સોશિયલ મીડિયા ઈન્ફ્લુએન્સર કીર્તિ પટેલ અને ઇન્દ્રભારતી બાપુ વચ્ચેના વિવાદનો સુખદ અંત આવ્યો છે. સનાતન ધર્મની એકતા અને સાધુ-સંતોના સન્માન સાથે આ સમગ્ર વિવાદનો હવે ઉકેલ આવ્યો હોય તેવું લાગી રહ્યું છે. કીર્તિ પટેલે ઇન્દ્રભારતી બાપુ સહિતના સાધુ-સંતોને શાલ ઓઢાડીને આશીર્વાદ લીધા હતા. કીર્તિ પટેલ પોતાના ગુરુ હરિહરાનંદ ભારતી બાપુ તથા જગતગુરુ મહેન્દ્રાનંદ ગિરી બાપુનું પણ સન્માન કર્યું હતું.

કીર્તિ પટેલે સમાધાન અંગે જણાવ્યું કે, ‘અનેક લોકોએ ભારતી પરિવારને તોડવાનો પ્રયાસ કર્યો પરંતુ ગિરનારી મહારાજે કોઈનો મેળ આવવા દીધો નહીં. મેં મારા ગુરુ હરિહરાનંદ ભારતી બાપુનું માન સન્માન જાળવી રાખવા તથા સનાતન ધર્મને કલંક ન લાગે તે માટે સાધુ સંતો સાથેના વિવાદનું સમાધાન કરી લીધું છે.’

કીર્તિ પટેલે મૃગી કુંડમાં સ્નાન બાદ રુદ્રેશ્વર જાગીર ભારતી આશ્રમના મહંત ઇન્દ્રભારતી બાપુ સામે સોશિયલ મીડિયા પર આક્ષેપો કર્યા હતા. તેમણે દાવો કર્યો હતો કે તેમને ઇન્દ્રભારતી બાપુના ઇશારે કુંડમાંથી બહાર કાઢવામાં આવી હતી અને તેમણે માત્ર મને જ કેમ ટાર્ગેટ કરી હતી. આ અંગે કીર્તિ પટેલે સોશિયલ મીડિયામાં પોસ્ટ મૂકીન આક્રમક રીતે વિરોધ કર્યો હતો.

કીર્તિ પટેલે તેમની સોશિયલ મીડિયા પોસ્ટમાં ગંભીર આક્ષેપો કર્યા હતા અને ઇન્દ્રભારતી બાપુ વિશેની ‘સચ્ચાઈ’ પુરાવા સાથે જાહેર કરવાની ધમકી આપી હતી. તેણે દાવો કર્યો હતો કે ‘મારી સાથે બીજી અનેક યુવતીઓ પણ સ્નાન કરી રહી હતી પરંતુ તેમને કોઈએ રોક્યા નહોતા.’

આ વિવાદને પગલે જૂનાગઢના ધાર્મિક વાતાવરણમાં ગરમાવો આવ્યો હતો. પરંતુ, આખરે બંને પક્ષો વચ્ચે સમાધાન થયું હતું. આ દરમિયાન કીર્તિ પટેલે ઇન્દ્રભારતી બાપુનું શાલ ઓઢાડીને સન્માન કર્યું હતું. ઇન્દ્રભારતી બાપુ અને અન્ય સાધુ-સંતોએ કીર્તિ પટેલને આશીર્વાદ આપ્યા હતા. કીર્તિ પટેલે તેમના ગુરુ હરિહરાનંદ ભારતી બાપુ અને જગતગુરુ મહેન્દ્રાનંદ ગિરીબાપુનું પણ સન્માન કર્યું હતું.

કીર્તિ પટેલે જણાવ્યું હતું કે ‘ઘણાં લોકોએ ભારતી પરિવારને તોડવાનો પ્રયાસ કર્યો હતો, પરંતુ ગિરનારી મહારાજે કોઈનો મેળ ન આવવા દીધો. મેં મારા ગુરુ હરિહરાનંદ ભારતી બાપુનું માન-સન્માન જાળવી રાખવા અને સનાતન ધર્મને કલંક ન લાગે તે માટે આ વિવાદનું સમાધાન કર્યું છે. ભારતી પરિવાર અને સાધુ સમાજ પ્રત્યે મને આદર છે.’

ધ્રાંગધ્રા તાલુકામાં જાહેર સ્થળોએ જોખમી મેડિકલ વેસ્ટ ફેંકી દેવાની પ્રવૃત્તિ સતત વધી રહી છે, જે પર્યાવરણ અને જનઆરોગ્ય માટે ગંભીર ખતરો બની છે. તાજેતરમાં ધ્રાંગધ્રા-હળવદ હાઈવે પર રામેશ્વર ટાઉનશિપ સામે મેડિકલ વેસ્ટનો જથ્થો મળી આવ્યો હતો.

અગાઉ પણ હાઈવે પર આવા કચરાના ઢગ જોવા મળ્યા હોવાથી સ્થાનિકોમાં ભારે આક્રોશ ફેલાયો છે. આ ગંભીર બેદરકારી સામે હિન્દુ સંગઠન મેદાને આવ્યું છે. સંગઠનના આગેવાનોએ મામલતદાર, મેડિકલ ઓફિસર અને પ્રાંત અધિકારીને આવેદનપત્ર પાઠવી રજૂઆત કરી હતી કે જવાબદાર તબીબો અને મેડિકલ સંસ્થાઓની ઓળખ કરી તેમની સામે કડક કાયદેસરની કાર્યવાહી કરવામાં આવે. સંગઠને ચીમકી આપી છે કે જો તંત્ર મેડિકલ વેસ્ટના નિકાલ પર કડક દેખરેખ રાખવામાં નિષ્ફળ રહેશે, તો આગામી દિવસોમાં ઉગ્ર આંદોલનાત્મક કાર્યક્રમો હાથ ધરવામાં આવશે.

તારાપુર ચોકડી નજીક સીંજીવાડા તરફથી આવતી કારમાં વિદેશી દારૂની હેરાફેરી થતી હોવાની બાતમીના આધારે તારાપુર પોલીસે વોચ ગોઠવી પ્રેસ લખેલા બોર્ડ વાળી એક કારને રોકી તપાસ કરતા વિદેશી દારૂની ૩૬ બોટલ અને ૨૪ ટીન બિયરના જથ્થા સાથે બે શખ્સો ઝડપાયા હતા, જ્યારે એક શખ્સ ફરાર છે. જે મામલે પોલીસે ત્રણ શખ્સો સામે ગુનો નોંધી વધુ કાર્યવાહી હાથ ધરી છે. 

તારાપુર પોલીસ સ્ટેશનના સ્ટાફ પેટ્રોલિંગમાં હતા. ત્યારે બાતમી મળી હતી કે, સીંજીવાડા તરફથી એક કારમાં બે શખ્સો ભારતીય બનાવટનો વિદેશી દારૂ લઈ આવી રહ્યાં છે. આ બાતમીના આધારે સીંજીવાડા-તારાપુર રોડ પર ડામર પ્લાન્ટ સામે પોલીસે કોર્ડન કરી કારને રોકી તપાસ હાથ ધરી હતી. કારની તપાસ કરતાં ડેસબોર્ડ પર લાલ અક્ષરે અંગ્રેજીમાં પ્રેસ લખેલું હતું અને કારમાંથી વિદેશી દારૂની ૩૬ બોટલ અને ૨૪ ટીન બિયર મળી આવી હતી. પોલીસે કારમાં બેઠેલા બંને શખ્સોની ઓળખ રાજેશભાઈ ઉર્ફે રાજુ ચંદુભાઈ સોલંકી (ઉં.વ.૩૩, રહે. ફતેપુરા તળાવની પાળ પાસે, તા. તારાપુર, જી. આણંદ) એને જયદીપકુમાર ઉર્ફે લાલો બળવતસંગ ગોહેલ (ઉં.વ.૨૮, રહે. ફતેપુરા પરામા, તા. તારાપુર, જી. આણંદ) તરીકે થઈ હતી.