અમેરિકા-ઈઝરાયલના હુમલામાં ઈરાનના સુપ્રીમ લીડર આયતુલ્લા અલી ખામેનેઈના મોતની અસર છેક ભારત સુધી પહોંચી ગઈ છે. સાવચેતીના ભાગરૂપે જમ્મુ-કાશ્મીરમાં તમામ જિલ્લાઓમાં પ્રતિબંધ હોવા છતાં ખામેનેઈની હત્યાના વિરોધમાં ત્યાં છેલ્લા બે દિવસથી બંધ અને પ્રદર્શનો ચાલી રહ્યા છે. આ દેખાવો વધુ ઉગ્ર ન બને અને કોઈ મોટી સમસ્યા ઉભી ન થાય તેને ધ્યાને રાખીને પોલીસે ભીડને વિખેરવા ટિયર ગેસના શેલ છોડ્યા હોવાના અહેવાલ સામે આવ્યા છે.

ખામેનેઈના મોતનો વિરોધ કરવા માટે જમ્મુ-કાશ્મીરમાં રવિવાર બાદ સોમવારે પણ બંધ પાડવામાં આવ્યો છે, જેના કારણે ખીણમાં જનજીવન અસ્તવ્યસ્ત થઈ ગયું છે. અનેક સ્થળોએ મનાઈ હુકમનું ઉલ્લંઘન કરી પ્રદર્શનો યોજાયા હતા, જેને અટકાવવા માટે પોલીસ અને અર્ધસૈન્ય દળોએ બળપ્રયોગ કરવો પડ્યો છે.

જમ્મુ-કાશ્મીર સતત બે દિવસ સુધી બંધની અસર માર્કેટ, પરિવહન અને ઓફિસો પર જોવા મળી છે. અહીં સંવેદનશીલ વિસ્તારોમાં પોલીસ અને અર્ધસૈનિક દળોની ટુકડીઓ તહેનાત કરી દેવાઈ છે. તમામ શિક્ષણ સંસ્થાઓમાં બે દિવસની રજા જાહેર કરવામાં આવી છે અને ઈન્ટરનેટ સેવાની સ્પીડ સિમિત કરી દેવાઈ છે. તંત્રએ સાવધાનીના ભાગરૂપે અનેક વિસ્તારોમાં એલર્ટ વધારી દીધું છે. પોલીસે સ્થિતિને નિયંત્રણમાં રાખવા માટે સતત પેટ્રોલિંગ પણ વધારી દીધું છે. અધિકારીઓએ લોકોને શાંતિ જાળવવા અને અફવાઓ પર ધ્યાન ન આપવા અપીલ કરી છે.

શ્રીનગરના અનેક વિસ્તારોના રસ્તાઓ બંધ કરી દેવાયા છે. બારામુલા, પટ્ટન, માંગામ, બડગામ, પુલવામા, શોપિંયા અને બાંદીપોરાના શિયા બહુમતીવાળા વિસ્તારોમાં પણ જનજીવન ઠપ થઈ ગયું છે. તંત્ર દ્વારા પ્રતિબંધ છતાં શિયા સમુદાયના લોકો એકઠા થયા છે. દેખાવકારોએ હાથમાં પોસ્ટર અને અમેરિકા-ઈઝરાયલ વિરોધી સૂત્રો લખીને લાલચોક તરફ દેખાવો કરવાનો પ્રયાસ કર્યો છે.

બટમાલૂ પાસે પોલીસ અને CRPFના જવાનોએ દેખાવકારોને આગળ જતા અટકાવવાનો અને નિયમોનું ઉલ્લંઘન ન કરવા વિનંતી કરી છે. જોકે તેમ છતાં ભીડે રોષે ભરાઈને ધક્કા-મુક્કી કરવાનો અને બેરિકેડ તોડીને આગળ વધવાનો પ્રયાસ કર્યો છે. કેટલાક દેખાવકારોના હાથમાં પેલેસ્ટાઈની, ઈરાન અને હિઝબુલ્લાના ઝંડા હોવાનું સામે આવ્યું છે. સ્થિતિને થાળે પાડવા માટે સુરક્ષા દળોએ લાઠીચાર્જ, ટીયર ગેસના સેલ છોડવા પડ્યા છે, જેના કારણે હિંસક અથડામણ શરૂ થઈ ગઈ છે. દેખાવકારો વારંવાર એકઠા થઈને આગળ વધવાનો પ્રયાસ કરી રહ્યા છે, જોકે સુરક્ષા કર્મચારીઓ દ્વારા લગભગ એક કલાકની જહેમત બાદ સ્થિતિ પર કાબુ મેળવી લેવાયો છે અને ભીડને પણ ખદેડી દેવાઈ છે.

સુરક્ષા દળો દ્વારા સતત પેટ્રોલિંગ અને સીસીટીવી મારફતે નજર રાખવામાં આવી રહી છે. દૂતાવાસ તરફ જતાં માર્ગો પર ચેકિંગ કડક બનાવાઈ છે અને શંકાસ્પદ હલચલ પર તરત કાર્યવાહી કરવાની સૂચનાઓ આપવામાં આવી છે.

ઈરાન-અમેરિકા વચ્ચે વધતા તણાવની અસર હવે દેશની રાજધાની દિલ્હી સુધી પહોંચી છે. સુરક્ષા એજન્સીઓએ સંવેદનશીલ પરિસ્થિતિને ધ્યાનમાં રાખીને શહેરમાં ચુસ્ત બંદોબસ્ત ગોઠવ્યો છે. દિલ્હીમાં આવેલા અમેરિકન દૂતાવાસ અને તેની આસપાસના વિસ્તારોમાં ખાસ સુરક્ષા વ્યવસ્થા અમલમાં મૂકાઈ છે. દૂતાવાસ બહાર વધારાના પોલીસ જવાનો, પેરામિલિટરી દળો અને ક્વિક રિએક્શન ટીમો તૈનાત કરવામાં આવી છે.

સુરક્ષા દળો દ્વારા સતત પેટ્રોલિંગ અને સીસીટીવી મારફતે નજર રાખવામાં આવી રહી છે. દૂતાવાસ તરફ જતાં માર્ગો પર ચેકિંગ કડક બનાવાઈ છે અને શંકાસ્પદ હલચલ પર તરત કાર્યવાહી કરવાની સૂચનાઓ આપવામાં આવી છે. દિલ્હી પોલીસે સમર્થકો તેમજ વિરોધીઓની પ્રવૃત્તિઓ પર પણ નજીકથી નજર રાખી છે જેથી કોઈ અનિચ્છનીય ઘટના ન બને.

પ્રશાસને સ્પષ્ટ કર્યું છે કે હાલની પરિસ્થિતિને ધ્યાનમાં રાખીને કોઈપણ પ્રકારના પ્રદર્શન, રેલી અથવા ભેગા થવા માટે મંજૂરી આપવામાં આવશે નહીં. સોશિયલ મીડિયા પર પણ ભડકાઉ પોસ્ટ્સ અને અફવાઓ પર નજર રાખવા માટે વિશેષ ટીમો કાર્યરત છે. અધિકારીઓએ નાગરિકોને અફવાઓથી દૂર રહેવા અને કાયદો-વ્યવસ્થા જાળવવામાં સહકાર આપવા અપીલ કરી છે. સંભવિત જોખમોને ધ્યાનમાં રાખીને દિલ્હીમાં સુરક્ષા સજ્જતા વધારી દેવામાં આવી છે.