોર્ટ્સ મંત્રાલયના એક સૂત્રના જણાવ્યા મુજબ, અનુભવી ખેલાડીઓ પાછળ મોટી રકમ ખર્ચવામાં આવી હોવા છતાં કેટલાક ખેલાડીઓ અપેક્ષા મુજબ મેડલ જીતી શક્યા નથી. રિપોર્ટ મુજબ એશિયન ગેમ્સની તૈયારી માટે ત્રણ વર્ષના ચક્રમાં ખેલાડીઓ પાછળ ₹700 કરોડથી વધુ ખર્ચ થયો હોવાનો મંત્રાલયના સૂત્રનો દાવો છે. હવે આ રોકાણનું પરિણામ કેટલું મળ્યું અને આગળ ફંડિંગમાં શું ફેરફાર કરવાની જરૂર છે તેની ચર્ચા થઈ શકે છે.

ગેમ્સમાં પહોંચ્યા બાદ ઈજાની માહિતી કેમ?

સમીક્ષામાં બીજો મહત્વનો મુદ્દો ખેલાડીઓની ઈજાઓ રહેશે. મંત્રાલયના સૂત્રોએ સવાલ ઉઠાવ્યો છે કે કેટલાક ખેલાડીઓએ એશિયન ગેમ્સમાં પહોંચ્યા બાદ ઈજાની માહિતી આપી હતી. આવી સ્થિતિમાં તેમની તૈયારી પાછળ કરવામાં આવેલા ખર્ચ અને ટીમમાં તેમની પસંદગી અંગે પણ ચર્ચા થવાની શક્યતા છે. મંત્રાલય હવે એ સમજવાનો પ્રયાસ કરશે કે ખેલાડીઓની તૈયારી, પસંદગી અને ગેમ્સ સુધીની પ્રક્રિયામાં ક્યાં સુધારો કરી શકાય.

ભારતના પ્રદર્શનમાં સારા પાસાં પણ રહ્યા

મેડલની સંખ્યા ઘટી હોવા છતાં ભારત માટે એશિયન ગેમ્સ સંપૂર્ણપણે નિરાશાજનક રહી નહોતી. આર્ચરીમાં ભારતે 5 ગોલ્ડ સહિત 9 મેડલ, બોક્સિંગમાં 3 ગોલ્ડ સહિત 6 અને રેસલિંગમાં 6 મેડલ જીત્યા હતા. ક્રિકેટ, હોકી અને કબડ્ડીમાં ભારતે પુરુષ અને મહિલા બંને કેટેગરીમાં ગોલ્ડ જીત્યા હતા. પુરુષ હોકી ટીમે મલેશિયાને 5-1થી હરાવીને ગોલ્ડ જાળવી રાખ્યો, જ્યારે પુરુષ ક્રિકેટ ટીમે ફાઇનલમાં પાકિસ્તાનને 19 રનથી હરાવ્યું હતું. મહિલા હોકી ટીમે પણ ગોલ્ડ જીતીને 2028 લોસ એન્જલસ ઓલિમ્પિક્સ માટે સીધી ક્વાલિફિકેશન મેળવી હતી.

આગળના મોટા લક્ષ્યો માટે સમીક્ષા મહત્વની

ભારત હવે 2028 લોસ એન્જલસ ઓલિમ્પિક્સ અને લાંબા ગાળે 2036 ઓલિમ્પિક્સની તૈયારી તરફ આગળ વધી રહ્યું છે. તેથી એશિયન ગેમ્સમાં ક્યાં સફળતા મળી અને ક્યાં ખામી રહી તેની આ સમીક્ષા આગામી મોટી સ્પોર્ટ્સ ઇવેન્ટ્સ માટેની તૈયારીમાં મહત્વની બની શકે છે.