બોલિવૂડના ‘કિંગ ખાન’ એટલે કે શાહરૂખ ખાનની આગામી ફિલ્મને લઈને ચાહકોમાં ભારે ઉત્સાહ જોવા મળી રહ્યો છે. ફિલ્મનું જોરશોરથી પ્રમોશન શરૂ થઈ ગયું છે અને સોશિયલ મીડિયા પર ‘કિંગ’ ફિલ્મમાં તેમના લુક દર્શાવતા પોસ્ટર તથા કટઆઉટ પણ ખૂબ વાયરલ થઈ રહ્યા છે. તાજેતરમાં ફિલ્મના દિગ્દર્શક સિદ્ધાર્થ આનંદના એક જ ટ્વિટે ચાહકોમાં ખળભળાટ મચાવી દીધો હતો અને અટકળો શરૂ થઈ ગઈ હતી કે શાહરૂખ ખાનના જન્મદિવસ એટલે કે 2 નવેમ્બરે નિર્માતાઓ શું સરપ્રાઇઝ આપવાના છે. હવે એ સ્પષ્ટ થઈ ગયું છે કે આ ખાસ દિવસે ચાહકોને શું ભેટ મળવાની છે.
2 નવેમ્બરે રિલીઝ થશે ‘કિંગ’ ફિલ્મનું ધમાકેદાર ગીત
શાહરૂખ ખાનની બહુપ્રતિક્ષિત ફિલ્મ “કિંગ” ના પહેલા ગીત અંગે મોટું અપડેટ સામે આવ્યું છે. આ ફિલ્મનું પહેલું ગીત શાહરૂખ ખાનના ૬૧મા જન્મદિવસ (૨ નવેમ્બર, ૨૦૨૬) ના રોજ રિલીઝ થવા જઈ રહ્યું છે. ખાસ વાત એ છે કે આ ગીતમાં લોકપ્રિય ગાયક અરિજીત સિંહનો અવાજ સાંભળવા મળશે.અહેવાલ મુજબ, આ ગીત ફિલ્મ માટે પ્રમોશનની દૃષ્ટિએ ખૂબ જ મહત્વપૂર્ણ સાબિત થશે. આ જાહેરાત બાદ ચાહકો ફિલ્મ અને ગીત બંને માટે બેહદ ઉત્સાહિત છે.
અનિરુદ્ધ રવિચંદરે સાઉન્ડટ્રેકની જવાબદારી છોડી
ફિલ્મના સંગીત અને સાઉન્ડટ્રેકનું કંપોઝિંગ પ્રખ્યાત સંગીતકાર અનિરુદ્ધ રવિચંદર સંભાળવાના હતા, પરંતુ ‘બોલિવૂડ હંગામા’ના અહેવાલ મુજબ, તેમણે હવે આ પ્રોજેક્ટથી અલગ થઈ જવાનો નિર્ણય લીધો છે. અનિરુદ્ધ હાલમાં પોતાના દક્ષિણ ભારતીય પ્રોજેક્ટ્સમાં ભારે વ્યસ્ત હોવાને કારણે “કિંગ” જેવી મોટી અને ભવ્ય ફિલ્મ માટે પૂરતો સમય ફાળવી શક્યા ન હતા. શાહરૂખ ખાન અને સિદ્ધાર્થ આનંદ ફિલ્મની રિલીઝ તારીખમાં કોઈ ફેરફાર કે વિલંબ ઈચ્છતા ન હોવાથી, અનિરુદ્ધે પરસ્પર સમજૂતીથી આ પ્રોજેક્ટથી પોતાને દૂર કરી દીધા છે.
સચિન-જીગર સંભાળશે બાકીનું સંગીત અને બેકગ્રાઉન્ડ સ્કોર
કોઈપણ ફિલ્મમાં પૃષ્ઠભૂમિ સંગીત (Background Score) માત્ર એક ભાગ નથી હોતો, પરંતુ તે ફિલ્મનું વાતાવરણ અને જીવંતતા ઊભી કરે છે. અનિરુદ્ધ જતા પહેલા ફિલ્મ માટે એક શાનદાર થીમ ટ્રેક તૈયાર કરીને આપી ગયા છે, જેમાં સચિન-જીગરની જોડી જરૂરિયાત મુજબ ફેરફાર અને સુધારા કરશે. હવે સચિન-જીગર જ ફિલ્મના બાકીના તમામ ગીતો અને બેકગ્રાઉન્ડ સ્કોર માટે જવાબદાર રહેશે.
