છોટાઉદેપુર જિલ્લાના ટામેટા પકવતા ખેડૂતો હાલ બેવડી મુસીબતમાં મુકાયા છે. એકતરફ કુદરતી આફત અને બીજી તરફ બજારમાં મળતા તળિયાના ભાવને કારણે જગતનો તાત દેવાદાર બનવાની સ્થિતિમાં આવી ગયો છે. જિલ્લામાં ટામેટાના ભાવ કિલો દીઠ માત્ર 6 થી 7 રૂપિયા થઈ જતા ખેડૂતોની હાલત કફોડી બની છે.

તાજેતરમાં આવેલા વાવાઝોડાને કારણે ટામેટાના છોડ વજનથી નમી પડ્યા છે, જેનાથી પાકને મોટું નુકસાન થયું છે. ખેડૂતોએ લાખો રૂપિયાનો ખર્ચ કરીને આ ખેતી પકવી હતી, પરંતુ હવે જ્યારે પાક તૈયાર છે ત્યારે બજારમાં ભાવ મળતા નથી. ખેડૂતો ટામેટા તોડવા માટે મજબૂર છે, પરંતુ તોડામણનો ખર્ચ પણ નીકળે તેમ નથી. સ્થિતિ એટલી હદે વણસી છે કે કેટલાક ખેડૂતો હવે ટામેટાના છોડ જ ઉખેડી નાખવાનું મન બનાવી રહ્યા છે.

ખેડૂતોનો આક્ષેપ છે કે, છોટાઉદેપુર જિલ્લા ખેતીવાડી વિભાગ દ્વારા બાગાયતી ખેતીમાં થયેલા નુકસાનનો કોઈ પણ પ્રકારનો સર્વે કરવામાં આવતો નથી. વળતર તો દૂરની વાત છે, પરંતુ અધિકારીઓ નુકસાનીની ગણતરી કરવા પણ ખેતરો સુધી પહોંચતા નથી, જેને કારણે ખેડૂતો લાચાર અનુભવી રહ્યા છે.

છોટાઉદેપુર જિલ્લામાં એક પણ જગ્યાએ કોલ્ડ સ્ટોરેજની સુવિધા નથી. આ સુવિધાના અભાવે ખેડૂતોએ પાક તૈયાર થતા જ તાત્કાલિક વેચી દેવો પડે છે. વેપારીઓ જે ભાવ આપે તે ભાવે માલ વેચવા સિવાય ખેડૂતો પાસે બીજો કોઈ વિકલ્પ રહેતો નથી. જિલ્લાના ખેડૂતો વર્ષોથી તાલુકા મથકો અને APMC સેન્ટરોમાં કોલ્ડ સ્ટોરેજની માંગ કરી રહ્યા છે, પરંતુ હજુ સુધી આ દિશામાં કોઈ નક્કર કામગીરી થઈ નથી. હાલ તો 6 થી 7 રૂપિયાના ભાવે ટામેટા વેચવા પડતા હોવાથી ખેડૂતો આર્થિક રીતે પાયમાલ થઈ રહ્યા છે. જો સરકાર દ્વારા વહેલી તકે સર્વે કરી વળતર જાહેર કરવામાં નહીં આવે, તો આ વિસ્તારના ખેડૂતો માટે ગુજરાન ચલાવવું મુશ્કેલ બની જશે.

બોટાદ જિલ્લાના સાળંગપુર ગામ તા.બરવાળા ખાતે આવેલ કષ્ટભંજનદેવ હનુમાનજીનું મંદિર શ્રધ્ધાળુઓની આસ્થાનું મોટુ કેન્દ્ર છે. જ્યાં દર્શનાર્થે ખુબ મોટા પ્રમાણમાં શ્રદ્ધાળુઓ,યાત્રીકો તથા મહાનુભવો પધારે છે.

સાળંગપુર ગામ ખાતે કષ્ટભંજન મંદિરની પાછળ આવેલાં કષ્ટભંજન કિરાણા સ્ટોર થી દરબાર ગઢ તરફનાં સમગ્ર જાહેર રસ્તા ઉપર તથા બોટાદ જવાના રસ્તે આવેલ સાળંગપુર ટી પોઈન્ટથી કષ્ટભંજન હનુમાનજી મંદિરના મેઈન દરવાજા સુધીના માર્ગ ઉપર ફેરિયાઓ, લારી-ગલ્લા કે અન-અધિકૃત રીતે મુકવામાં આવતા આનંદ-પ્રમોદની રાઇડ્સ અથવા ખાનપાનની લારીઓ, પાથરણાઓ રાખવા તથા દબાણકારો દ્વારા દબાણ કરી યાત્રીકોને અવરજવરમાં અવરોધ ઉભો કરવામાં આવે છે.

દર્શનાર્થે આવતાં શ્રધ્ધાળુઓની સલામતી/સુરક્ષા જળવાય તથા કાયદો અને વ્યવસ્થાને ધ્યાને લઈ યોગ્ય રીતે વ્યવસ્થા જાળવી શકાય તથા મંદિર પરિસર તથા જાહેર રસ્તા ઉપર ભાગદોડ જેવી ઘટના ન બને તે હેતુસર ઉપરોક્ત ફેરીયા, લારી-ગલ્લા કે અન-અધિકૃત રીતે મુકવામાં આવતાં સાધનોની બોટાદ અધિક જિલ્લા મેજિસ્ટ્રેટશ્રી પી.એલ ઝણકાત દ્વારા મનાઈ ફરમાવવામાં આવી છે. જે અંતર્ગત કષ્ટભંજન મંદિરની પાછળ આવેલ કષ્ટભંજન કિરાણા સ્ટોર થી દરબાર ગઢ સુધીનાં જાહેર ૨સ્તા ઉપર ફેરીયા, લારી-ગલ્લા કે અન-અધિકૃત રીતે મુકવામાં આવતાં આનંદપ્રમોદની અથવા ખાનપાનની લારીઓ, પાથરણાઓ રાખવાની મનાઈ ફરમાવવામાં આવી છે.

આ જાહેરનામું તા.૨૩/૦૩/૨૦૨૬થી તા.૨૨/૦૫/૨૦૨૬ (૨-માસ બંને દિવસો સહિત) સુધી અમલમાં રહેશે. આ જાહેરનામાનો ભંગ/ઉલ્લંઘન કરનારને ગુજરાત પોલીસ અધિનિયમ – ૧૯૫૧ ની કલમ – ૧૩૧ મુજબ શિક્ષાને પાત્ર થશે. જાહેરનામાનો અમલ અને તેનાં ભંગ બદલના પગલા લેવા માટે હેડ કોન્સટેબલથી નીચેનાં ન હોય તેવા ફરજ પરનાં પોલીસ અધિકારીને અધિકાર રહેશે.

રાજ્ય સરકારના વહીવટમાં પારદર્શિતાના દાવાઓ વચ્ચે એક ચોંકાવનારો ખુલાસો થયો છે. ગુજરાતના સુપ્રસિદ્ધ યાત્રાધામોનો વિકાસ કરતું ગુજરાત પવિત્ર યાત્રાધામ વિકાસ બોર્ડ છેલ્લા 19 વર્ષથી પોતાનો હિસાબ આપવામાં નિષ્ફળ રહ્યું છે. CAG ના અહેવાલો મુજબ, આ બોર્ડે વર્ષ 2006-07 થી અત્યાર સુધીના વાર્ષિક વહીવટી અહેવાલો વિધાનસભા સમક્ષ રજૂ કર્યા નથી.

સત્તાવાર વિગતો અનુસાર, ગાંધીનગર સ્થિત ગુજરાત પવિત્ર યાત્રાધામ વિકાસ બોર્ડ ના કુલ 19 વાર્ષિક અહેવાલો બાકી બોલે છે. 31 જુલાઈ 2025 સુધીની સ્થિતિએ, આ સંસ્થાએ 2006-07 થી લઈને 2024-25 સુધીના ઓડિટ રિપોર્ટ જમા કરાવ્યા નથી. નિયમ મુજબ, દરેક સ્વાયત્ત સંસ્થા કે બોર્ડે દર વર્ષે પોતાના હિસાબ અને કામગીરીનો અહેવાલ વિધાનસભામાં રજૂ કરવો ફરજિયાત છે, પરંતુ અહીં નિયમોનું સરેઆમ ઉલ્લંઘન જોવા મળી રહ્યું છે.

રાજ્ય સરકાર દ્વારા યાત્રાધામોના વિકાસ, શ્રદ્ધાળુઓની સુવિધા અને મોટા પ્રોજેક્ટ્સ માટે દર વર્ષે કરોડો રૂપિયાની ગ્રાન્ટ ફાળવવામાં આવે છે. સોમનાથ, દ્વારકા, અંબાજી જેવા મોટા યાત્રાધામોમાં થતા વિકાસકાર્યો પાછળ ખર્ચાતા જાહેર નાણાંનો ઉપયોગ ક્યાં અને કેવી રીતે થયો, તે બાબત છેલ્લા બે દાયકાથી અસ્પષ્ટ છે. ઓડિટ રિપોર્ટ રજૂ ન થવાને કારણે આર્થિક ગેરરીતિ અને વહીવટી શિથિલતાની આશંકાઓ પણ પ્રબળ બની છે.

રિપોર્ટમાં સ્ટેચ્યુ ઓફ યુનિટી (SOUADTGA) અને ગુજરાત શહેરી વિકાસ નિગમ જેવી સંસ્થાઓના પણ થોડા વર્ષોના અહેવાલો બાકી છે, પરંતુ 19 વર્ષ જેટલો લાંબો સમયગાળો માત્ર પવિત્ર યાત્રાધામ વિકાસ બોર્ડના નામે જ નોંધાયેલો છે. આટલી ગંભીર લાપરવાહી છતાં તંત્ર દ્વારા હજુ સુધી કોઈ કડક પગલાં લેવામાં આવ્યા નથી તે પણ એક મોટો સવાલ છે. ભક્તોની આસ્થા સાથે જોડાયેલા ધામોના વિકાસ માટે મળતા ફંડનો હિસાબ આપવામાં આટલી મોટી નિષ્ફળતા એ સુશાસનના દાવાઓ સામે મોટું પ્રશ્નાર્થ ચિન્હ ઊભું કરે છે.