પાણીપતમાં L&Tના કર્મચારીઓના વિવાદના વાઈરલ વીડિયોની અસર સુરતના હજીરામાં જોવા મળી હતી. હજીરા સ્થિત આર્સેલર મિત્તલ નિપ્પોન સ્ટીલ (AM/NS)ના નિર્માણધીન પ્લાન્ટમાં કામ કરતા L&Tના અંદાજે 5000 જેટલા કોન્ટ્રાક્ટ કર્મચારીઓએ પગાર વધારા અને કામના કલાકો મુદ્દે ઉગ્ર આંદોલન કરી ભારે તોડફોડ મચાવી હતી. સ્થિતિ કાબૂ બહાર જતાં પોલીસે લાઠીચાર્જ કરી 40 જેટલા ટીયરગેસના શેલ છોડવાની ફરજ પડી હતી.

મળતી માહિતી અનુસાર, લાંબા સમયથી પડતર માંગણીઓ સંતોષવામાં આવી રહી ન હતી. શ્રમિકો પાસે 12 કલાક કામ લેવામાં આવે છે, જેની સામે તેઓ 8 કલાકની ડ્યુટીની માંગ કરી રહ્યા છે. હાલમાં ઓવરટાઇમ સિંગલ રેટ પર ચૂકવાય છે, જ્યારે શ્રમિકો ડબલ રેટની માંગ કરી રહ્યા છે. ઊંચાઈ પર જોખમી ઇરેક્શન કામ કરવા છતાં માત્ર 600થી 700 રૂપિયા જેટલું જ વેતન આપવામાં આવે છે.

વહેલી સવારે શરૂ થયેલો દેખાવ ગણતરીની મિનિટોમાં હિંસક બન્યો હતો. ઉશ્કેરાયેલા ટોળાએ કંપનીની ત્રણ ફાયર ફાઇટર ગાડીઓમાં તોડફોડ કરી મોટું નુકસાન પહોંચાડ્યું હતું અને બાઈકોને આગ ચાંપી હતી. એન્ટ્રી-એક્ઝિટ ગેટ પરના અત્યાધુનિક પ્રવેશ મશીનો અને ઓફિસોમાં તોડફોડ કરી હતી.

ઘટનાની જાણ થતા જ સુરત પોલીસનો કાફલો ઘટનાસ્થળે દોડી ગયો હતો. હિંસક ટોળાને વિખેરવા માટે પોલીસે 40થી વધુ ટીયરગેસના શેલ છોડ્યા હતા અને હળવો લાઠીચાર્જ કર્યો હતો. કાયદો અને વ્યવસ્થાના ભંગ બદલ અત્યાર સુધીમાં 25થી વધુ શ્રમિકોની અટકાયત કરવામાં આવી છે.હાલમાં સમગ્ર પ્લાન્ટ પરિસરમાં ચુસ્ત પોલીસ બંદોબસ્ત ગોઠવી દેવામાં આવ્યો છે. સ્થિતિ પર કાબૂ મેળવ્યા બાદ હવે કંપનીના સત્તાધીશો અને શ્રમિક પ્રતિનિધિઓ વચ્ચે સમાધાન માટે મંત્રણાના પ્રયાસો શરૂ કરવામાં આવ્યા છે. જોકે, પ્લાન્ટમાં હજુ પણ તણાવપૂર્ણ શાંતિ જોવા મળી રહી છે.

સુરતના પ્રખ્યાત બિલ્ડર તુષાર ઘેલાણીના આત્મહત્યા કેસમાં નવો વળાંક આવ્યો છે. આ કેસના મુખ્ય આરોપી પૂનમ ભદોરિયાએ હવે ઘેલાણી પરિવાર પર આરોપ લગાવતા ખળબળાટ મચી ગયો છે.

સુરતના પ્રખ્યાત બિલ્ડર તુષાર ઘેલાણીના આત્મહત્યા કેસમાં નવો વળાંક આવ્યો છે. આ કેસના મુખ્ય આરોપી પૂનમ ભદોરિયાએ હવે ઘેલાણી પરિવાર પર આરોપ લગાવતા ખળબળાટ મચી ગયો છે.બુધવારે સેશન્સ કોર્ટમાં જામીન અરજી દાખલ કરતા પૂનમે સનસનાટીભર્યા દાવા કર્યા હતા અને તુષારની પુત્રી પર માનસિક ત્રાસ આપવાનો આરોપ લગાવ્યો હતો. પૂનમ ભદોરિયાના વકીલે કોર્ટમાં દલીલ કરી હતી કે તુષારની આત્મહત્યા માટે તે જવાબદાર નથી, પરંતુ તેનો પોતાનો પરિવાર છે.

અરજીમાં કહેવામાં આવ્યું હતું કે ઘેલાણી પરિવાર તુષારને ફક્ત “એટીએમ મશીન” માનતો હતો. સૌથી ચોંકાવનારો દાવો તુષારની પુત્રી અંગે કરવામાં આવ્યો હતો. પૂનમે આરોપ લગાવ્યો છે કે વિદેશમાં અભ્યાસ કરીને પરત આવેલી તેની પુત્રી તેના પિતાને “પાપા” ને બદલે ” મિ. તુષાર ગેલાની” કહેતી હતી.પૂનમે કોર્ટમાં કેટલીક વોટ્સએપ ચેટ્સ પણ રજૂ કરી હતી, જેમાં તેની પુત્રીએ તેના પિતા તુષારને લખ્યું હતું કે, “ચિંતા ના કરો, જો જરૂર પડશે તો હું પૈસા ચૂકવવા માટે મારી જાતને વેચી દઈશ, હવે તમે મજા કરો.”

પૂનમે દાવો કર્યો હતો કે તેની પુત્રી તેના પિતાની દરેક હિલચાલ, કોલ અને મીટિંગ પર નજર રાખતી હતી, જેના કારણે તુષાર ગૂંગળામણ અનુભવતો હતો.

આ સમગ્ર મામલો 1 ફેબ્રુઆરીએ શરૂ થયો હતો જ્યારે 58 વર્ષીય તુષાર ઘેલાણીએ તેમની પુત્રીના લગ્નની તૈયારી કરતી વખતે પોતાને ગોળી મારી લીધી હતી. 5 ફેબ્રુઆરીએ હોસ્પિટલમાં સારવાર દરમિયાન તુષારનું મૃત્યુ થયું હતું. તુષારની પુત્રીએ પૂનમ ભદોરિયા વિરુદ્ધ FIR નોંધાવી હતી. તેણીએ આરોપ લગાવ્યો હતો કે પૂનમ છેલ્લા 15 વર્ષથી તેના પિતા સાથે અનૈતિક સંબંધમાં હતી અને તેને બદનામ કરવાની ધમકી આપીને કરોડો રૂપિયા પડાવી લીધા હતા. ફરિયાદ મુજબ, પૂનમે તુષારની પ્રિ-પ્રાઇમરી સ્કૂલમાં 50% હિસ્સો બળજબરીથી લીધો હતો અને સતત દબાણ કરી રહી હતી.

પૂનમે પોતાની અરજીમાં જણાવ્યું હતું કે તે 2010 થી તુષાર સાથે સંપર્કમાં હતી. એવું કહેવામાં આવ્યું હતું કે તુષાર બહારથી ખુશ દેખાતો હતો પણ અંદરથી તૂટી ગયો હતો. પૂનમે કહ્યું હતું કે, 31 જાન્યુઆરી (તેની આત્મહત્યાના આગલા દિવસે) સાંજે જ્યારે તેણીએ તુષાર સાથે વાત કરી ત્યારે તે ખૂબ જ ખુશ હતો અને તેનું વર્તન આત્મહત્યાનો સંકેત આપતું ન હતું.

સુરત મહાનગરપાલિકાની ચૂંટણીનું કાઉન્ટ ડાઉન શરૂ થતા શાસકો હવે ‘20-20’ ફોર્મેટમાં આવી ગયા છે. ચૂંટાયેલા પ્રતિનિધિઓની ટર્મ 11 માર્ચે પૂર્ણ થવાની છે, અને તે પહેલાં વિકાસ કામોનો મોટો સ્કોર બાંધી દેવા તાબડતોબ બેઠકોનું આયોજન થઈ રહ્યું છે. આગામી શુક્રવારે સ્થાયી સમિતિ સહિત વિવિધ સાત સમિતિઓની બેઠક એક જ દિવસે બોલાવવામાં આવી છે, જેમાં 100થી વધુ કામો રજૂ કરી મંજૂરી અપાય તેથી સાથે આગામી સામાન્ય સભામાં તમામ કામો મંજુર કરી ખાત મુર્હુત માટે આયોજન થઈ રહ્યું છે.

હાલ 20-20 વર્લ્ડ કપ ચાલી રહ્યો છે અને મેચમાં ડેથ ઓવરમાં સૌથી વધુ રન કરનારી ટીમ વિજેતા થાય તેવું કહેવાય છે. બરાબર આ મોડમાં પાલિકાના શાસકો આવી ગયા છે. સુરત પાલિકાની ગત ચૂંટણીમાં ચૂંટાયેલા પ્રતિનિધિઓની મુદત આગામી 11 માર્ચના રોજ પૂરી થવા જઈ રહી છે. જેના કારણે હવે આગામી શુક્રવારે સ્થાયી સમિતિ સહિત વિવિધ સાત સમિતિની બેઠક એક જ દિવસે મળશે તેમાં 100થી વધુ કામો રજૂ કરી મંજૂરી આપી દેવામાં આવશે. હાલ ક્રિકેટ જગતમાં 20-20 વર્લ્ડ કપની ગરમાવો વચ્ચે “ડેથ ઓવર”માં વધુ રન કરનારી ટીમ જ જીતે છે એવી ચર્ચા છે. બરાબર તે જ અંદાજે પાલિકાના શાસકો પણ ટર્મ પૂરી થવા પહેલાંના છેલ્લાં દિવસોમાં વિકાસ કામોનો સ્કોર મોટો કરવા મરણીયા બન્યા છે. સામાન્ય સભા આચારસંહિતા જાહેર થાય તે પહેલાં બોલાવી, સમિતિઓમાં મંજૂર થયેલા કામોને લીલી ઝંડી આપી ખાત મુહૂર્તનું આયોજન કરવાની તૈયારી ચાલી રહી છે.

ટર્મ પુરી થાય તે 11 માર્ચ પહેલાં હજી ત્રણ સ્થાયી સમિતિની બેઠક યોજાય તેવી શક્યતા છે. હાલની બેઠકમાં કતારગામની શાળાનું સ્થળ પરિવર્તન સહિત કુલ 21 કામો રજૂ થયા છે. સમિતિઓમાંથી પસાર થયેલા તમામ પ્રસ્તાવો 11 માર્ચ પહેલાં થનારી સામાન્ય સભામાં રજુ કરી મંજૂર કરાશે. ત્યારબાદ વિકાસ કાર્યોના ખાત મુહૂર્તો પણ ઝડપથી યોજવાના સંકેત મળી રહ્યા છે.

ટર્મ પૂર્ણ થવાની ઘડીઓ નજીક આવતા શાસકોની તાત્કાલિકતા સ્પષ્ટ દેખાઈ રહી છે. હવે જોવાનું એ રહ્યું કે આ ‘ડેથ ઓવર’ના નિર્ણયોથી શહેરને કેટલો લાંબા ગાળાનો ફાયદો થાય છે કે પછી આ બધું માત્ર ચૂંટણી પૂર્વેનો રાજકીય સ્કોરકાર્ડ જ સાબિત થાય છે.

પાલિકાની સ્થાયી સમિતિ સાથે શુક્રવારે વિવિધ સમિતિઓમાં ડ્રેનેજ કમિટીની બેઠક સવારે 10 વાગ્યે મળશે અને તેમાં 6 કામો માટે દરખાસ્ત રજુ કરવામાં આવી છે. ત્યારબાદ 10.30 વાગ્યે મળનારી પબ્લીક ટ્રાન્સપોર્ટ સમિતિની બેઠકમાં બે કામ રજુ થયા છે. 11.30 વાગ્યે મળનારી જાહેર બાંધકામ સમિતિની બેઠકમાં 20 કામ અને બપોરે 2.30 વાગ્યે મળનારી ટી.પી. સમિતિની બેઠકમાં 5 કામ માટે દરખાસ્ત રજુ કરવામાં આવી છે.1.30 વાગ્યે પાણી સમિતિની બેઠકમાં મળશે જેમાં 17 કામો, 2.30 વાગ્યે મળનારી લાઇટ એન્ડ ફાયર સમિતિની બેઠકમાં 30 માટે દરખાસ્ત રજુ કરવામાં આવી છે. જેના કારણે પાલિકા કચેરી શુક્રવારે વિવિધ સમિતિની બેઠકના કારણે ધમધમશે સાથે સ્થાયી સહિતની વિવિધ 7 સમિતિઓની બેઠકમાં કુલ 101 કામો રજૂ થશે