પાકિસ્તાન હજુ પણ આતંકી સંગઠનોનો અડ્ડો છે, પાકિસ્તાન આ આતંકી સંગઠનોનો ઉપયોગ ભારત વિરુદ્ધ કરી રહ્યું છે આ ખુલાસો અમેરિકાની સરકારના કોંગ્રેસનલ રિસર્ચ સર્વિસ સીઆરએસ દ્વારા કરવામાં આવ્યો છે. ભારત પર હુમલા કરી ચુકેલા આ આતંકી સંગઠનોના ખાતમાના નામે પાકિસ્તાન દ્વારા અનેક ઓપરેશન ચલાવવામાં આવ્યા છે જોકે તેમ છતા આ સંગઠનો મોટા પ્રમાણમાં પાકિસ્તાનની ધરતી પર સક્રિય છે. પાક.માં વર્ષ ૨૦૧૯માં આતંકી ઘટનાઓમાં ૩૬૫ લોકો માર્યા ગયા હતા જે સંખ્યા ગયા વર્ષે વધીને ચાર હજારને પાર જતી રહી છે.

અમેરિકન સરકારના સીઆરઅસનો આ રિપોર્ટ ૨૫ માર્ચ ૨૦૨૬ની સ્થિતિ મુજબનો છે, જેમાં વધુમાં ખુલાસો કરતા જણાવાયું છે કે હાલ પણ પાકિસ્તાન આતંકવાદનું મથક છે, હાલ પણ અનેક હથિયારધારી સંગઠનો સક્રિય છે, કેટલાક આતંકી સંગઠનો તો ૧૯૮૦ના સમયથી પાકિસ્તાનમાં ખુલ્લેઆમ ચાલી રહ્યા છે.

પાકિસ્તાનમાં સક્રિય આ આતંકી સંગઠનોના ટાર્ગેટ ક્યા ક્યા દેશો કે સ્થળો છે તેની વિગતો પણ અમેરિકા દ્વારા જાહેર કરવામાં આવી છે.

જેમ કે કેટલાક આતંકી સંગઠનો માત્ર અફઘાનિસ્તાન પર ધ્યાન કેન્દ્રીત કરી રહ્યા છે, જ્યારે કેટલાક સંગઠનો ભારતના અન્ય ભાગોમાં કે જમ્મુ કાશ્મીરમાં હુમલા કરવા સક્રિય છે.

કેટલાક આતંકી સંગઠનો માત્ર પાકિસ્તાનની અંદર જ હુમલા કરી રહ્યા છે. જેમાં શિયા મુસ્લિમો પણ નિશાન બનાવવામાં આવતા હોય છે. રિપોર્ટ મુજબ ૧૫માંથી ૧૨ એવા આતંકી સંગઠનો છે કે જે કટ્ટરવાદી ઇસ્લામિક વિચારધારા સાથે જોડાયેલા છે અને અમેરિકાના કાયદાઓ મુજબ તેને ફોરેન ટેરેરિસ્ટ ઓર્ગેનાઇઝેશન જાહેર કરવામાં આવ્યા છે.

પાક.ના આતંકીઓનો મુખ્ય ટાર્ગેટ જમ્મુ કાશ્મીર

અમેરિકાના આ રિપોર્ટ મુજબ પાકિસ્તાનમાં સક્રિય આતંકી સંગઠનોમાં મોટાભાગના એવા છે કે જેનો મુખ્ય ટાર્ગેટ ભારતનું જમ્મુ કાશ્મીર છે, આવા સંગઠનોમાં લશ્કર-એ-તોયબાનો સમાવેશ થાય છે જેની સ્થાપના ૧૯૮૦ના સમયમાં કરવામાં આવી હતી. આ સંગઠન મુખ્યત્વે પાકિસ્તાનના પંજાબ અને કબજાવાળા કાશ્મીરમાં સક્રિય રહ્યું છે. ૨૦૦૮ના મુંબઇ હુમલા માટે પણ પાકિસ્તાનનું જ આ આતંકી સંગઠન જવાબદાર હોવાની કબુલાત અમેરિકાના આ રિપોર્ટમાં કરવામાં આવી છે.

અન્ય સંગઠનોમાં જૈશ-એ-મોહમ્મદ, હરકત-ઉલ-જિહાદ ઇસ્લામી, હરકત-ઉલ-મુજાહિદિન, હિઝબુલ મુજાહિદીન વગેરેનો સમાવેશ આ રિપોર્ટમાં કરવામાં આવ્યો છે. આ સંગઠનો ગમે ત્યારે હજુ પણ ભારત પર હુમલા કરી શકે છે.

વૈશ્વિક સ્તરે ખતરનાક સંગઠનો પાક.માં ઃ રિપોર્ટ

સીઆરએસના રિપોર્ટમાં પાકિસ્તાનના આંતરરાષ્ટ્રીય આતંકી સંગઠનોનો ઉલ્લેખ પણ કરવામાં આવ્યો છે, આ એવા સંગઠનો છે કે જે માત્ર ભારત જ નહીં વૈશ્વિક સ્તરે ખતરનાક માનવામાં આવે છે. આ સંગઠનોમાં અલ-કાયદા ટોચના સ્થાને છે જેની સ્થાપના ૧૯૮૮માં ઓસામા બિન લાદેન દ્વારા કરવામાં આવી હતી. લાદેનને ઠાર માર્યાને આટલા વર્ષો વીતી ગયા છતા અલ કાયદા પાક.ના અંતરિયાળ વિસ્તારોમાં સક્રિય છે. અન્ય સંગઠન ઇસ્લામિક સ્ટેટ ખોરાસન પ્રોવિન્સનો સમાવેશ થાય છે જે આઇએસ સાથે જોડાયેલું છે.

પાકિસ્તાનમાં જ ખતરા સમાન આતંકી સંગઠનો

પાકિસ્તાનમાં તેહરીક-એ-તાલિબાન પાકિસ્તાન ટીટીપી પાક.માં જ હુમલા કરી રહ્યું છે, આ સંગઠનની સ્થાપના ૨૦૦૭માં નૂર વાલી મેહસુદ દ્વારા કરવામાં આવી છે. આ ઉપરાંત પાકિસ્તાનના બલુચિસ્તાનમાં પણ અનેક સંગઠનો સક્રિય છે. એટલુ જ નહીં પાકિસ્તાનમાં શિયા વિરોધી સંગઠનો કેટલા છે તેની વિગતો પણ અમેરિકાના આ રિપોર્ટમાં જાહેર કરાઇ છે, આવા શિયા મુસ્લિમ વિરોધી સંગઠનમાં લશ્કર-એ-જહાંગવીનો સમાવેશ થાય છે. પાક.માં ૨૦૦૩થી આતંકવાદ વકર્યો જ્યારે ૨૦૦૯માં તે વધુ વિકરાળ બનતો ગયો. ૨૦૨૫માં આતંકી હુમલાઓમાં પાક.માં ૪૦૦૧ લોકો માર્યા ગયા જે દસકાનો સૌથી મોટો વાર્ષિક મૃત્યુઆંક છે, મોટાભાગના મૃતકો ખૈબર અને બલુચિસ્તાનના છે. પાકિસ્તાન અનેક વખત આતંકી સંગઠનોના ખાતમા માટે ઓપરેશનોના દાવા કરતુ રહ્યું છે જોકે તેમ છતા અનેક આતંકી સંગઠનો સક્રિય છે અને તેની સંખ્યા પણ વધી રહી છે.

ધાર્મિક તહેવારો પર જાહેર રજાઓની વધી રહેલી માગણીઓ વચ્ચે સુપ્રીમ કોર્ટે એક સ્પષ્ટતા કરી છે. સુપ્રીમે કહ્યું છે કે બંધારણના આર્ટિકલ ૨૫ હેઠળ લોકોને જે ધાર્મિક સ્વતંત્રતાના અધિકારો મળ્યા છે તેમાં ધાર્મિક તહેવારો સમયે જાહેર રજાની માગણી કરવાનો અધિકાર સામેલ નથી, ધાર્મિક તહેવારોએ જાહેર રજાઓ સરકારનો નીતિગત નિર્ણય છે. 

સુપ્રીમ કોર્ટે એવુ પણ અવલોકન કર્યું હતું કે ભારતમાં પહેલાથી જ અનેક જાહેર રજાઓ આવે છે એવામાં વધુ એક જાહેર રજાની માગણી સ્વીકારી શકાય નહીં. ગુરુ ગોવિંદસિંહની જયંતિ પર પુરા દેશમાં રજા જાહેર કરવામાં આવે તેવી માગણી કરતી એક જાહેર હિતની અરજીની સુનાવણી દરમિયાન સુપ્રીમ કોર્ટે આ અવલોકન કર્યું હતું. સાથે જ ગુરુ ગોવિંદસિંહના વખાણ પણ કર્યા હતા. ન્યાયાધીશ વિક્રમનાથ અને સંદીપ મેહતાની બેંચે કહ્યું હતું કે ગુરુ ગોવિંદસિંહજી પ્રત્યે ભારે સન્માન છે. તેઓ ન્યાય, કર્તવ્ય પ્રત્યે અતુટ પ્રતિબદ્ધતાનું ઉદાહરણ છે. 

સુપ્રીમે કહ્યું કે અરજીમાં જે માગ કરાઇ છે તે પાછળની ભાવના સન્માનનીય છે. પરંતુ આ મામલામાં ન્યાયિક દખલ આપવી શક્ય નથી. ધાર્મિક તહેવારો સમયે જાહેર રજાનો નિર્ણય લેવો તે સરકારની નીતિની બાબત છે અને તેમાં કોર્ટ દખલ ના આપી શકે.  સુપ્રીમે કહ્યું હતું કે એક તરફ બંધારણ દ્વારા અપાયેલી ધાર્મિક સ્વતંત્રતા એક નાગરિકને પોતાનો ધર્મ પાળવાની તેનો પ્રચાર કરવાની સ્વતંત્રતા કે અધિકાર આપે છે. જોકે રાજ્યો પાસેથી જાહેર રજાઓ અપાવવાનો અધિકાર આ ધાર્મિક સ્વતંત્રતામાં સામેલ નથી. રાજ્યો કે કેન્દ્ર સરકાર ઇચ્છે તો આ અંગે નિર્ણય લઇ શકે છે, સામાન્ય રીતે જાહેર રજાઓનો નિર્ણય સ્થાનિક જરૂરિયાતો, સામાજિક સાંસ્કૃતિક સ્થિતિ પર આધાર રાખે છે. ભારત જેવા વિવિધતાપૂર્ણ દેશમાં પહેલાથી જ અનેક ધાર્મિક તહેવારો પર જાહેર રજાઓ અપાય છે, ભિન્નતાને ભેદભાવ ના માની શકાય. બેંચમાં સામેલ ન્યાયાધીશ સંદીપ મેહતાએ ટિપ્પણી કરી હતી કે ભારત પહેલાથી જ હોલીડેનો દેશ છે.

મધ્યપૂર્વમાં ચાલતા યુદ્ધને લઈને ૨૪ માર્ચના રોજ વડાપ્રધાન નરેન્દ્ર મોદી અને અમેરિકન પ્રમુખ ડોનાલ્ડ ટ્રમ્પ વચ્ચે વાતચીત થઈ હતી. હવે આ ફોન કોલને લઈને ન્યૂયોર્ક ટાઇમ્સે એવો દાવો કર્યો છે કે આ વાતચીતમાં ઇલોન મસ્ક પણ હાજર હતો. ભારતીય વિદેશ મંત્રાલયે આ વાત ફગાવી દીધી છે. ટ્રમ્પ અને મોદી વચ્ચે થયેલી વાતચીત ઇરાન યુદ્ધ શરૂ થયા પછીની પ્રથમ વાતચીત હતી.

પીએમ મોદી અને ટ્રમ્પે મંગળવારે વાત કરી હતી. ન્યૂયોર્ક ટાઇમ્સે અમેરિકાના અજાણ્યા અધિકારીઓને ટાંકીને જણાવ્યું હતું કે પીએમ મોદી અને ટ્રમ્પ વચ્ચેની વાતચીતમાં ઇલોન મસ્ક પણ જોડાયા હતા. બે રાષ્ટ્રપ્રમુખો વચ્ચેની વાતચીતમાં કોઈ ખાનગી વ્યક્તિ જોડાય તેવું ભાગ્યે જ બને છે. આવો ભાગ્યે જ બનતો બનાવ બન્યો હતો.

અમેરિકન પ્રમુખ ટ્રમ્પ મોદી સાથે ઘણા સારા સંબંધ ધરાવે છે અને બંને વચ્ચેનો સંવાદ રચનાત્મક રહ્યો હતો એમ વ્હાઇટ હાઉસ પ્રેસ સેક્રેટરી કેરોલિન લેવિટે જણાવ્યું હતું.

ન્યૂયોર્ક ટાઇમ્સના રિપોર્ટે જણાવ્યું હતું કે મસ્કના આ સંવાદમાં સમાવેશને બે અમેરિકન અધિકારીઓએ સમર્થન આપ્યું હતું. આ બતાવે છે કે વિશ્વની સૌથી સમૃદ્ધ વ્યક્તિના અમેરિકન પ્રમુખ સાથે ઘણા સારા સંબંધો છે. ગયા વર્ષે મસ્ક સરકારમાંથી નીકળી ગયા ત્યારે ટ્રમ્પ અને મસ્ક વચ્ચે વિખવાદ થયો હતો. અહેવાલે જણાવ્યું હતું કે તે હજી સુધી સ્પષ્ટ થયું નથી કે શા માટે મસ્ક આ કોલ પર હતા અને તેમણે વાત કરી હતી.

ભારતના વિદેશ મંત્રાલયે જણાવ્યું હતું કે આ વાતચીતને લઈને જે સમાચાર પ્રસારિત કરવામાં આવી રહ્યા છે તે ભ્રામક અને વાસ્તવિકતાથી પરે છે. વિદેશ મંત્રાલયના જણાવ્યા મુજબ પશ્ચિમ એશિયા અંગેના સંવાદનો મુખ્ય હેતુ વર્તમાન સ્થિતિ અંગે વૈચારિક આદાનપ્રદાનનો હતો. મંત્રાલયના જણાવ્યા મુજબ બંને નેતાઓએ આ ક્ષેત્રમાં જારી ઘટનાક્રમ, સુરક્ષા પરિદ્રશ્ય અને શાંતિ જાળવી રાખવાના પ્રયત્નો પર ચર્ચા કરી.