જમ્મૂના આંતરરાષ્ટ્રીય સરહદ ક્ષેત્રમાં પાકિસ્તાન તરફથી ભારતીય RPA પર ફાયરિંગનો મામલો સામે આવ્યો છે. હાલ કોઇ નુકસાનની માહિતી સામે આવી નથી. મધ્ય રાત્રીએ અચાનક કનાચક સેક્ટરમાં પાકિસ્તાનની પોસ્ટથઈ કુલ પાંચ રાઉન્ડ ફાયરીંગ કરવામાં આવ્યુ હતુ. તેમાં 4 રાઉન્ડ પાકિસ્તાની પોસ્ટ ખેરી અને 1 રાઉન્ડ અસલમ પોસ્ટથી કરવામાં આવી હતી.

ભારતીય RPA પોતાના ક્ષેત્રમાં નિયમિતરૂપે પેટ્રોલિંગ કરી રહ્યુ હતુ. તે સમયે જ પાકિસ્તાન તરફથી આ ફાયરિંગ કરવામાં આવ્યુ હતુ. જોકે, ભારતીય ડ્રોનને કોઈ નુકસાન થયું નથી અને તે સુરક્ષિત રીતે પાછો ફર્યો છે. આ ઘટના એવા સમયે બની છે જ્યારે પાકિસ્તાન વારંવાર સરહદ પર યુદ્ધવિરામનું ઉલ્લંઘન કરી રહ્યું છે, જેનો ભારતીય સેનાએ જવાબ આપ્યો છે.

પાકિસ્તાનના સરહદી દળો દ્વારા કરવામાં આવેલી આ કાર્યવાહી તણાવ વધારી શકે છે. ગયા વર્ષે, બંને દેશોમાં હિંસક અથડામણો થઈ હતી. પહેલગામ હુમલા પછી, બંને દેશો વચ્ચે તણાવ વધ્યો છે, અને એક નાની ઉશ્કેરણી પણ યુદ્ધમાં પરિણમી શકે છે. આવી સ્થિતિમાં, પાકિસ્તાનની કાર્યવાહી અત્યંત બેજવાબદાર અને ઉશ્કેરણીજનક માનવામાં આવે છે. પાકિસ્તાનની પ્રવૃત્તિઓ ભારતીય સરહદ નજીક ચાલુ છે અને તે વારંવાર યુદ્ધવિરામનું ઉલ્લંઘન કરી રહ્યું છે. તાજેતરના દિવસોમાં, નિયંત્રણ રેખા નજીક પાકિસ્તાની ડ્રોન અને ફુગ્ગાઓ જોવા મળ્યા છે.

અમેરિકાની ટેક કંપની ઓરેકલે ભારત સહિત વિશ્વભરમાં આશરે 30 હજાર જેટલા કર્મચારીઓની એક સાથે છટણી કરી નાખી હોવાના અહેવાલો છે. જેમાં સૌથી વધુ 12 હજાર કર્મચારીઓ માત્ર ભારતના છે. વળી નવાઇની વાત એ છે કે કર્મચારીઓને વહેલી સવારે છ વાગ્યે માત્ર એક ઇમેલ મોકલીને નોકરીમાંથી કાઢી મુકવાની જાણકારી આપવામાં આવી. કંપનીના કર્મચારીઓએ આ અંગેની જાણકારી સોશિયલ મીડિયા પર જાહેર કરી હતી.

ઓરેકલના કોમ્પ્યુટિંગ બિઝનેસને હાલ અનેક પ્રાંતોમાં મોટો ફટકો પડયો છે, જેમાં ભારત અને મેક્સિકોનો પણ સમાવેશ થાય છે. ઓરેકલ દ્વારા સત્તાવાર આ છટણીની કોઇ માહિતી જાહેર કરવામાં નથી આવી પરંતુ કર્મચારીઓએ પોતાને જે ઇમેલ કંપની તરફથી મળ્યો તેની વિગતો જાહેર કરી છે. ઓરેકલ દ્વારા કર્મચારીઓને જે ઇમેલ મોકલવામાં આવ્યો છે તેમાં લખ્યું છે કે કંપનીમાં મોટા ફેરફાર ચાલી રહ્યા છે, આ ફેરફારોને કારણે એવો નિર્ણય લેવાયો છે કે કર્મચારી તરીકે કંપનીમાં તમારુ જે પદ હતું તેની હવે કોઇ જરૂર નથી રહી.

ઓરેકલના ભારતમાં જ 30 હજાર જેટલા કર્મચારીઓ છે જેમાંથી 12 હજાર જેટલાને છૂટા કરવામાં આવ્યા છે જ્યારે વૈશ્વિક સ્તરે 30 હજાર કર્મચારીઓની છટણી કરાઇ હોવાના અહેવાલો છે. કંપનીના એક પૂર્વ કર્મચારી મેરુગુ શ્રીધરે કહ્યું હતું કે કંપનીએ ભારતમાં 16 કલાકની વર્ક શિફ્ટ રાખી હતી જેના વિરોધમાં મે સામેથી જ કંપનીમાંથી રાજીનામુ આપી દીધુ હતું. કેટલાક કર્મચારીઓએ સોશિયલ મીડિયા પર પોતાના અનુભવો જાહેર કર્યા છે, રેડિટ પર એક પોસ્ટમાં લખવામાં આવ્યું છે કે મારા પિતા 20 વર્ષથી ઓરેકલમાં કામ કરી રહ્યા હતા, તેમને કેન્સર છે, કંપનીએ તેમને એક પણ ફોન ના કર્યો અને માત્ર એક ઇમેલથી છૂટા કરી દીધા. આ કંપનીઓ ખરેખર રાક્ષસ છે. કેટલાકે જવાબમાં લખ્યું કે જે કર્મચારીઓ કંપનીને ઉભી કરવામાં પીઠબળ બન્યા તેમને માત્ર એક ઇમેલથી જ છૂટા કરી દેવાયા. આ ખરેખર સારુ નથી થયું. ભારતમાં ઓરેકલના અન્ય જે કર્મચારીઓ છે તેમની નોકરી પણ જોખમમાં છે, કેમ કે અહેવાલો મુજબ એક મહિનામાં કંપની વધુ અનેક કર્મચારીઓની છટકણી કરવાની તૈયારીમાં છે.

કાનપુરના કિડની કાંડમાં અનેક મોટા ખુલાસા થયા છે. જણાવવામાં આવી રહ્યું છે કે કાનપુરમાં અત્યાર સુધી 60થી વધુ ઓપરેશનો સામે આવ્યા છે. રેકોર્ડ વગર અને સ્ટાફ વગર સર્જરી કરવાની ચોંકાવનારી રીત બહાર આવી છે.

કાનપુરના કિડની કૌભાંડમાં અત્યાર સુધીના સૌથી ભયાનક ખુલાસા થયા છે. તપાસમાં સામે આવ્યું છે કે અત્યાર સુધી 60થી વધુ ગેરકાયદેસર ઓપરેશન કરવામાં આવ્યા છે. આ આખું નેટવર્ક કોઈ ફિલ્મી સ્ક્રિપ્ટની જેમ અત્યંત આયોજનબદ્ધ રીતે ચાલતું હતું, જેમાં ન તો કોઈ મેડિકલ રેકોર્ડ રખાતો કે ન તો કાયમી સ્ટાફની હાજરી હોતી.

આ રેકેટમાં ઓપરેશનના દિવસે હોસ્પિટલના સામાન્ય સ્ટાફને હટાવી દેવામાં આવતો હતો. તેની જગ્યાએ બહારથી બોલાવેલી એક ખાસ સર્જિકલ ટીમ માત્ર તે દિવસ માટે આવતી. ઓપરેશન બાદ પુરાવા નાશ કરવા માટે દર્દીઓને તાત્કાલિક અલગ-અલગ સ્થળોએ શિફ્ટ કરી દેવાતા. હોસ્પિટલમાં ઓપરેશનની કોઈ સત્તાવાર એન્ટ્રી કે ફોલોઅપ રેકોર્ડ રાખવામાં આવતો ન હતો.

આ આખા રેકેટનો મુખ્ય ચહેરો શિવમ અગ્રવાલ ઉર્ફે ‘કાના’ છે, જે માત્ર 8 ધોરણ પાસ છે. તે અગાઉ એમ્બ્યુલન્સ ચલાવતો હતો, પરંતુ ગળામાં સ્ટેથોસ્કોપ નાખી નકલી ડોક્ટર બનીને તે દર્દીઓનો ભરોસો જીતતો અને તેમને જાળમાં ફસાવતો. ડિજિટલ મોરચે મેરઠનો ડોક્ટર અફઝાલ ટેલિગ્રામ ગ્રુપ દ્વારા ડોનર અને રીસીવર વચ્ચે સીધો સંપર્ક કરાવી સોદાબાજી કરતો હતો.

તપાસમાં એક વિદેશી મહિલાનું ટ્રાન્સપ્લાન્ટ પણ સામે આવ્યું છે, જે આ રેકેટના આંતરરાષ્ટ્રીય કનેક્શન તરફ ઈશારો કરે છે. આ છેતરપિંડીનો ભોગ બનેલી મેરઠની પારુલ તોમરે 80 લાખ રૂપિયા ખર્ચ્યા હોવા છતાં આજે તેની હાલત અત્યંત ગંભીર છે. ઈન્ફેક્શનને કારણે તેને લખનૌની SGPGI હોસ્પિટલમાં રિફર કરવામાં આવી છે. ડોનર આયુષ ચૌધરી (MBA વિદ્યાર્થી) ની હાલત પણ હાલ સ્થિર છે પરંતુ જોખમ યથાવત છે.

પોલીસે ‘આરોહી’ અને ‘આહુજા’ જેવી હોસ્પિટલો સીલ કરી છે. કાનપુર મેડિકલ કોલેજે સ્પષ્ટ કર્યું છે કે તેમની પાસે કિડની ટ્રાન્સપ્લાન્ટની મંજૂરી નથી. હાલ પોલીસ હોસ્પિટલ સંચાલકો અને નકલી ડોક્ટરોની ધરપકડ કરી આ મોટા નેટવર્કની ઊંડી તપાસ કરી રહી છે.