ઘણીવાર એવું બને છે કે એરપોર્ટ પહોંચ્યા પછી યાદ આવે કે મોબાઈલનું ચાર્જર ઘરે રહી ગયું છે અથવા લાંબી ફ્લાઈટ માટે કોઈ પુસ્તક લેવાનું ભૂલાઈ ગયું છે. અત્યાર સુધી આ ભૂલનો પસ્તાવો કરવો પડતો હતો, પરંતુ હવે મુંબઈના છત્રપતિ શિવાજી મહારાજ ઇન્ટરનેશનલ એરપોર્ટ (CSMIA) પર મુસાફરોને આવી ચિંતાઓમાંથી મુક્તિ મળી છે. ક્વિક કોમર્સ પ્લેટફોર્મ બ્લિંકિટે ટર્મિનલ-2 (ડોમેસ્ટિક ડિપાર્ચર્સ) પર પોતાની વિશેષ ઇન-ટર્મિનલ ડિલિવરી સેવા શરૂ કરી છે.

બ્લિંકિટ દ્વારા જાહેર કરવામાં આવ્યું છે કે , મુંબઈ એરપોર્ટ વિશ્વનું પ્રથમ એરપોર્ટ બન્યું છે જ્યાં આવી ‘ઝડપી ઇન-ટર્મિનલ ડિલિવરી’ સુવિધા ઉપલબ્ધ છે. અદાણી એરપોર્ટ્સ સાથેની વ્યૂહાત્મક ભાગીદારી હેઠળ શરૂ કરાયેલી આ સેવામાં એરપોર્ટની અંદર જ એક સમર્પિત ‘વોકર ટીમ’ તૈનાત કરવામાં આવી છે, જે ઓર્ડર મળતાની સાથે જ મુસાફર જે-તે ગેટ પર હોય ત્યાં સુધી સામાન પહોંચાડે છે.

મુસાફરો બ્લિંકિટ એપ દ્વારા 2500 થી વધુ પ્રોડક્ટ્સનો ઓર્ડર આપી શકશે. જેમાં ઇલેક્ટ્રોનિક્સ (ચાર્જર, પાવર બેંક, ઈયરફોન), પુસ્તકો, ગિફ્ટ આઈટમ્સ, પર્સનલ કેર પ્રોડક્ટ્સ અને મુસાફરી દરમિયાન જરૂરી નાની-મોટી ચીજોનો સમાવેશ થાય છે. આ સુવિધાને કારણે હવે મુસાફરોએ પેકિંગ કરતી વખતે “કંઈક ભૂલી જઈશું તો?” એવા ડર રાખવાની જરૂર નથી. સોશિયલ મીડિયા પર લોકો આ સુવિધાને વધાવી રહ્યા છે અને કહી રહ્યા છે કે હવે એરપોર્ટ પર ચેકલિસ્ટ કરતા બ્લિંકિટ એપ વધુ ઉપયોગી સાબિત થશે.

જોકે, આ નવી સેવાથી એરપોર્ટની અંદર આવેલા મોંઘા રિટેલ સ્ટોર્સના બિઝનેસ મોડલ સામે પ્રશ્નાર્થ ઊભો થયો છે. સામાન્ય રીતે એરપોર્ટ પર વસ્તુઓ ઊંચા ભાવે વેચાતી હોય છે, પરંતુ બ્લિંકિટ પર વ્યાજબી ભાવે પ્રોડક્ટ્સ મળતી હોવાથી સ્થાનિક દુકાનદારોમાં ચિંતા જોવા મળી રહી છે.

હાલમાં આ સેવા માત્ર મુંબઈના ટર્મિનલ-2 પર જ ઉપલબ્ધ છે, પરંતુ જો આ પ્રયોગ સફળ રહેશે તો આગામી સમયમાં દિલ્હી, બેંગલુરુ અને અમદાવાદ જેવા અન્ય મોટા એરપોર્ટ્સ પર પણ આ સુવિધા વિસ્તરવામાં આવશે તેવી શક્યતા છે. ટૂંકમાં, બ્લિંકિટે સાબિત કરી દીધું છે કે ‘ઝડપી ડિલિવરી’ હવે માત્ર રસ્તાઓ પર જ નહીં, પણ રન-વે સુધી પહોંચી ગઈ છે.

અમેરિકા-ઈઝરાયલ અને ઈરાનના યુદ્ધ વચ્ચે LPG ભરેલા ભારતીય જહાજોએ હોર્મુઝ જળમાર્ગ સુરક્ષિત રીતે પાર કરી લીધું છે. આ જહાજો ભારે સુરક્ષા બંદોબસ્ત વચ્ચે તેમજ ભારતીય સેનાની કુશળતાના કારણે અને સેનાએ ઓમાનના અખાતથી અરબી સમુદ્ર સુધી લગભગ 20 કલાક સુધી રક્ષણ કર્યા બાદ ખતરનાક હોર્મુઝ જળમાર્ગ પાર કરી લીધો છે.

રિપોર્ટ મુજબ, 28 ફેબ્રુઆરીએ યુદ્ધ શરું થયું હતું, જોકે તેના એક દિવસ પહેલા સંયુક્ત આરબ અમીરાતના રુવૈસ પોર્ટથી ‘પાઈન ગેસ’ નામનું LPG ટેન્કર ભારત આવવાનું હતું અને તે એક સપ્તાહની અંદર પહોંચવાની આશા હતી. પરંતુ યુદ્ધના કારણે હોર્મુઝ જળમાર્ગ પર પ્રતિબંધ લદાયો હતો. જોકે હવે માત્ર પસંદગીના દેશોને જ હોર્મુઝ પાર કરવાની મંજૂરી મળી હોવાથી, ભારતીય LPG ભરેલું આ જહાજને લગભગ ત્રણ સપ્તાહનો સમય લાગી ગયો છે.

ભારતીય જહાજ એક સપ્તાહના બદલે ત્રણ સપ્તાહ બાદ ભારત પહોંચવાનું છે. આ જહાજો ખતરનાક હોર્મુઝમાંથી કેવી રીતે પસાર થયા, તે અંગે ગેસ ચીફ ઓફિસર સોહન લાલે સમગ્ર માહિતી આપી છે. તેમણે કહ્યું કે, યુદ્ધના કારણે જહાજ પર સવાર 27 ક્રૂ મેમ્બર ભયાનક ડર વચ્ચે યુદ્ધને નજરે જોયું છે. જ્યારે તેઓ હોર્મુઝ તરફ હતા, ત્યારે તેઓએ ઉપર ઉડતી મિસાઈલો અને ડ્રોન જોયા હતા. ભારતીય અધિકારીઓએ ક્રૂ મેમ્બર્સને લગભગ 11 માર્ચે જવા માટે તૈયાર રહેવા કહ્યું હતું. જોકે યુદ્ધ આક્રમક બન્યા બાદ જહાજોને 23 માર્ચ સુધી હોર્મુઝ જળમાર્ગ પાર કરવાની મંજૂરી ન હતી. ત્યારપછી ઈરાની સેનાએ ઈરાન જળમાર્ગથી દૂર લારક ટાપુના ઉત્તરમાં એક સાંકળા રસ્તામાંથી જવાની મંજૂરી આપી હતી.

સોહન લાલે વધુમાં કહ્યું કે, ભારતીય સેનાની કુશળતાના કારણે જહાજો હોર્મુઝ પાર કરી શક્યા છે. સેનાએ જહાજનો હોર્મુઝના બદલે લારક જળમાર્ગમાંથી પસાર થવાની સલાહ આપી હતી, કારણ કે હોર્મુઝવાળો રસ્તો સમુદ્રી સુરંગોથી ભરેલો હતો. જ્યારે તમામ ક્રૂ મેમ્બર્સ આગળ જવા માટે તૈયાર થયા ત્યારે ભારતીય અધિકારીઓ અને જહાજના માલિકે જહાજને આગળ વધવાની મંજૂરી આપી હતી. જ્યારે ભારતીય જહાજો પસાર થઈ રહ્યા હતા, ત્યારે ભારતીય નૌસેનાએ ઓમાનની ખાડીથી લઈને અરબ સાગર સુધી લગભગ 20 કલાક સુધી મોનિટરીંગ કર્યું હતું અને ક્રૂ મેમ્બર્સને ગાઈડ પણ કરવાની સાથે સુરક્ષા આપી હતી.