ઇચ્છામૃત્યુ પામનારા ભારતના પ્રથમ નાગરિક હરીશ રાણાના અંતિમ સંસ્કાર કરવામાં આવ્યા હતા, દિલ્હીના એઇમ્સમાં દસ દિવસ રાખ્યા બાદ હરીશ રાણા ઇચ્છામૃત્યુ પામ્યા હતા. ભારે હૈયે પરિવારે હરીશને અંતિમ વિદાય આપી હતી. હરીશના અંતિમસંસ્કાર દિલ્હીના ગ્રીન પાર્ક સ્મશાન પર કરવામાં આવ્યા હતા. આ દરમિયાન હરીશના માતા પિતાએ હિમ્મત દાખવીને કહ્યું હતું કે રડશો નહીં હરીશ હવે એક સુખદ સ્થળે પહોંચી ગયો છે.  

૨૦૧૩માં બી.ટેકના અભ્યાસ દરમિયાન હોસ્ટેલ પરથી નીચે પડી જવાને કારણે હરીશ રાણાને બ્રેઇન ઇન્જરી થઇ હતી, જે બાદથી તે કોમામાં જતો રહ્યો હતો. ૧૩ વર્ષ સુધી કોમામાં રહ્યા બાદ અંતે સુપ્રીમ કોર્ટની મંજૂરી મળતા હરીશને ઇચ્છામૃત્યુ આપવામાં આવ્યું હતું. 

ઇચ્છામૃત્યુની આ પ્રક્રિયા ૧૦ દિવસ સુધી ચાલી હતી. મંગળવારે હરીશે દિલ્હીના એઇમ્સમાં અંતિમ શ્વાસ લીધા હતા. બુધવારે દિલ્હીમાં ગ્રીન પાર્ક સ્મશાનઘાટ પર તેણે અંતિમ શ્વાસ લીધા હતા. હરીશને તેના નાના ભાઇ આશીષ અને બહેન ભાવનાની હાજરીમાં મુખાગ્ની આપી હતી. 

અંતિમ સંસ્કાર દરમિયાન મંત્રોચ્ચાર કરવામાં આવ્યા હતા, આ દરમિયાન મોહાલ અત્યંત ભાવુક હતો, હરીશના માતા નિર્મલા દેવીએ જોડેલા હાથે પુત્રને ભાવુક વિદાય આપી હતી, પિતા અશોક રાણા લોકોની હિમ્મત વધારતા રહ્યા અને કહેતા રહ્યા કે મારો પુત્ર હવે એક સુખી સ્થાન પર છે, તે હંમેશા એક સારો પુત્ર રહ્યો. 

હરીશ રાણા અને તેનો પરિવાર ગાઝિયાબાદની જે સોસાયટીમાં કહે છે ત્યાંના લોકો અંતિમસંસ્કાર માટે દિલ્હી પહોંચ્યા હતા. 

આ ઉપરાંત સામાજિક સંસ્થાના લોકો પણ જોડાયા હતા. પરિવારે હરીશ રાણાની આંખો સહિત પાંચ અંગો દાન કરવાનો નિર્ણય લીધો હતો.

 ઉત્તર પ્રદેશ કોંગ્રેસ પ્રદેશ પ્રમુખ અજય રાય પણ સ્મશાનઘાટ પહોંચ્યા હતા. તેમણે કહ્યું હતું કે હરીશ તો જતો રહ્યો પરંતુ તેના અંગોને દાન કરવાનો પરિવારે નિર્ણય લીધો છે.   

મિડલ ઈસ્ટમાં ચાલી રહેલા ભીષણ યુદ્ધ વચ્ચે ઈરાને એક વ્યૂહાત્મક જાહેરાત કરી છે. ઈરાનના વિદેશ મંત્રી અરાઘચીએ સ્પષ્ટ કર્યું છે કે હોર્મુઝની સામુદ્રધુની (Strait of Hormuz) માત્ર દુશ્મન દેશો અને તેમના સહયોગીઓ માટે જ બંધ છે. ભારત, ચીન, રશિયા, ઈરાક અને પાકિસ્તાન જેવા દેશોના જહાજોને આ મહત્ત્વપૂર્ણ જળમાર્ગ પરથી સુરક્ષિત પસાર થવાની મંજૂરી આપવામાં આવી છે.

ભારત સહિતના મિત્ર દેશો સાથે તાલમેલ

અરાઘચીએ આપેલા ઈન્ટરવ્યુમાં જણાવ્યું હતું કે, “અમે યુદ્ધની સ્થિતિમાં છીએ, તેથી દુશ્મન દેશોના જહાજોને પસાર થવા દેવાનું કોઈ કારણ નથી. પરંતુ જે દેશોને અમે મિત્ર માનીએ છીએ, તેમની વિનંતી પર અમારી સેનાએ સુરક્ષિત માર્ગ પૂરો પાડ્યો છે.” તેમણે ખાસ ઉલ્લેખ કર્યો કે ભારતના બે જહાજો થોડા દિવસો પહેલા જ આ માર્ગ પરથી સુરક્ષિત પસાર થયા હતા. આ ઉપરાંત ચીન, રશિયા, પાકિસ્તાન અને બાંગ્લાદેશ જેવા દેશોએ પણ ઈરાન સાથે સંપર્ક સાધીને આર્થિક પરિવહન ચાલુ રાખવા માટે તાલમેલ સાધ્યો છે.

અમેરિકા સાથે કોઈ ઔપચારિક વાટાઘાટો નથી

અમેરિકી રાષ્ટ્રપતિ ડોનાલ્ડ ટ્રમ્પના દાવાઓથી વિપરીત, ઈરાને ફરી એકવાર સ્પષ્ટ કર્યું છે કે અમેરિકા સાથે કોઈ ઔપચારિક વાતચીત થઈ રહી નથી. અરાઘચીએ બેટૂક શબ્દોમાં કહ્યું કે, “બેકચેનલથી સંદેશાની આપ-લે કરવી એ ડિપ્લોમેસી કે વાટાઘાટો નથી. વોશિંગ્ટન અલગ-અલગ માધ્યમોથી સંદેશા મોકલી રહ્યું છે, પરંતુ તેહરાન તેને ઔપચારિક વાર્તા માનતું નથી.” તેમણે વધુમાં ઉમેર્યું કે અમેરિકા આ સંઘર્ષમાં પોતાના લક્ષ્યો હાંસલ કરવામાં નિષ્ફળ રહ્યું છે.

પોતાની શરતો પર જ આવશે અંત

ઈરાને પોતાની શક્તિનું પ્રદર્શન કરતા કહ્યું છે કે તેઓ યુદ્ધને લાંબુ ખેંચવા માંગતા નથી, પરંતુ આ સંઘર્ષનો કાયમી અંત માત્ર ઈરાનની શરતો પર જ આવશે. ઈરાનની મુખ્ય શરતોમાં ભવિષ્યમાં હુમલા ન કરવાની ગેરંટી અને યુદ્ધમાં થયેલા નુકસાનની ભરપાઈનો સમાવેશ થાય છે. હોર્મુઝ પર નિયંત્રણ જાળવી રાખીને ઈરાને સાબિત કરી દીધું છે કે વિશ્વના તેલ અને ગેસ સપ્લાયની કમાન તેમના હાથમાં છે.

ઇઝરાયેલ-અમેરિકા અને ઇરાનના યુદ્ધને કારણે દેશમાં એલપીજી સંકટની સ્થિતિને પહોંચી વળવા માટે સરકાર દ્વારા નવા નિયમો જાહેર કરવામાં આવ્યા છે. હવેથી જે પણ વિસ્તારમાં પીએનજીની સુવિધા હોય ત્યાં કનેક્શન લેવું ફરજિયાત થઇ ગયું છે. ટૂંક સમયમાં જે પણ વિસ્તારોમાં પીએનજી કનેક્શન શક્ય છે ત્યાં એલપીજી રદ કરી દેવામાં આવી શકે છે. આ સાથે જ સરકારે પીએનજી કનેક્શન માટે રાહતો જાહેર કરી છે જે મુજબ હવેથી સિક્યોરિટી ડિપોઝિટ નહીં આપવી પડે અને ૫૦૦ રૂપિયા સુધી મફત ગેસ મળી રહેશે.

પેટ્રોલિયમ મંત્રાલયના સંયુક્ત સચિવ સુજાતા શર્માએ પ્રેસ કોન્ફરંસ કરીને ઇરાન-ઇઝરાયેલ યુદ્ધની સ્થિતિની ભારત પર અસરો અંગે કેટલીક સ્પષ્ટતાઓ કરી હતી. સાથે જ પીએનજી કનેક્શનને લઇને રાહતો જાહેર કરી છે. નવા પીએનજી કનેક્શન પર કંપનીઓ સિક્યોરિટી ચાર્જ નહીં લે સાથે જ ૫૦૦ રૂપિયા સુધીનો ગેસ ફ્રી આપવામાં આવશે. જોકે આ સુવિધા તમામ ગ્રાહકોને નહીં પણ ૩૧મી માર્ચ સુધી કનેક્શન લેનારાઓને આપવામાં આવશે તેવા અહેવાલો છે.

બીજી તરફ પીટીઆઇના અહેવાલો મુજબ સરકારે એક આદેશ જારી કરીને જણાવ્યું છે કે જો તમારા વિસ્તારમાં પીએનજી પાઇપ લાઇન ગેસ કનેક્શન હોય તો ટૂંક સમયમાં એલપીજી કનેક્શન બંધ કરી દેવામાં આવશે, ગ્રાહકોને એલપીજીમાંથી પીએનજી તરફ વાળવા માટે આ નિર્ણય લેવામાં આવ્યો છે. મીડિયા સાથે વાતચીત દરમિયાન સંયુક્ત સચિવ સુજાતા શર્માએ વધુમાં જણાવ્યું હતું કે જે વિસ્તારમાં પીએનજીની સુવિધા હોય ત્યાં કનેક્શન લેવા માટે ગ્રાહકોને નોટિસ મોકલવામાં આવશે. ત્રણ મહિનાની અંદર પીએનજી કનેક્શન લઇ લેવાનું રહેશે, જો આમ કરવામાં ગ્રાહકો નિષ્ફળ રહે તો તેમને જે એલપીજી મળી રહ્યો છે તે બંધ કરી દેવામાં આવશે.

સરકારી ડેટા મુજબ હાલમાં અનેક ઘરો સુધી પીએનજી કનેક્શન પહોંચી ગયા છે, દેશમાં આશરે ૩૩ કરોડ જેટલા ગ્રાહકો છે, જેની પાસે એલપીજી કનેક્શન છે, જ્યારે ૧.૫૭ કરોડ લોકો પાસે પીએનજી કનેક્શન છે, એટલે કે કરોડો લોકો હજુ પણ એલપીજી પર નિર્ભર છે. સરકારની પ્રધાનમંત્રી ઉજ્જવલા યોજના હેઠળ ૧૦.૩૫ કરોડ લોકોને કનેક્શન આપવામાં આવ્યા છે. હાલમાં વિવિધ રાજ્યોમાં એલપીજી સિલિન્ડરોની સંગ્રહખોરી વધી રહી છે, એવામાં મોટા પ્રમાણમાં દરોડા પાડવામાં આવી રહ્યા છે. ૨૪મી માર્ચના રોજ વિવિધ રાજ્યોમાં ૨૭૦૦ જેટલા દરોડા પાડવામાં આવ્યા અને ૨૦૦૦ જેટલા સિલિન્ડર જપ્ત કરવામાં આવ્યા છે.

દરમિયાન કેટલાક રેસ્ટોરાં અને હોટેલવાળા ગ્રાહકો પાસેથી એલપીજી ચાર્જ વસુલવા લાગ્યા છે, આવો કોઇ પણ ચાર્જ નહીં વસુલવાની કેન્દ્રીય ગ્રાહક સુરક્ષા ઓથોરિટીએ ચેતવણી જાહેર કરી છે. ઓથોરિટીએ દેશના તમામ રેસ્ટોરાં, હોટેલ, ખાણીપીણીના દુકાનો વગેરે માટે આદેશ જાહેર કર્યો છે, જેમાં જણાવવામાં આવ્યું છે કે જો ગ્રાહકો પાસેથી એલપીજી કે ફ્યૂઅલ ચાર્જ વસુલવામાં આવ્યો તો આકરા પગલા લેવામાં આવશે. આ સાથે જ સરકારે એવી પણ સ્પષ્ટતા કરી છે કે દેશમાં પેટ્રોલ, ડીઝલની કોઇ જ અછત નથી, લોકોએ અફવાઓમાં આવીને જથ્થાબંધ ખરીદી ના કરવી તેવી સલાહ આપવામાં આવી છે.