બિહારમાં પૂરની પરિસ્થિતિ બિહામણી બની રહી છે. બંધમાં ભંગાણ પાડતી ગંગા નદી અને એની શાખાઓ ભયજનક સપાટીથી ઊંચે વહી રહી હોવાથી રાજ્યના ૧૫ જિલ્લાઓમાં ૪૬.૮૮ લાખ લોકો અસરગ્રસ્ત થયા છે.

ભાગલપુર જિલ્લાના વિવિધ ભાગોમાં બંધના ચાર સ્થળોએ ભંગાણ થયું છે, જે પૈકી કેટલાક દુરસ્ત કરી દેવાયા છે, જ્યારે બાકીના સ્થળે કાર્ય થઇ રહ્યું છે. ગોપાલપુર બ્લોકમાં બ્રહ્મોત્તાર બંધમાનું ભંગાણ, જળસ્ત્રોત વિભાગની ટેકનિકલ ટીમ અને સ્થાનિક લોકોના સાથ-સહકારથી રાતોરાત રિપેર કરી લેવાયું છે.

રાંગ્રા બ્લોકમાં ધોબાનિઆ જમીનદારી બંધ ખાતે વહેલી સવારે ૪.૩૦ના સુમારે બંધમાં લગભગ ૨૦ ફીટનું ખવાણ થઇ જતા પીડબલ્યુડી રોડ નંબર-૧૪ની અંદર પૂરના પાણી પ્રવેશ્યા. એની સામે સંરક્ષણાત્મક ઢાલરૂપે વાંસના થાંભલા, રેતીની બેગો અને પ્લાસ્ટિક શીટનો ઉપયોગ કરી કામ ચલાવાયું હતું.

રાન્ગરા ચોકમાં કાલબાલિયા નદી પરના ધોબાનિયા બંધમાં ભંગાણ જણાયું છે. બનિયાબૈસિ પંચાયતમાંના સાદોપુર રિંગ બંધના ભાગરૂપ બુધિયા ડેમમાં પણ ભંગાણ પડયું છે. અસરગ્રસ્ત સ્થળોએ ટેકનિકલ ટીમો ગોઠવવામાં આવી છે, જ્યારે જેમાં નુકસાન થઇ શકે એવુ છે એવા બંધો પર ૨૪ કલાક દેખરેખ રખાઇ રહી છે. આપત્તિ વ્યવસ્થાપન વિભાગના છેલ્લા બુલેટિનમાં જણાવાયાનુસાર, પૂરથી ૮૮ બ્લોકોમાં સમાવિષ્ટ ૫૬૧ ગ્રામ પંચાયતોમાં ૪૬.૮૮ લાખ લોકોને અસર પહોંચી છે. ભાગલપુર, પટણાસ સારન, વૈશાલી, બેગુસરાઇ, કટિહાર, પૂર્ણિઆ અને બકસર વગેરે જિલ્લાઓમાં અત્યંત કફોડી પરિસ્થિતિ છે.
બિહાર અને નેપાળમાં થયેલા ભારે વરસાદથી કેટલીક નદીઓ અને જળાશયો છલકાઇ રહ્યા છે. રાજ્યમાં સપ્ટેમ્બર મહિનામાં અત્યાર સુધી ૯૦ મિલિમીટર વરસાદ નોંધાયો છે, જે નોર્મલ કરતાં ૨૦ ટકા વધુ છે.

બ્રિક્સ શિખર સંમેલન પહેલાં વડાપ્રધાન નરેન્દ્ર મોદીએ શુક્રવારે રશિયન પ્રમુખ વ્લાદિમિર પુતિનને યુક્રેન સામેનું યુદ્ધ બંધ કરવા અપીલ કરી હતી. આ સાથે તેમણે પુતિન સમક્ષ કાળા સમુદ્રમાં ભારતીય નાવિકોની સુરક્ષાનો મુદ્દો પણ ઉઠાવ્યો હતો. ઉપરાંત ભારત અને રશિયાની દ્વિપક્ષીય બેઠકમાં બંને નેતાઓએ વધતી ભૂ-રાજકીય અનિશ્ચિતતા અને તણાવ વચ્ચે વર્ષ ૨૦૩૦ સુધીમાં બંને દેશોનો પારસ્પરિક વેપાર વધારીને ૧૦૦ અબજ ડોલર સુધી લઈ જવા પર સહમતી વ્યક્ત કરી હતી. બિઝનેસ ફોરમમાં પીએમ મોદી, પ્રમુખ પુતિન અને ઈરાનના પ્રમુખ મસૂદ પેઝેશ્કિયાને આર્થિક સહયોગ, સ્થાનિક કરન્સી અને સુરક્ષિત સમુદ્રી માર્ગો પર ભાર મૂક્યો હતો.

બ્રિક્સ સંમેલન માટે રશિયન પ્રમુખ વ્લાદિમિર પુતિન ગુરુવારે દિલ્હી પહોંચ્યા હતા. એરપોર્ટ પર પુતિનનું ભવ્ય સ્વાગત કરાયું હતું. ત્યાર પછી શુક્રવારે બપોરે ભારત મંડપમ્માં પીએમ મોદી અને પ્રમુખ પુતિન સહિત બંને દેશોના પ્રતિનિધિમંડળ વચ્ચે દ્વિપક્ષીય બેઠક યોજાઈ હતી. આ બેઠક પછી પીએમ મોદી અને પુતિન એક સાથે રશિયન પ્રમુખની અત્યંત સુરક્ષિત કારમાં ભારત મંડપમ્માં બિઝનેસ ફોરમના સ્થળ સુધી ગયા હતા.

બંને નેતા ભારત અને રશિયાની વિશેષ તથા વ્યૂહાત્મક ભાગીદારીને વધુ મજબૂત બનાવવા સહમત થયા હતા. દ્વિપક્ષીય બેઠકમાં ભારત અને રશિયા પારસ્પરિક વેપાર હાલમાં ૬૫ યુએસ ડોલરથી વધારીને ૨૦૩૦ સુધીમાં ૧૦૦ અબજ યુએસ ડોલર સુધી લઈ જવા સહમત થયા છે.
રશિયન પ્રમુખ વ્લાદિમિર પુતિને બ્રિક્સના સભ્ય દેશોમાં ઈન્ફ્રાસ્ટ્રક્ચર, વેપાર, લોજિસ્ટિક્સ અને ટેક્નોલોજીમાં વિવિધ પ્રોજેક્ટ્સને ભંડોળ પૂરું પાડવા એનડીબી આધારિત નવા રોકાણ પ્લેટફોર્મ્સની ભલામણ કરી હતી. આ સાથે તેમણે બ્રિક્સ સંગઠનનું આર્થિક સહકારનો વિકાસ કોઈના પણ વિરુદ્ધ નહીં હોવા પર ભાર મૂક્યો હતો. તેમણે કહ્યું સંગઠનનો આશય તેના સભ્યોના રાષ્ટ્રીય હિતોને આગળ વધારવાનો છે.

વધુમાં પ્રમુખ પુતિને રશિયા પર પ્રતિબંધો મૂકનારા જી-૭ સહિતના પશ્ચિમી દેશો પર કટાક્ષ કરતા કહ્યું કે, છેલ્લા પાંચ વર્ષમાં દુનિયાના જીડીપીમાં ૪૦ ટકાથી વધુ હિસ્સો બ્રિક્સ દેશોએ પેદા કર્યો છે જ્યારે તથાકથિત જી-૭ દેશોનું યોગદાન માત્ર ૨૯ ટકા છે. બ્રિક્સ દેશોની સભ્ય સંખ્યા વધીને હવે ૨૧ થઈ ગઈ છે. એક સમયે આર્થિક વિકાસનું નેતૃત્વ કરનારા તથાકથિત નેતાઓ જૂના થઈ ગયા છે. તેમની જગ્યા હવે વિકાસનું નેતૃત્વ નવા દેશો કરી રહ્યા છે. વૈશ્વિક અર્થવ્યવસ્થા બદલાઈ રહી છે. પીએમ મોદીએ ટ્વીટ કરીને જણાવ્યું હતું કે, રશિયન પ્રમુખ સાથે ઈન્ફ્રાસ્ટ્રક્ચર, એનર્જી, ટેક્નોલોજી, સંરક્ષણ અને સંસ્કૃતિ જેવા મુદ્દાઓ પર ચર્ચા થઈ હતી. વધુમાં ૨૦૩૦ સુધીમાં આર્થિક સહકાર માટેના કાર્યક્રમ મુદ્દે પણ ચર્ચા થઈ હતી. વિદેશ મંત્રાલયે જણાવ્યું હતું કે, પીએમ મોદીએ બંને દેશો વચ્ચે ૨૪મી વાર્ષિક સમિટની ચર્ચા માટે રશિયા આવવાનું પ્રમુખ પુતિનનું આમંત્રણ સ્વીકાર્યું છે.
પીએમ મોદી અને પ્રમુખ પુતિન વચ્ચે લગભગ ૪૫ મિનિટ સુધી દ્વિપક્ષીય બેઠક ચાલી હતી. આ બેઠકમાં બંને વચ્ચે સંરક્ષણ, ક્રિટિકલ મિનરલ્સ, નાગરિક પરમાણુ ઊર્જા, ખાતર પુરવઠા અને લોકોથી લોકોના સંબંધોના મુદ્દે સહકાર વધારવા સહમતી બની હતી. આ બેઠકમાં પીએમ મોદીએ રશિયન પ્રમુખને યુક્રેન યુદ્ધનો અંત લાવવા અપીલ કરી હતી. સાથે જ કાળા સમુદ્રમાં વ્યાપારિક જહાજોના પરિવહન અને ભારતીય નાવિકોની સુરક્ષાનો મુદ્દો પણ ઉઠાવ્યો હતો.

રશિયા સાથેની દ્વિપક્ષીય બેઠક પછી ભારત મંડપમમાં પીએમ મોદીએ પુતિન અને ઈરાનના પ્રમુખ પેઝેશ્કિયાનની હાજરીમાં યુદ્ધો વચ્ચે વૈશ્વિક વેપારનો મુદ્દો ઉઠાવ્યો હતો. તેમણે કહ્યું કે, વૈશ્વિક વ્યાપારિક જળમાર્ગો, પુરવઠા ચેઈન અને નાવિકો સુરક્ષિત હોય તો જ વૈશ્વિક વેપાર શક્ય બને છે. આ કારણે ભારત આંતરરાષ્ટ્રીય જળમાર્ગો પર મુક્ત પરિવહન અને નાવિકોની સુરક્ષાનું સમર્થન કરે છે.

મહારાષ્ટ્રના ભંડારા જિલ્લામાં શુક્રવારે વહેલી સવારે ગમખ્વાર માર્ગ અકસ્માત સર્જાયો હતો. નાગપુર-રાયપુર નેશનલ હાઈવે પર પિંપળગાંવ સડક નજીક ટ્રક અને પિકઅપ વાન વચ્ચે જોરદાર ટક્કર થઈ હતી. અકસ્માતમાં ત્રણ બાળકો સહિત કુલ 8 લોકોનાં મોત થયા છે, જ્યારે ત્રણ લોકો ઇજાગ્રસ્ત થયા છે.

નાગપુર-રાયપુર હાઈવે પર સર્જાયો અકસ્માત

મળતી માહિતી મુજબ, ભંડારા જિલ્લાના પિંપળગાંવ સડક ખાતે આવેલા ભાઉ ઢાબા નજીક આ અકસ્માત થયો હતો. નાગપુર-રાયપુર નેશનલ હાઈવે પર ટ્રક અને પિકઅપ વાન વચ્ચે ટક્કર એટલી ભયાનક હતી કે તેમાં 8 લોકોનાં ઘટનાસ્થળે જ મોત થયા હતા.અકસ્મતમાં મૃત્યુ પામેલા લોકોમાં ત્રણ બાળકોનો પણ સમાવેશ થાય છે.

ત્રણ લોકો ઇજાગ્રસ્ત
અકસ્મતની જાણ થતાં સ્થાનિક લોકો અને પોલીસ ઘટનાસ્થળે પહોંચી ગયા હતા. ત્યારબાદ બચાવ કામગીરી હાથ ધરવામાં આવી હતી. અકસ્માતમાં ઇજાગ્રસ્ત થયેલા ત્રણ લોકોને સારવાર માટે સાકોલી સબ-ડિસ્ટ્રિક્ટ હોસ્પિટલમાં ખસેડવામાં આવ્યા છે.

ભંડારા SPએ અકસ્માતની પુષ્ટિ કરી

ભંડારા પોલીસ અધિક્ષક નૂરુલ હસને અકસ્માતની પુષ્ટિ કરી છે. તેમણે જણાવ્યું હતું કે પિંપળગાંવ સડક નજીક નાગપુર-રાયપુર નેશનલ હાઈવે પર ટ્રક અને પિકઅપ વાન વચ્ચે અથડામણ થઈ હતી. જેમાં ત્રણ બાળકો સહિત 8 લોકોનાં મોત થયા છે. ત્રણ ઇજાગ્રસ્તોને સાકોલી સબ-ડિસ્ટ્રિક્ટ હોસ્પિટલમાં સારવાર માટે ખસેડવામાં આવ્યા છે.

અકસ્માતનું કારણ જાણવા તપાસ

પોલીસ દ્વારા અકસ્માત બાદ બચાવ કામગીરી હાથ ધરવામાં આવી હતી. અકસ્માત કેવી રીતે અને કયા સંજોગોમાં સર્જાયો તેની વધુ વિગતો હજુ સામે આવી નથી. ઘટનાને લઈને પોલીસ દ્વારા તપાસ કરવામાં આવી રહી છે. અકસ્માત અંગેની વધુ વિગતોની રાહ જોવાઈ રહી છે.