અમિત શાહે મંગળવારે દિલ્હીમાં રાજ્યો/કેન્દ્રશાસિત પ્રદેશોના ANTF પ્રમુખોની ત્રીજી રાષ્ટ્રીય કોન્ફરન્સનું ઉદ્ઘાટન કર્યું. આ દરમિયાન તેમણે કહ્યું કે વડાપ્રધાન નરેન્દ્ર મોદીના 2047 સુધી વિકસિત ભારત બનાવવાના લક્ષ્યને પ્રાપ્ત કરવા માટે નશામુક્ત ભારતનો આ રોડમેપ ખૂબ મહત્વપૂર્ણ છે. તેમણે કહ્યું કે દેશ અને દુનિયા માટે ગંભીર ખતરો બની ચૂકેલા નાર્કોટિક્સ પર કડક અને નિર્ણાયક પ્રહાર કરવાનો સમય આવી ગયો છે. સમગ્ર દુનિયાના યુવાનોના કલ્યાણના લક્ષ્ય સાથે અમે 2029 સુધીનો આ રોડમેપ તૈયાર કર્યો છે.

2029 સુધી નશાના વેપારને જડમૂળથી ખતમ કરવાનો લક્ષ્ય

તેમણે કહ્યું કે 2029 સુધીમાં ભારતમાંથી નશાના વેપારને જડમૂળથી ઉખાડી ફેંકવામાં આપણે સામૂહિક રીતે સફળ થઈશું. અમિત શાહે કહ્યું, ‘ન તો એક ગ્રામ ડ્રગ્સ ભારત આવવા દઈશું અને ન તો ભારતને માર્ગ બનાવીને અહીંથી એક ગ્રામ ડ્રગ્સ બહાર જવા દઈશું.’ આ લક્ષ્ય સાથે આગળ વધવાનું છે. નશા સામેની લડાઈને સંવેદના સાથે ટોપ પ્રાયોરિટી બનાવીને આપણે એકસાથે લડવું પણ છે અને જીતવું પણ છે. આ લડાઈમાં ટાર્ગેટ, ટાઈમલાઈન અને જવાબદારી નક્કી કરીને સંપૂર્ણ વિજય તરફ આગળ વધી રહ્યા છીએ. હવે આપણે મીટિંગથી મિશન, રિપોર્ટિંગથી રિઝલ્ટ, જપ્તીથી નેટવર્કના અંત અને કેસથી દોષસિદ્ધિ સુધી જવાનું છે.

યુવાનોને નશા સામે જાગૃત કરવામાં આવશે

ગૃહમંત્રીએ કહ્યું, ‘આપણું લક્ષ્ય ANTFને એન્ટી નાર્કો મિશન કમાન્ડ બનાવવાનું હોવું જોઈએ.’ સીઝર-કેન્દ્રિત અભિગમની જગ્યાએ નેટવર્કને ધ્વસ્ત કરવાનું લક્ષ્ય રાખીને આગળ વધવું જોઈએ. નશા સામેની લડાઈમાં જિલ્લાને મૂળ એકમ બનાવવો પડશે. નશામુક્ત મિત્ર દેશની 10 લાખ સ્કૂલો, કોલેજો અને સંસ્થાઓમાં જઈને યુવાનોને જાગૃત કરશે અને કેમ્પસના ડિરેક્ટરોને સંવેદનશીલ બનાવશે. બેકવર્ડ-ફોરવર્ડ ઈન્વેસ્ટિગેશનની સાથે ફાઇનાન્શિયલ ઈન્વેસ્ટિગેશન અને ડિજિટલ લિંક્સ શોધવા પણ આપણી પ્રાથમિકતા હોવી જોઈએ.

ડ્રગ કાર્ટેલ પર ત્રણ સ્તરે પ્રહાર કરવામાં આવશે

અમિત શાહે આગળ કહ્યું, ‘કાર્ટેલ પર ત્રણ સ્તરે પ્રહાર કરવાનો છે- એન્ટ્રી પોઈન્ટ, આંતરરાજ્ય ડિસ્ટ્રિબ્યુશન સિસ્ટમ અને જિલ્લાઓમાં લોકલ સેલના નેટવર્ક પર.’ આ માટે જિલ્લાઓને ત્રણ ક્લસ્ટરમાં વહેંચવામાં આવશે. તેમાં ડ્રગ બનાવતા અથવા દેશમાં પ્રવેશ કરાવતા જિલ્લા, ટ્રાન્સપોર્ટેશન કોરિડોરવાળા જિલ્લા અને ડ્રગ્સનું સેવન કરતા જિલ્લા સામેલ હશે.

વિદેશી આરોપીઓ અને ડ્રગ્સ સપ્લાય કરનારા ફરાર આરોપીઓ સામે કાર્યવાહી

ભારતમાં રહેલા વિદેશી આરોપીઓને પાછા મોકલવા અને તેમને બ્લેકલિસ્ટ કરવાનું અભિયાન ચલાવવું પડશે, જેથી તેઓ ફરીથી ભારતમાં ન આવી શકે. વિદેશમાં બેસીને દેશમાં ડ્રગ્સ સપ્લાય કરી રહેલા ફરાર આરોપીઓને પકડીને ભારતની કોર્ટ સમક્ષ લાવવાના છે. અમિત શાહે કહ્યું કે દરેક ANTF માહિતીને એક્શનેબલ ઈન્ટેલિજન્સમાં બદલવાની સંપૂર્ણ પ્રક્રિયાને પોતાના રાજ્યની પોલીસની કાર્ય સંસ્કૃતિનો ભાગ બનાવવી જોઈએ.

સુપ્રીમ કોર્ટે કેન્સરની દવાઓ પર 10 ગણી વધુ કિંમત વસૂલવાને ‘ધોળા દિવસે લૂંટ’ ગણાવી છે. કેન્સરની દવાઓની MRP સાથે જોડાયેલી એક અરજી પર સુપ્રીમ કોર્ટમાં સુનાવણી થઈ હતી, જેમાં કોર્ટે એક મહત્ત્વપૂર્ણ ટિપ્પણી કરી હતી. સુપ્રીમ કોર્ટે કહ્યું કે કેન્સરની જરૂરી દવાઓ ₹27,000માં વેચાઈ રહી છે, જ્યારે તેમની PTR (રીટેલરને મળતી કિંમત) માત્ર ₹2,700 છે. આ ધોળા દિવસે લૂંટ છે. દર્દીને એવી દવા માટે કેવી રીતે ઠગી શકાય, જેને બનાવનારી કંપની રીટેલરને ₹2,700માં વેચે છે, પરંતુ તેના પર MRP ₹27,000 છાપવામાં આવે છે એટલે કે 10 ગણી વધુ. જસ્ટિસ સંદીપ મહેતાએ સુનાવણી દરમિયાન કહ્યું કે, નવાઈની વાત એ છે કે જે અધિકારીઓએ આના પર નિર્ણય લેવો જોઈએ, તેઓ સંપૂર્ણપણે મૌન છે. તેમણે ઉમેર્યું કે અમારે આનું કારણ આપવાની જરૂર નથી.

સુપ્રીમ કોર્ટે ગણાવ્યો છેતરપિંડીનો મામલો

સુપ્રીમ કોર્ટે વધુમાં કહ્યું, ‘જ્યારે દર્દીઓ આયુષ(AYUSH) સ્કીમ હેઠળ સારવાર કરાવી રહ્યા હોય છે, ત્યારે તેનો પૂરો ખર્ચ કરદાતાઓએ (ટેક્સપેયર્સ) ભોગવવો પડે છે. હૉસ્પિટલો આ ઊંચી કિંમતો પર દવાઓ ખરીદે છે, અને પછી સરકાર પાસેથી તેના પૈસા રી-ઈમ્બર્સ(પાછા) મેળવે છે. આખરે આ કરદાતાઓના જ પૈસા છે. આ સ્પષ્ટપણે છેતરપિંડીનો મામલો છે’. સુપ્રીમ કોર્ટે એ વાત પર ભાર મૂક્યો કે દવા ઉત્પાદકો અને સપ્લાય ચેઇનને અનુચિત પ્રોફિટ માર્જિન કમાવવાની છૂટ આપવામાં આવે છે, જ્યારે નિયામક સંસ્થાઓ (રેગ્યુલેટરી બોડીઝ) બીજી તરફ જોતી રહે છે, જેના કારણે ગંભીર બીમારીઓ સામે લડી રહેલા પરિવારો ગંભીર નાણાકીય સંકટમાં ફસાઈ જાય છે.

છેતરપિંડી રોકવા તાત્કાલિક નિયમનકારી હસ્તક્ષેપની જરૂર

કોર્ટના જણાવ્યા અનુસાર, ખાનગી હૉસ્પિટલો અને વિતરકો ઓછી જથ્થાબંધ કિંમતે દવાઓ ખરીદીને અને વધારેલી મહત્તમ છૂટક કિંમત (MRP) પર રી-ઈમ્બર્સમેન્ટનો દાવો કરીને કરદાતાઓના પૈસાથી ચાલતી આરોગ્ય સેવાઓમાંથી ભારે સબસીડી વસૂલે છે. અદાલતે સંકેત આપ્યો કે જીવનરક્ષક દવાઓ પર પ્રોફિટ માર્જિનને મર્યાદિત કરવા અને ખાનગી તથા સરકારી સહાયતા પ્રાપ્ત તબીબી સારવાર બંનેમાં વ્યાપક નાણાકીય છેતરપિંડી રોકવા માટે તાત્કાલિક નિયમનકારી હસ્તક્ષેપની (રેગ્યુલેટરી ઇન્ટરવેન્શન) જરૂર છે.

તહેવારોની મોસમ પહેલા, કેન્દ્ર સરકારે એરલાઇન્સને હવાઇ ભાડા વાજબી સ્તરે રાખવાનો સ્પષ્ટ સંદેશ આપ્યો છે.

નાગરિક ઉડ્ડયન મંત્રી રામ મોહન નાયડુએ મંગળવારે જણાવ્યું હતું કે મંત્રાલય તહેવારો અને મુખ્ય પ્રસંગો દરમિયાન એરલાઇન્સ સાથે સતત વાતચીત કરે છે અને નિયમિત બેઠકો યોજવામાં આવે છે. સરકાર આ સમય દરમિયાન ઘરે જવા માંગતા મુસાફરો પર ઊંચા ભાડાનો બોજ ન નાખવાનો આગ્રહ રાખે છે.

જોકે મંત્રાલય લગભગ દર વર્ષે આ પ્રયાસ કરે છે, એરલાઇન્સ સામાન્ય રીતે વધુ નિયંત્રણ કરવામાં અસમર્થ હોય છે. વાસ્તવિકતા એ છે કે સરકાર ખાનગી એરલાઇન્સ પર મર્યાદિત હદ સુધી ભાડા અંગે કાયદેસર રીતે દબાણ કરી શકે છે.

માંગ વધતાં ટિકિટો વધુ મોંઘા થાય છે. પાછલા વર્ષોમાં, દિવાળી અને દશેરાની આસપાસ ઘણા રૂટ પર ભાડા સામાન્ય દિવસો કરતા બમણા થઈ ગયા છે.

નાયડુ ઉડાન-2 યોજનાની જાહેરાત કર્યા પછી અને અહીં એક કાર્યક્રમમાં સંબંધિત પક્ષો સાથે કરાર કર્યા પછી મીડિયા સાથે વાત કરી રહ્યા હતા. ઉડાનના નવા તબક્કા માટે 21 રાજ્યો અને કેન્દ્રશાસિત પ્રદેશો સાથે કરાર થયા છે. ટૂંક સમયમાં વધુ પાંચ રાજ્યો તરફથી કરાર થવાની અપેક્ષા છે. બિહાર, છત્તીસગઢ, હિમાચલ પ્રદેશ, આસામ, રાજસ્થાન, ઓડિશા અને આંધ્રપ્રદેશ જેવા રાજ્યો સાથે કરાર થયા છે.

સરકારે એરલાઇન્સને તહેવારોના ભાડા વાજબી રાખવા વિનંતી કરી છે.

દૂરના વિસ્તારો અને નાના શહેરોને જોડવા અને સામાન્ય માણસને સસ્તી હવાઈ સેવા પૂરી પાડવા માટે શરૂ કરાયેલી ઉડાન યોજનાને હવે દસ વર્ષ માટે લંબાવવામાં આવી છે.

ઉડાન મંત્રીએ જણાવ્યું હતું કે ઉડાન-2 યોજના હેઠળ, કેન્દ્ર સરકાર ₹30,000 કરોડનું રોકાણ કરશે, જેમાં રાજ્યો પણ એટલી જ રકમનું યોગદાન આપશે તેવી અપેક્ષા છે.

આનાથી દેશના ઉડ્ડયન ક્ષેત્રમાં કુલ ₹60,000 કરોડના રોકાણનો માર્ગ મોકળો થશે. આનાથી 100 વધુ એરપોર્ટ અને 200 આધુનિક હેલિપેડનું નિર્માણ થશે.

આ યોજનામાં ઉડ્ડયન સંબંધિત તમામ બાંધકામ પ્રોજેક્ટ્સ 18 મહિનાની અંદર પૂર્ણ કરવાનું પણ ફરજિયાત છે. આજની તારીખમાં, ઉડાન હેઠળ 90 થી વધુ એરપોર્ટ બનાવવામાં આવ્યા છે, જે 16.8 મિલિયન મુસાફરોને સેવા આપે છે.

ઊંચા વિમાનભાડા અંગે, ઉડ્ડયન મંત્રીએ જણાવ્યું હતું કે મધ્ય પૂર્વ કટોકટી પછી ઉડ્ડયન બળતણ (ATF) નોંધપાત્ર રીતે વધુ મોંઘુ થઈ ગયું છે.

એકલા ATF હવાઈ સેવા કામગીરીનો 43% હિસ્સો ધરાવે છે, જે સમજાવે છે કે એક નાનો વધારો સમગ્ર એરલાઇન પર કેટલી અસર કરી શકે છે.

અદાણી એરલાઇન પર કોઈ નિર્ણય નથી, મંત્રાલય વિચારી રહ્યું છે
નાગરિક ઉડ્ડયન મંત્રી નાયડુએ મંગળવારે જણાવ્યું હતું કે સરકારે હજુ સુધી અદાણી જૂથના એરલાઇન શરૂ કરવાના પ્રસ્તાવ પર કોઈ નિર્ણય લીધો નથી.

એરપોર્ટ અને એરલાઇન એકસાથે ચલાવવાના ફાયદા અને ગેરફાયદા પર વિચારણા કરવામાં આવી રહી છે. નાયડુએ કહ્યું કે સરકાર દેશમાં મુસાફરોના વિકલ્પો વધારવા માટે વધુ એરલાઇન્સ ઇચ્છે છે.

જો કોઈને રસ હોય, તો સરકાર આ વિચારને સમર્થન આપે છે. જો કે, જ્યારે એક જ કંપની એરપોર્ટ અને એરલાઇન બંનેનું સંચાલન કરે છે, ત્યારે સંભવિત નુકસાનની સમીક્ષા કરવી જોઈએ અને કોઈપણ અનિયમિતતાને પહોંચી વળવા માટે વ્યવસ્થા કરવી જોઈએ.

તેમણે સ્પષ્ટતા કરી હતી કે દેશમાં એવા કોઈ નિયમો નથી જે એરપોર્ટ ઓપરેટરને એરલાઇન ચલાવવાથી પ્રતિબંધિત કરે. પ્રતિબંધો ફક્ત દિલ્હી અને મુંબઈમાં એરપોર્ટ ઓપરેટરો સાથેના કરારો પર લાગુ થાય છે.

અન્ય ખાનગી ઓપરેટરો માટે આવી કોઈ સંપૂર્ણ પ્રતિબંધ નથી. તેથી, સંતુલિત અભિગમ અપનાવવામાં આવશે. હાલમાં કોઈ અંતિમ નિર્ણય લેવામાં આવ્યો નથી.

કેન્દ્રીય મંત્રી પરિષદ માટે બે દિવસીય વિશિષ્ટ વિચાર-મંથન સત્ર બુધવારે શરૂ થઈ રહ્યું છે. આ ઉચ્ચસ્તરીય બેઠકમાં દેશના શાસન વ્યવસ્થા, નીતિ-નિર્માણના મુખ્ય પાસાઓ અને વિવિધ ક્ષેત્રોમાં ચાલી રહેલા સુધારાઓ પર મુખ્યત્વે ધ્યાન કેન્દ્રિત કરવામાં આવશે. સરકારી સૂત્રો દ્વારા મળતી માહિતી મુજબ, 23 અને 24 સપ્ટેમ્બર દરમિયાન યોજાનારું આ મહત્વપૂર્ણ ચિંતન શિબિર ‘સેવા તીર્થ’ ખાતે આયોજિત કરવામાં આવ્યું છે, જ્યાં નવું વડાપ્રધાન કાર્યાલય (PMO) આવેલું છે. આ બેઠકમાં સમગ્ર મંત્રી પરિષદના સભ્યો હાજરી આપશે.

શાસન અને સાર્વજનિક સેવા વિતરણ પર ભાર

વડાપ્રધાન નરેન્દ્ર મોદીની અધ્યક્ષતામાં આયોજિત આ બે દિવસીય સત્ર દરમિયાન કેન્દ્ર સરકારની વિવિધ લોકકલ્યાણકારી યોજનાઓની વર્તમાન પ્રગતિ, નીતિઓનો ગ્રાઉન્ડ લેવલ પર ઝડપી અમલ, સમયનું યોગ્ય વ્યવસ્થાપન, જુદા જુદા મંત્રાલયો વચ્ચે આંતરિક સમન્વય અને જાહેર સેવા વિતરણને વધુ પારદર્શક અને અસરકારક બનાવવા જેવા મહત્વના મુદ્દાઓ આવરી લેવામાં આવશે.

મંત્રીઓના છ જૂથો રજૂ કરશે પ્રેઝન્ટેશન

સરકારી યોજનાઓના સમયસર અમલીકરણ અને સુશાસન સંબંધિત તમામ પાસાઓ પર ગહન વિચાર-વિમર્શ કરવા માટે આ અગાઉ છ વિશેષ જૂથોની રચના કરવામાં આવી હતી. આ દરેક જૂથમાં આઠ-આઠ મંત્રીઓનો સમાવેશ કરવામાં આવ્યો છે. આ જૂથોએ સત્ર દરમિયાન રજૂ કરવામાં આવનારા પ્રેઝન્ટેશન અંગે ચર્ચા-વિચારણા કરવા માટે અગાઉ અનેક પૂર્વ તૈયારી બેઠકો યોજી હતી. સૂત્રોના જણાવ્યા અનુસાર, વિવિધ મંત્રીઓ પોતાના મંત્રાલયો દ્વારા અપનાવવામાં આવેલી પ્રગતિશીલ નીતિઓ, ભાવિ રોડમેપ અને વિવિધ ક્ષેત્રોમાં સુધારાઓને આગળ વધારવા માટે લીધેલા નિર્ણયો અંગે વડાપ્રધાન સમક્ષ સવિસ્તાર રજૂઆત કરશે.

મધ્યપ્રદેશના વેપારીઓએ UPI વ્યવહારો પર લાદવામાં આવેલા નવા શુલ્ક સામે મોરચો ખોલ્યો છે અને આજે સમગ્ર રાજ્યમાં ‘નો UPI દિવસ’ (No UPI Day) ઉજવવામાં આવી રહ્યો છે. ઇન્દોર, ભોપાલ, જબલપુર અને ગ્વાલિયર સહિતના મુખ્ય શહેરોમાં દુકાનદારો અને વેપારીઓએ QR કોડનો ઉપયોગ કરીને ડિજિટલ ચુકવણી સ્વીકારવાનું સંપૂર્ણપણે બંધ કરી દીધું છે. પેટ્રોલ પંપ ડીલર્સ એસોસિએશન બાદ હવે જથ્થાબંધ અને છૂટક વેપારીઓએ પણ આ વિરોધ પ્રદર્શનમાં સક્રિય ભાગ લીધો છે.

વિરોધનું મુખ્ય કારણ: 0.4% MDR ફી

આ વિરોધનું મુખ્ય કારણ ₹2,000 થી વધુના વેપારી UPI વ્યવહારો પર ૧૫ ઓક્ટોબરથી લાગુ થનારો ૦.૪% મર્ચન્ટ ડિસ્કાઉન્ટ રેટ (MDR) છે. વેપારીઓનું કહેવું છે કે કરિયાણા, કપડાં, બુલિયન (સોના-ચાંદી) અને પેટ્રોલ પંપ જેવા ક્ષેત્રોમાં નફાનું માર્જિન પહેલેથી જ ખૂબ મર્યાદિત હોય છે. જો આટલો મોટો ચાર્જ વસૂલવામાં આવશે, તો એકલા ભોપાલ અને ઇન્દોરના વેપારીઓ પર દર મહિને આશરે ₹14.4 કરોડનો વધારાનો આર્થિક બોજ પડશે. ખાસ કરીને જથ્થાબંધ વેપારીઓ માટે તેમના ૯૦% થી વધુ વ્યવહારો ₹૨,૦૦૦ કરતા વધારે રકમના હોય છે, જેના કારણે તેમને ભારે નુકસાન વેઠવાનો વારો આવશે.

બજારોમાં ડિજિટલ વ્યવહારો ઠપ

ઇન્દોરમાં આ આંદોલનનું કેન્દ્ર જોવા મળ્યું છે, જ્યાં 125 થી વધુ વેપાર સંગઠનો અને આશરે 2 લાખ જેટલા વેપારીઓએ આ ચળવળને સમર્થન આપ્યું છે. સરાફા બજાર, કાપડ બજાર અને મરોઠિયા બજાર જેવા મુખ્ય વેપારી કેન્દ્રો પર ડિજિટલ પેમેન્ટ સેવાઓ સંપૂર્ણપણે ઠપ થઈ ગઈ છે. વેપારીઓની માંગ છે કે સરકાર દ્વારા આ નવા નિયમો તાત્કાલિક પાછા ખેંચવામાં આવે, અને જ્યાં સુધી આ માેરા પર પુનઃવિચાર ન થાય ત્યાં સુધી ગ્રાહકોને રોકડ રકમ અથવા અન્ય પરંપરાગત માધ્યમોનો ઉપયોગ કરવા અપીલ કરવામાં આવી છે.

બોમ્બે હાઈકોર્ટે ભાગેડુ દારૂના વેપારી વિજય માલ્યાને તેમના મની લોન્ડરિંગને લગતા કેસ દરમિયાન સોશિયલ મીડિયા પર કોર્ટના દસ્તાવેજો પોસ્ટ કરવા સામે ચેતવણી આપી હતી. માલ્યાએ એન્ફોર્સમેન્ટ ડિરેક્ટરોટ દ્વારા કોર્ટ સમક્ષ કરાયેલાં સોગંદનામાને સોશિયલ મીડિયા પર અપલોડ કર્યું હતું. કોર્ટ હજુ આ એફિડેવિટની સમીક્ષા કરે તે પહેલાં માલ્યાના આ પગલાંનો ઈડી દ્વારા વાંધો ઉઠાવાયો હતો અને આ કોર્ટનો તિરસ્કાર છે તેમ જણાવાયું હતું.

ઈડીએ માલ્યા સામે આઠમી સપ્ટેમ્બરે એફિડેવિટ ફાઈલ કરી હતી. તેની કોપી માલ્યાની લીગલ ટીમને પણ અપાઈ હતી. આ એફિડેવિટની સમીક્ષા હાઈકોર્ટ તા. નવમી સપ્ટેમ્બરે કરવાની હતી. જોકે, તે પહેલાં આઠમી ેસાંજે જ માલ્યાએ આ એફિડેવિટ સોશિયલ મીડિયા પર મૂકી દીધી હતી.
જસ્ટીસ મિલિંદ જાધવે આ બાબતની ગંભીર નોંધ લેતાં માલ્યાના વકીલોને કહ્યું હતું કે આ બહુ ગંભીર બાબત છે. તમારા ક્લાયન્ટને આવું કૃત્ય ન કરવા જણાવો. નહીં તો કોર્ટ યોગ્ય લાગે તે આદેશ આપશે.

માલ્યાએ તેમની સામે થયેલા કેસને બંધ કરવાની અરજી કરી છે. આ કેસમાં વધુ સુનાવણી ૧૩ ઓક્ટોબરના રોજ યોજાશે.
માલ્યાએ દલીલ કરી હતી કે પોતે બેન્કને દેવું પાછું ચૂકવી ચૂક્યા છે. જોકે, ઈડીએ દલીલ કરી હતી કે માલ્યાએ દેવું પાછું ચૂકવી દીધું હોય તો પણ તેમની સામેનો મની લોન્ડરિંગનો કેસ ચાલુ જ રહેશે. આ સંદર્ભમાં અદાલતે એસબીઆઈને એફિડેવિટ કરવા જણાવ્યું છે.

માલ્યાએ યુકેની કોર્ટમાં ચાલી રહેલી કાનૂની કાર્યવાહીનો હવાલો આપીને ભારત પાછા ફરવાની અસમર્થતા વ્યક્ત કરી છે. તેમના વતી, બોમ્બે હાઈકોર્ટ સમક્ષ રજૂઆત કરવામાં આવી હતી કે જ્યાં સુધી તે કાર્યવાહી પૂર્ણ ન થાય ત્યાં સુધી તેમને યુકે છોડવા પર પ્રતિબંધ છે.
આ વાત સ્વીકારીને, હાઈકોર્ટે અગાઉ માલ્યાને આ બાબત અંગે વિગતવાર સોગંદનામું રજૂ કરવાનો નિર્દેશ આપ્યો હતો અને કેન્દ્ર સરકારને તેનો જવાબ દાખલ કરવાનો આદેશ આપ્યો હતો.

માલ્યાના વકીલે હાઈકોર્ટ સમક્ષ સ્પષ્ટતા કરી હતી કે તેમની સામે પ્રત્યાર્પણ પ્રક્રિયા અંતિમ તબક્કામાં હોવા છતાં, માલ્યા હાલમાં આ પરિસ્થિતિઓને કારણે પાછા ફરવા માટે અસમર્થ છે.
દરમિયાન, ઈડી ભારતમાં માલ્યાની સંપત્તિઓ જપ્ત કરવાની પ્રક્રિયા ચાલુ રાખી રહ્યું છે. આ સંપત્તિઓના વેચાણ દ્વારા બેંકોને બાકી રહેલી ડિફોલ્ટ લોનની રકમ વસૂલવાના પ્રયાસો ચાલી રહ્યા છે, અને તપાસ એજન્સી સમયાંતરે આ પ્રક્રિયા અંગે જાહેર નોટિસ જારી કરે છે.
ભારતીય બેંકોના હજારો કરોડ રૂપિયા ચૂકવીને વિદેશ ભાગી ગયેલા માલ્યાને યુકેથી ભારત પ્રત્યાર્પણ કરવાની પ્રક્રિયા હાલમાં તેના અંતિમ તબક્કામાં છે. પરિણામે, એવી શક્યતા છે કે તે યુકેની અદાલતોમાં આ કાનૂની પ્રક્રિયાનો દુરુપયોગ કરી શકે છે.
તેથી, કેન્દ્ર સરકારનું પ્રતિનિધિત્વ કરતા સોલિસિટર જનરલ તુષાર મહેતાએ કોર્ટને અરજી ફગાવી દેવા વિનંતી કરી છે.
જોકે, સુપ્રીમ કોર્ટના અગાઉના ચુકાદાઓને ટાંકીને, માલ્યાના વકીલે ે હાઈકોર્ટમાં દલીલ કરી હતી કે આવા કેસોમાં આરોપીનું દેશમાં શારીરિક રીતે હાજર રહેવું ફરજિયાત નથી અને તેની ગેરહાજરીમાં પણ તેની અરજી પર સુનાવણી આગળ વધી શકે છે.